Минувший 1957 рок был трагичным роком в житью нашой культурно-просвітительной организации Лемко-Союза. Был трагичным для всей Лемковской емиграции в Соединенных Штатах и Канаді и для всего Лемковского народа, где лем он жиє. Тот рок был трагичным для нас всіх, бо дня 10 июня в Юнкерском госпиталю Ст. Джонс, умер наш краян Др. Симеон С. Пыж, долголітный народный труженик, учитель, дорадник, руководитель и отвітственный редактор єдинственной лемковской газеты “Карпатска Русь”, а за послідных 11 літ, редактор-составитель сего календаря-книжкы, котрый под його управлением стал широко популярным и поширеным помеже лемками довкола земной кули.

Земне житье Д-ра Симеона Пыжа было окончеке и закрыте, но його указания, наука и идеи теперь начинают возрождатися, и на основах його трудов начне строитися организация, связувати и подноситися лемкы для труда и борьбы за свои права на світлійщу будучность свого племени, його добробыта и счастья.

Др. Симеон Пыж родился 14 февраля, 1894 року в крестьянской родині села Ваненне, горлицкого повіта на Лемковині, где окончил сельску начальну школу. Понеже с малых літ показувал тягу и талант до наукы, родиче отдали його в высшы школы, в гимназию, котру он посіщал в свойом повітовом городі Горлицях и Новом Санчі. В тоты часы в обох тых городах нашы передовы лемковскы патриоты набыли студеническы общежития Русскы Бурсы. Дньом лемковскы студенты училися в державных гимназиях, а по школі не лем кормился и сдали, але занималися дальше науком, а наставникы бурсы преподавали им русску грамоту и знание русской истории.

Д-р Симеон Пыж тоже жил и учился в Бурсі, но яко сын селянина, молодый студент Симеон, должен был помагати своим родичам удержатися в школі и для того послі всіх занятий вечерами давал лекции по домам дітям заможнійшых граждан приготовляючи их и себе, к строгым на тоты часы екзаменам. Не взираючи на остру ядь польекых учителей, котры в болышшетві свойом были зажертыми национальными шовинистами и строгыми к дітям непольской народности. Симеон успіл здати матуру с самым найвысшым отличием меже учениками.

В часах, коли Симеон готовился к высшому образованию оборвалася Перва Світова Война, 1914 рока. За принадлежность к идеалам свого русского народа, враз с тысячами другых передовых лемковскых патриотов Симеон был арестованый австрийскыми жандармами и заточеный в концентрацийный табор Талергоф в Австрии. Там погибли тысячы звычайных лемковскых селян-патриотов и интеллигенции. Одны были убиты, другы повішаны, иншы поумерали от побою, от голоду и заразливых хворот. Там страдал и Симеон Пыж и от певной гибели спасла го його молодость. Стара Австро-Венгрия почала терпіти страшны поражения на фронті, и єй были потребны новы солдаты для пополнения опустошеных армий и спасения розвалющойся империи. Так и Симеон Пыж был переведеный из тюрмы на итальянский фронт. Тут Симеон рішыл отомститися за невиданне угнетение свого народа австрийскими властями и при первой случайности он біжал из австрийской армии к итальянцам. Воєнноплінным он пережил в Римі и другых городах Италии до окончения войны. Там он поступил добровольцем в Чехословацкий Легион, котрый организувался на территории Италии для борьбы за независимость свойой славянской краины, котра и повстала на розвалинах Австро-Венгерской империи. Послі розвила Австро-Венгрии, в новой Чехословакии он поступил в Чарлс Университет в Прагі, котрый окончил в марті 1922 року с найвысшым отличием, як Доктор Прав.

В тоты часы завершилися важны світовы события. В цілом світі говорили о принципах Версальского мира, котры давали право и возбуждали великы надіи поневолених народов на самоопреділение. Меже лемковском молодом интеллигенциом и студентами, котрых в Чехословакии было много, начался рух, бо принципы Версальского мира давали признакы, што и наша Карпатска Русь, включаючи и родну Лемковщину, може получити свою автономию и освободитися от вічного пригнетения сусідных славянскых племен. Штобы подняти силу нашого народа до борьбы за тоты принципы и приготовитися для организованного натиску о свои права, группа лемковскых студентов в Прагі рішила послати одного с помеже себе в Америку меже численну лемковску емиграцию для организации народных сил, культурной роботы и сбора отповідных финансов на проведение в житья освободительной программы. Выбор пал на Сийсона Пыжа, и так в 1923 року он ступил на американску землю и того самого року стал редактором газеты “Правда” в Филадельфии, органа найсильнійшой по свому членству и маєтковом стані карпаторусской запомоговой организации Общества Русскых Братств. На той должности он задержался полных десять літ, помагаючи при том строити нову, народного характера организацию Лемковский Союз.

В 1934 року он в цілости перешол Лемко-Союз, где обнял редакторство народной газеты “Лемко”, издаваемой в городі Кливланді, а позже перенесеной в Нью Йорк и Юнкерс, и переименованной на “Карпатску Русь”. На той должности редактора, он оставадся до послідной минуты свойой замічательной жизни. Послідный номер газеты “Карпатска Русь”, средагованой ним появился в світ с датом 7 июня, 1957 року, то єсть три дни до його кончины.

Будучи редактором народной газеты, Др. Симеон Пыж не ограничал себе до редакторекых объязанностей. За час свого редакторства он тоже занимал уряд Генерального Секретаря Лемко-Союза за много літ. Помагал строити и был Секретарьом Карпаторусского Американского Центра, нашой народной будовы за десять літ. Он руководил Карпаторусскым Конгрессом в часі Другой Світовой Войны, был главным Представителем от Лемко-Союза и другых карпаторусскых организаций и клубов в Славянском Конгрессі и в Комитеті Русского Воєнного Релифа, организованного американцями в часі фашистской войны. Он ширил всіми силами приятельскы связи и держал кооперацию с другыми карпаторусскыми, русскыми и украинскыми организациями, котры могли способствовати ділу свободы нашого народа и ділу справедливости и мира.

Остатнымй роками он поддавал членам организации и читателям газеты; свои предложения, начерпаны из житьовой практикы планы и идеи покупкы народной фармы, где было бы притулище для тых старшых пионеров из нашой емиграции, котры пожелают, або будут примушены глядати свого притулища в подобной институции, и где бы нашли свой народный центер молоды поколіния нашых емигрантов для свого розвеселения, и розумієся, для продолжения в той новой отчизні, своих народных традиций и народного характера свого народа. В той ціли при його помочи была организована корпорация Американского Лемко-Парка, управление котрой отдано в молоды и енергичны рукы. Но увидіти саму институцию йому не удалося, он скончался перед єй покупком.

Но первым його старунком все был родный край Лемковина, судьба котрой была давно и осталася до днешных дней найбольше трагичном. Вмісто свободы, за котру мы так щиро и от душы працували и тут в Америкі и в краю нашы найліпшы сынове отдали свои молоды житья из рук німецкого нацизма. И нашы труды и их кровь и жизни были даремны. Нашой Лемковині был нанесеный ище оден, близко смертельный удар, бо наступило тотальне выселение народа из його прадідной земли, така страшна подія, подобной якой не знає история світа.

В остатны місяці до свойой кончины, он працувал над тым, абы загоити тоту страшну рану свого народа. Он приготовлял программу той роботы. Он составил Меморандум до Польского Народного Правительства, и просил його представителя в Вашингтоні о принятие на ауденцию. Того дня он не дочекал, бо ослабло його сердце, и дня 10 июня в праздник традицийных Лемковскых Русаль он на вікы упокоился. Он упокоился, но нам живым на руках оставил своє завіщание: боротися за право и свободу свого народа. За тото його завіщание, Меморандум, продолжаєся робота и буде продолжатися нами живыми. Тут оно приведено в рядках тых вспоминов о пок. Д-рі Симеоні Пыжі.

В США и Канаді живе ище и теперь до 200 тысяч емигрантов- лемков, выходцев из юго-восточных повітов нынішньой Польши: Ліска, Санок, Кросно, Ясла, Горлицы, Новый Санч и Новый Торг. Свой родный край там в Карпатах они называют Лемковщином. Тут в емиграции они сохраняют до теперь свои народны традиции, обычаи и свой особливый народный лемковский язык, близкый к русскому и украинскому, но со своим отмінным акцентом, лексиконом и другыми характеристичными чертами. Лемкы в США и Канаді сохранили и любовь к родному краю, из котрого вышли, и за весь час поддерживали тісну связь со своими родными в старом краю, котрым по своим силам оказывали постоянно всяку помощь. Многы из них думали все о том, штобы на стары рокы, як уж соберут трохи грошей, або як выйдут на пенсию, вернутися на родну землю и там в своих селах, меже своим народом прожити остаток своих дней и там по смерти найти упокоение в родной землі, где похоронены их предки.

Зараз послі 2-ой світовой войны лемкы в США организовали Лемковский Релифовый Комитет для несения помощи родному краю и своим братьям и сестрам, котры перенесли страшну германску оккупацию и воєнны знищенья. В организации того Комитета приняли участие головны представители культурно-просвітителыной ассоциации Лемко-Союза в г. Юнкере, Н. Й., и братской запомоговой организации Общества Русских Братств в Филадельфии, як также ряд найвиднійшых общественных діятелей лемковской емиграции.

В плані было притягнути к участию в несении материальной помощи родному краю всі другы организованны группы лемковскых емигрантов в США и Канаді и начата широку кампанию для сбора средств на посылку сельско-господарскых машин, животины, будовляных материалов и всякых готовых продуктов, потребных там для восстановления господарского житья и направы воєнных шкод. В плані было также послати своих специалистов, котры мают американску школу и практику, штобы они там на місци помогли внідрити американскы методы земледілия, будовы домов и дробного промышленного выробництва в сельскых районах.

Но вся тота робота для оказания помощи родному краю была оборвана и задержана у нас примусовим переселением лемковского народа из його родных сел и міст в Польші. В 1945 и 1946 роках мало місце добровольне переселение на основі договора меже правительствами Польской Народной Республики и Совітского Союза — на Украину. Но и тото переселение во многых случаях носило не добровольный, а примусовый характер. Потом в 1947 року пришло загальне и открыто примусове выселение при помощи воєнной силы всіх лемков, котры остались в своих селах и на своих господарках в Польші. Они мусіли оставити свои домы, свои обробленны фармы и свой способ житья, до якого привыкли. Польскы власти перевезли их в западны районы, на отзысканны в минувшой войні землі, и там роскинули поєдинчыми фамелиями або меньшыми группами меже польским населением.

То была правдива народна трагедия, котра глубоко потрясла всю лемковску емиграцию в Америкі. То представлялось нам як явный план для полного винищения нашого народа и денационализации нашого родного краю. Теперь не могло быти и мысли в несении материальной помощи родному краю, нашой Лемковщині там в Карпатах, бо она осталась без нашого народа. Так Лемковский Релифовый Комитет приостановил дальшу роботу. Маленький фонд в несколько тысяч долларов, який был собраный в первы місяцы його діятелыности, лежал тут в американскых банках.

Но в октябрі минувшого року в Польші пришли радикальны зміны. Руководство державном политиком и национальным житьом польского народа перебрали новы лидеры, котры признали стары помылкы и принялися за направу. Так в Варшаві было признано, што и лемкам в Польші была причинена тяжка кривда, котру треба направити. Было дозволено всім национальным меньшинствам в Польші организовати свои национальны товариства, издавати литературу на народных языках тых меньшинств и розвивати свою национальну культуру. Было об’явлено и то, што лемкы, котрых в 1947 року выселено примусово из Лемковщины, мают право вернутися на родну землю. Правда, на практикі такий поворот послі 10-рочного изгнания, єсть связаный с громадными трудностями, бо за тот час много жилых домов и господарскых будинков в лемковскых селах было знищено, або нарочно розобрано, а в тых, што сохранились, сидят теперь осадникы-колонисты, котрых польскы власти перевели, або позволили им переселитися из иншых районов. Много управной господарской земли было запущено и оставлено без всякого господарчого ужитку.

Тоты зміны там в старом краю створили нову ситуацию, котра дала можность и нашому Лемковскому Релифовому Комитету возобновите свою діятельнсть. 31 марта с. р. на собрании директоров и представителей организации тот Комитет был реорганизованый и пополненый новыми директорами. От имени сего новореорганизованного Лемковского Релифового Комитета мы просиме Правительство Польской Народной Республики:

1. Дозволити на приізд в Польшу специальной делегации от Лемковского Релифового Комитета для обсуждения с державными властями вопросов о пересылкі и роспреділении организованной помощи от лемков в США и Канаді их родным братьям в старом краю и для установления связи с лемковскым народом в Польші.

2. Дати всім выселенным лемкам в Польші, котры того желают, практичну можливость поворота на стары місця в Карпатах и на их власны господаркы, и помочи отбудоватися и загосподаритися тым, котрых хаты были знищены и господаркы занедбаны или цілком запущены.

3. Признати и обеспечили населению лемковскых районов народну школу на языку того населения и свободу выбору религии и прадідных традиций.

Мы увірены, што таке устройство народных и господарскых справ лемковского населения в Польші возбудило бы меже лемковском емиграциом в США и Канаді огромный интерес к родному краю и дало бы можливость собрата тут большы фонды на помощь Лемковщині в Польші.

Польска держава в ділом получила бы двойну пользу. Во первых, от того што в Польшу приходило бы от лемковскых емигрантов в США и Канаді много грошей, готовых продуктов, господарскых машин и всякых материалов не тилько из фондов Лемковского Релифового Комитета, но и от поєдинчых особ, котры вертались бы из эмиграции доживати свой вік в родных селах и при своих родинах. А друге то, што стары жители той гористой территории в Карпатах можут найлучше выкорыстати продуктивны возможности тых районов, бо они знакомы с природам того краю, його климатом и потребностями. В минувшині лемковскы села поставляли сусідным повітам много сельско-господарскых продуктов и поднимали доход цілой краины. Извісхно, напримір, што животноводство в лемковскых районах даже при старинных, примитивных методах господаркы стояло дуже высоко. На ярмакы в лемковскых районах приізжали купцы даже из Германии на закупно мясного скота, молочных и другых продуктов. Извістно и то, што такы продукты, як грибы, скіркы и т. д. сбывались в большых скилькостях даже в Америку. А теперь при застосовании модерной сельско-господарской техникы и новой наукы продуктивность тах районов може быти увеличена во много раз. Тут треба лем створити благоприятны условия для населения, штобы народ был обеспеченый и мал охоту взятися с ділом енергиом до господарской роботы. А тоты условия будут створены, єсли Польске Правительство даст можность выселенным лемкам вернутися на стары місця, обеспечит их маєтковы права и обеспечит им локальне самоуправление и розвитие их народного культурного житья.

Др. Симеон Пыж помер, але завіщание його остало жити. Организованый при помочи Д-ра Пыжа, десять літ тому, Лемковский Релифовый Комитет поднял уроненный из мертвых рух Д-ра Пыжа Меморандум. Дня 25 июля 1957 року Председатель Лемковского Релифового Комитета Петро Гардый, його Секретарь о. Йосиф Федоронко и новый редактор газеты “Карпатска Русь” Николай Цисляк посітили Польске Представительство в Вашингтоні, штобы ознакомити го с нашым меморандумом, в котром выражены нашы желания и нашы требования. Наша делегация была принята Другым Секретарьом Польской Амбассады Яном Витеком. Приемство было дружественне, но при том порушаны грунтовно всі проблемы нашого народа в краю. С того часу Комитет Релифа был связаный с представителями Польского правительства, через што были установлены многы посунения для розрішения спорных вопросов. Доподненый программом приємлемей для обох сторон, Меморандум, был приготовленый для личной переданы Предсідателем Релифа Польскому Правительству в Варшаві, для якой ціли при конци Октября місяца Предсідатель Лемковского Релифового Комитета Петро Гардый вылетіл в Варшаву. Если наш лемковский народ получит облегчения, або добьеся большых успіхов, то лем завдякы той программі и діятельности Лемковского Релифового Комитета, пок. Дру. Пыжу и Лемко-Союзу, через котрый выплыл и сам меморандум.

Похороны пок. Д-ра Пыжа отбылися в субботу 15-го июня, из головной гали Карпаторусского Центра в Юнкере при источении свыше тысяча участников и с близка и с далекых частей Соєдиненных Штатов. Похоронны служения совершал заступник Московского Патриарха в Америкі Русский Православный Архиеписком Дионисий из Нью Йорка с соном свого духовенства и катедральным хором. Тіло покойного отдано землі на кладбищі Окланд в Юнкере, Н. Й., на горкі, не далеко от Народного Центра, в котром он трудился за послідных 19 літ.

В газеті “Карпатска Русь”, котрой он был редактором, лем за первых четыре місяцы, было поміщено соткы соболізнований из всіх концов земной кулі, што єсть доказом незмірно широкого уважения к нему, за його характерь, науку и преданность свому народу. Перву организованну честь його памяти отдали делегаты 19 головного Съізда Лемко-Союза в неділю дня 1-го сентября 1957 року своим массовым шествием на могилу, где были возложены снопкы живых цвітов.

Историю свого замічательного житья Др. Пыж написал в циклі статей, поміщаных в, календарях Лемко-Союза, почавше с 1952 року под заглавием “Горлицкий Бурсак”. В тых статьях он стиг написати лем перву половину свого житья, свою молодость до дня свого выізду в Америку. Другу часть свойой истории, в котрой он объяснил бы свою встрічу с своими родаками и краянами в Америкі, якыми он их застал, якы они организации мали и як началося народно-организацийне лемковске движение, кто приятель, а кто враг нашому народу, он не стиг докончити. Тоту другу часть його истории буде писати наша емиграция своими воспоминаниями о його діятельности. Она напише тоту историю славно о нем своими ділами, єсли буде поступати по його указаниям, жити и трудитися согласно його программы. Он пал, штобы на його памяти, як на крепкой основі будувати и творити народну организацию, розвивати борьбу за тоту свободу для лемковского народа, за котру он боролся. Память о нем най буде неисчерпаемым жерелом, котрого приміром должны жывитися моральны силы нашого народа в старом краю и потомкы лемковскых емигрантов в Америкі.

Найвысша слава його памяти буде отдана не торжествами в його честь, не памятниками на його могилі, не изданием творов його пера, не именуванием його организаций, або институций, а выполнением його программы.

Свобода и добробыт лемковского народа сдобыта в борьбі на основании його программы, то найдостойнійше почтение його славной памяти.