Память о Петрі Гузлей займе широке місце в будущой истории карпаторусского народа, яко активный, вплывовый и отдавший надзвычай много труда для свого народа, його объєдинения и його добра.

Петро Гузлей уроженец села Якубяны на высоком Спишу нашой Пряшевщины. Родился он в 1885 року, а в Америку пришол в 1902 року. Петро приіхал до міста Нескогоннинг в Пеннсильвании ку майнам. Там сейчас приступил до запомоговой организации “Свобода”, котрой послужил предсідательом 10 роков. Коли переселился потом до Елизабет, Н. Дж., где открыл своє приватне предприятие — штор не переставал дальше трудитися, и коли появился Лемко-Союз, то он познакомил народны массы свого краю с його объєдиняючом программом и енергично працувал в том напрямі абы объєдинити наш народ для общой помочи родному краю в Карпатах. Меже Лемко-Союзом и запомоговыми организациями объєдиняючым огнивом был Карпаторусский Комитет, Карпаторусский Конгресс и Карпаторусский Союз, в котрых он был и предсідательом и кассиром. Петро Гузлей в позднійшых роках был и предсідательом отділа Л. С. и окружным организатором, а кромі того на єден завод предсідатетьом Карпаторусской Радио Программы, котра голосилася в Нью Йорку за три и впол рока. Много труда враз с свойом женом Катерином положил в часі войны для Русского Воєнного Релифа и Червеного Креста.

Петро Гузлей помер 15 июня 1962 року в Риго Парк, Лонг Айленд, Н. Й. Оставил в живых вдову Катрену Гузлей, доньку Кей Баров, Ирену Лентз и сына Стефана, голливудского актора, извістного под именом Стивен Робертс, внуков, брата и дальшу родину.

История карпаторусской емиграции покрываючи период I и II Світовых войн не може минути николи имя Петра Гузлея, бо она не може обыйтися без того, абы його труды не были отмічены. В той истории його память буде жити вічно.