Володя Гонос, Торонто, Онт.

Володі Гонос из Торонто, Онт., Канада, недавно исполнилось 12 літ житья. Помимо свого молодого віку, Володя стал извістным на всю Канаду.

Свою популярность и славу Володя почал здобывати штыри рокы тому назад, то єсть на 8-ом року свого житья. У Володи незвычайно волнуючий голос и природный наклон к иструментальной грі. Прославился он своим співом и аккомпаниментом на гармошкі. Свой спів он исполнят с высоко профессиональным мастерством и горячым запалом. Люде, котры виділи хоц лем раз Володю на сцені, называют го просто — чудом.

За послідны штыри рокы Володя составил собі славну историю, як дітина-профессионал. Своими постоянными выступлениями в театрах, на публичных концертах, в парках и аудиториях высшых школ, на торжествах, он стал извістный всім жителям великого города Торонто. Володя Гонос выступал уже и на найбольшых предприятиях в Торонто, в Массей Голл и торонтонском Колисеум, и все с найкрасшым успіхом. Присутны на такых торжествах корреспонденты передовых канадскых газет с великом похвалом рознесли вість на всю страну о незвычайном таланті молодого Володи:

Володя выступат и про другы емигрантскы группы в Канаді на их специальных предприятиях. Минувшого літа он выступил на всеславянском здвигу коло Торонто, где собралося поверх 20 тысяч славян из всей Канады. Благодаря Главному Правлению Лемко-Союза, Володя приіхал в Соєдиненны Штаты для специального выступления на концерті в честь делегатов 14-го Съізда Лемко-Союза, котрый отбывался в сентябрі 1948 року, в Ансонии, Конн. Присутны на том концерті с небывалым ентузиазмом привітствовали молоденького співака.

Голос Володи был зарекордованый на пластинкі штыри рокы тому в часі його выступления в найбольшом на всю бритийску империю “Рояль Иорк” готелю представителями РСА Виктор.

Володя Гонос родился в Торонто 22 декабря 1936 року у Марии, по роду Геренчак из Тылявы, и Ивана Гонос из Завадкы Рымановской, повіту Сянок, на Лемковині. Однорочным хлопцем в 1937 року он был с мамом в єй родном селі на Лемковині и по року пребывания там повернул в Канаду. На четвертом року житья Володя заболіл на “ревматик фивер”. Коли поліпшало, родиче купили йому гармошку для забавкы. В коротком часі Володя, як на чудо, почал співати пісни и пригравати собі на гармошкі. Он добре грамотный в русском и английском языку и письмі, так што и пісни співат по-английски ровно знаменито, як и по русски, и тоже нашы лемковскы співанкы, котрых научился у свойой матери. Уже третий рок, кромі лекций співу и практичной музыкы, Володя проходит теорию музыкы в торонтонском “Консерваториум ов Мюзик”.

У Володи сильный лиричный дітский голос. Он веде ним так уміло, сміло и с ударами як высоко профессиональный артист. Ровночасно он отличаєся великом отвагом в часі своих выступлений. Публика радуєся ним и слухат, як бы вкопана в землю.

Молодому Володи Гонос желают всі много здоровья и успіхов, а быти може он принесе своим талантом світову славу собі. Тогди не лем родители, але и сердце каждого из нас буде переполнене гордостью, што он вышол из нашого лемковского народа.