Парадный шпорт Ваньо Пепериця проходится, натягненый, як струна, по парку з нареченом. Несподівано начало кропити дождьом.

— Отвор парасолю, — гварит наречена.

— Та кедь она дірава.

— Так по што ты ей брал зо собом, як дірава?

— А як я мог знати, же буде дождь?

ОН: — Як ты другого полюбиш, то я убью тебе, а потім себе.

ОНА: — А може ты, мой милый, зачал бы от себе.

Священник при конци погребения: — Жена покойного запра- ідат всіх присутных на приготовлену послі погребения трапезу...

ПИРУСТНЫЙ: — О я уж теперь застарый на “трапезы” ходити. Най идут молоды, я ся уж дост натрапил.

СЫН: — Няню, чом то так єсть, же в дакотрых державах цисарь може засісти на трон, як ма 18 роков, а не може женитися, аж як ма 24 рокы?

ОТЕЦ: — Бо, видиш, сыну, лекше управляти цілом державом, як одном женом.

— Кілько фляшок пива можете выпити за єден вечер?

— Звычайно — дві, по доброй вечери — три, на пикнику в горячий день — штыри, а як дакто фундує, то и десять.

УЧИТЕЛЬ: — Ванцю, повіч мі, што было перед сотворенном світа?

ВАНЦЬО: — Пане учитель, я не знам, бо я ище тогды не ходил до школы.

СУДЬЯ: — Вы славно пописалися, миссис, же сте затримали того рабуся, але ци сте мусіли го аж так не полюдски сбити?

— Пане судья! Як же я могла знати, же я бью злодія, як я цілу ночь чатувала на свого мужа.

1-ый Лемко: — Гей, газдо! Та где тота дорога иде?

2-ий Лемко: — Та не иде нигде. Отколи ем ся родил, та тота дорога ту была, ту єсть и ту буде. Мы оба помреме, а она ту остане и нигде не піде.

На торговици в Устью Русском. Два мясаре — тлустый стародавный, а худый — теперішный. Бесідуют о давных часах и предвіщуют новы.

ЧМУЛЬ до ГРИЦА: — Знате, што, Грицу? В тых яйцях, што вы мі продали самы курчата были.

ГРИЦ: — А што ты хотіл, Чмулю, жебы в них были телята?

Продал газда гандлярови сухого коня, же го поправит и заробит на ним. О місяц приходит гандляр на каянку до газды:

ГАНДЛЯР: — Знате, што пане Новак? Тот конь, пребачте, што вы мі го продали — здох!

НОВАК: — Барз мі дивно с того. Он николи в мене того не зробил.

ВАНЬО до ЖЕНЫ: — А кілько думаш, было перогов на той мискі?

ЖЕНА: — Веце, як пятьдесять.

МУЖ: — Ци ты знаш, же я поіл всі, лем два ся остали?

ЖЕНА: — А што с тыма двома, — не смакували?

МУЖ: — Смакували, але я не хотіл таку пажерну свинью зо себе зробити.

Перевозил газда товар на возі єдным коньом и стал при корчмі напоити го. Там коло мура стояла коновка наполнена горілком. Газда подумал, што то вода, дал коньови напитися. Конь был жаждущий, вштурил голову до коновкы и выпорожнил горілку. О впол годины конь упал на землю и лежит, як бы здохлый. Цигане пришли, же будут сдерати скору и зачинают от хвоста. Коли конь порозуміл, же пришли по його скору, скочил на ногы и начал танцувати. Цигане с великого страху утекли зо села и цілый тыждень их никто не виділ.