Цілый день ся наробили
Начудили, надвигали,
И зараз-же по вечері
На соломі полягали.

Твердо спали до півночы,
Твердо, моцно, як забиты,
И не чули, не слышали,
Як в село вошли бандиты.
Жебы их обрабувати
А так всіх помордувати.

А люд спит и нич не знає.

Кусцікови, што захранил,
Снится сон, же в його хату
Вошло в ночы пять бандитов,
Жебы го обрабувати.

А Демко мал сон инакший.
Снится му, же уж єсть в раю,
Же му святы и ангеле
Райску браму отверают.
И в гонорах го провадят,
Пахнячы кадила кадят.

Святый Петро попереду
Запрашат го на “победу”,
Та поідут доокола,
Аж до самого престола.

Аж ту раптом стрілянина
На стависку коло млина,
Демко гоп! на рівны ногы,
И в ументі сбудил Ксенью.

Сбудил цілу фамилию
И убрался в очымліню,
Хап автомат и патроны —
Готовый до обороны.

Спытат дакто што? автомат?
Хиба мож было мати?!
Так, повідам, вшиткым можна,
Кто ся згодил выіхати.

То не дуже коштувало,
Мали до них и патроны —
Два поллітра самогону,
А люде тым моментально
Враз ся вшиткы побудили.

Кедь ся зробил гопкіт в селі,
Як почули люде стрілы,
Стары хлопи и паробци
В оборонену лінию стают,
Каждый єден глядат декунк
И на врага всі чекают.

Жебы огнем го отбити,
Не пустити медже хаты,
Жебы житья и маєток
От бандитов ратувати.

Чути сильну стрілянину,
Бабскы йойкы, хлопскы крикы.
Же Кусьціка уж забили
На выгоні коло Крикы рікы.

Але як ся выяснило,
Никто житья не пострадал,
А бандитов страх огорнул.
Постріляли и пішли назад.

Хвала Богу, уж над свитом
Повтікали в ліс бандиты,
А люде всі покликали,
Жебы пацір выгваряли.
Як бы вшиткы люде были
Солидарны, єдной мысли,
То бы вшиткы до Совітов
С Полыпы разом пришли.
Але знаме — так не было.
Бо деякы не думали
Залишати свои села,
Свои хижы и так дале.
Отжек такых было доста.
Хоц и меньша половина,
И дуже с них пострадало
Без поводу и без вины.
В білый день пришли бандиты,
И як заяців убивали,
Єднако, ци старший чловек,
Ци молодший, ци барз малый.
А никто их не боронил,
Бо не хотіл боронити,
Сама влада не хотіла,
Бо так, реку, мало быти.
На Гвоздзянці близ Небыльця
Убили пятнадцет люди,
Вы бандиты, без сумлінья!
Провідінья вас осудит.
Оно єсть, бо оно вічне,
Пережне покоління,
Будь прокляты, вы убийці,
Без душы и без сумлінья.
На Залісью под Ряшовом
Девять душ заклаштрупили,
Пали жертвом без обороны.
Што никому нич не винны.
А зас в селах близ Дынова,
Луна, Кросно, Бахар, Грудно,
Сімдесят и двоє люди
Забили в саме полудне.
То суть факты, страшны факты
И мордовня неслыхана,
А тым більше, же стріляли
Католикы — христиане.
Убивали нашых братов
Вез пардону, бо за планом,
И пепельный план убивства
Без совісти виконано.
Задумалися руснакы,
Зарыдали всі сироты,
А бандиты пішли далі
Меже хаты поза плоты.
Зо спокойом, зо жартами,
Нибы нич ся ту не стало,
Закурили папиросы
И грабили, што ся дало.

Старый Лемко.