Направду дивно стелятся дорогы в людском житью. Бывают люде широко извістны по своим знаниям, высоко школувакы, но коли провірите ближе их житье, то не найдете в нем ничого дуже дивного. Многы из такых людей прожили ціле житье без особливых пригод, а што больше, они не зазнали, што то єсть глубокий смуток, або велика радость.

А знов в другом случаю, бывают люде, здаєся — совсім незамічательны, а єднак их житья переполнена дивных сцен. Такы люде знают много и суть в стані перенести много. Вот, напримір, и звычайна лемковска жена Параска Завойска. Она може вам росповісти о многых житьовых пригодах и переживаниях, котры єй пришлося перенести в свойом житью. И она то всьо перенесла и всьо добре и зле пережила, и с радостном теперь смотрится на світ, радуєся своим счастьом.

Остатныма часами єй захватила война, одорвала єй от дітей и мужа, а потом переселили єй в Советский Союз, откаль, здавалося, уж не буде єй выходу, и она на свою старость остане сама без дітей, котры в Америкі заживают весело и заможно. Но судьба єй приняла неимовірный оборот и несподіванно она нашлася меже своими дітьми на свою и их радость. А то пішло так:

Рано, вдень открытия Лемковского Съізда в Юнкере, Н. Й., дня 31 августа 1957 р. ньюйоркске радио начало передавати новость, што зять и донька Теодор и Мария Рудавскы из Елизабет, Н. Дж., ожидают свойой мамы Параскы Завойской, котра должна прилетіти аеропланом из-за “желізной куртины” Совітского Союза из села Воронякы, Львовской области, на постоянне жительство в Соєдиненны Штаты. И так, вокруг приізда в Соєдиненны Штаты звычайной, мало-письменной лемковской жены, тут была створена така атмосфера, як бы в Америку приізжала не жена, а даяка важна загранична делегация.

Наш Лемковский Съізд лем настолько был взрушеный том новином, што там меже урядниками Съізда находился представитель член Центрального Комитета Л. С. Теодор Рудавский, зять Параскы Завойской, котрый телеграфично был повідомленный о приізді мамы свойой жены Третього дня засіданий Съізда он уж не мог явитися на заісдание, бо хотіл разом с ділом родином втрітити свою тестью, сходящу из аероплана, прилетівшого на Айдевайлд аеропорті в Лонг Айленд, Н. Й.

От часу получения Теодором Рудавскым телеграммы, його дом в Линден, Н. Дж., был окруженый корреспондентами, котры затігали всякы информации приізда и в ожидании не отступали от дома. На аеродромі встрітили Параску: донька Мария и зять Теодор Рудавский, донька Анна и сын Иван с внуками. (Третья дочка не была присутна, бо жиє в Калифорнии). Кромі того збіглися вокруг корреспонденты американскых газет, фотографы, телевизоры, котры в тоту минуту передали прилет и встрічу Параскы Завойской по телевизии. Слідуючого дня фотографии встрічы и истории были поміщены в многых газетах, а меже ними и в ньюйоркской “Дейли Ньюз”, найбольше поширеной в Америкі газеты.

Зять Теодор Рудавский передал нам информаци истории повороту Параскы Завойской в США:

2-го сентября сего року прибыла на аероплані с Москвы до Нью Йорку наша лемкиня Параска Завойска. Она єсть родна мати членкині Лемко-Союза Марии Рудавской в Линден, Н. Дж. Параска Завойска, 63-літна женщина, перший раз приіхала тут до Америкы в 1910 року, а в 1921 вернулася с четверыма дітьми до старого краю на Лемковщину до села Липовец, повіт Сянок.

Діти, як уроженці Америкы, не мали трудности достатися ту назад. В 1936 року сын Иван с свойом сестром Анком пришли образно в Америку. Слідуючого року 1937 вернуло другых двоє дітей, а то Мария и Нацка, а мати надальше осталася в краю. В 1939 року сын Иван приготовил уж всьо потрібне для спровадженья мамы в Америку. Бракувало лем два тыждни до чекання на выізд мамы, а ту німец напал на Польшу и всі планы того старания были даремны. В 1945 року, як большинство нашого народа, так само и Параска Завойска, была переселена до Совітского Союза до Львовской области, села Воронякы.

Рок тому назад в маю місяци дочка Мария, по мужу Рудавска, постановила выбрати папери с надійом достати маму ку собі. И то сполнилося. Першого июня с. р. пришло повідомление от американского Консула, же мама достала русский пашпорт на выізд до Америкы, лем ище потребно аффидавиту и уплачения подорожы. Так и то всьо выполнено, як найскорше и выслано до Москвы, и выкуплено билет на аеорплан из Москвы до Нью Йорку. Воздушна компания должна была закятися доставком билета на час.

Коли на позов мама пришла до Москвы достати американске визо и другы потребны папери, показалося, же консуль не отримал ище билета подорожи. Мама чекала в Москві єден тыждень, а билета ніт. Послі того консул сказал, же она може собі сама купити билет на аероплана, єсли ей стати на то. Так она и зробила. Выкупила собі билет сама за 2,575 рублей (поверх 600 долл.) и пришла до Нью Йорку сентября 2-го на сам “Лейбор Дей”, 1957 року, первом классом.

Не всьо, што сказала Параска Завойска о Совітском Союзі любилося американекым корреспондентам и они не могли всьо то написати, а особливо то, же житье в Совітском Союзі все иде до ліпшого, лем абы войны не было. Тото, што найгірше было в часі войны и послі войны, треба забыти, бо житья начинат поправлятися, то треба стремити всім до той поправы.

Параска Завойска счастлива теперь среди своих власных дітей, котры дают єй материнску опіку. В Америкі Параска Завойска, окріпивши духом, покрасіла на лици, повеселіла, и часто ей теперь встрічаме на лемковекых кермешах и забавах.

Єй теперь самой дивно, же як то судьба Человіку може смінитися.