О том, же хто и што руснаци нихто вам директно не побіст. Не побіст и зато, же незнат, што вы думате. Не побіст и зато, бо знат, же каждый иншак думат. Кед ся, як основа возьме наука, то єст друга справа, але вам снова тото не буде ясно. То на конец в справі дотычного на основі наукы, кед хочете, навірно вам многы скажут. Хоц хто тото вам скаже. А каждый скаже, же так, як он говорит, же то точно и он направду тото добрі знат, а не там даякы чвиркоше. Он всьо точно скаже. Але хто му вірит?!

Я вам напевно повім с той случайности правду. Правду, правдучку правду.

Скажме, я стою на том, же и руснаци, якоси ся зродили. Зависит, где, коли и при якых обставинах.

На ділом світі єст лем єден мудрый руснак. Несчастя лем в том, же каждый руснак думат, же то он тот єден.

Уж роками и віками руснак ся воздвигат над другы народы и национальности. Скажме над сербами. Ци серб знат от розвидніня до ночы быти на полю? Не знат, але руснак знат. Значит, руснак побідитель. Нашу историю, наш правопис (хоц ищы незаконченый), нашу граматику, наше книговництво — то не мат нихто на світі. Руснакы в том єдинственны! Та ани подложыти ногу другому, нихто так незнат як мы. Рахую, же тото подкладаня ногы другому достигло художественный уровень. Дозріло за Нобелову нагороду.

Кед руснак путує зо свойом женом на красиве и синіцке Ядранске море, он небуде по рускы бесідовал зо свойом женом. Руснак ся ганьбит, же є руснаком, кед є в шыроком світі. Не ганьбится лем между руснаками говорити, же мы нич никому не вредиме и нич не представляме. Приміром, серб ся не ганьбит, же є серб а як пойде лем на друге село, та його кревный брат нерозуміт його ани так як руснака.

Дахто говорит, што руснакох нихто не цінит. Та где, выдумал тот, што так повіст. Зокрема, другы дуже цінят нашу русску послушность. А руснаци, напримір, цінят місто того сербску “сливовицю” (палюнку зо сливок). Видите, якы дуже великы ріжници в цінению.

Ищы нашы стары приповідали, же кед Бог кликал перед себе представителей народов, штобы сказали, кому што потребно и што сой желат, то перед нього приступил и руснак. Каждый сой желал инше; дахто велику державу, другый сильну армию, богатство, мудрость... А руснак говорил Богу:

— Я бы, Боже, кебы сте могли... най сусідови здохне корова.

Думам, же теперь вам ясно, хто сме и што сме — а найбольше, же якы сме.

Даяк, єм неприпознал, же и я руснак — же тото вшытко ся односит и на мене. А наконец ищы больше, як на другых, бо я ся тішу, же єм руснак.

Але, певно, не єм шаленый признатися, же єм руснак!

Вид на лемковске село.