Єсли Вы хочете видіти чудо и нич не платити,
То Вам теперь в октябрі треба до ліса ходити.
Там найдете тілько дива и тілько красоты,
Што и дому вертати не буде охоты.
Там природа снимат с себе одежу літову — зелену,
А накладат, заміст ней, осенню, багряно-червену.
Бо то всьо ся на світі смінят, законы и обликы,
Все приходят иншы образы и чуда великы.
Літом лісы густыма корчами ся обгородили,
А теперь, як цирк готовый, стежкы отворили.
Штыри місяці солнце там било своими лучами
И приготовило Вам арену с прелестыма сценами.
Зараз золоты листы на земли Вы мусите замітити,
И то така яворова непонятна красота, гріх по ней ходити.
И сейчас Вас там опьянят всевозможны аромы,
Очы Ваты притягнут до себе высочавы стромы.
За корчами стоит серна — тихо, як замліла —
Вы ей долго не виділи, але она Вас виділа.
Бо Вы влізли до ей хаты, так позазерати,
И она тоже мудрыма очами хоче Вас познати.
Вы бы єй хотіли погладити, може и кормити,
Але ей мама выучила и Вам не вірити.
Цвіты при корчах со споду жовты, верхом ще червены —
Солнечко ще на них зазерат — там с помедже клены.
Долиньками травка ще зелена, аж милости просит —
Певно она добрі знає, же єй мороз скосит.
В лісі єсть чаруюча відьгіт и свята тишина,
Листы плынут тихо с верхів на землю, кладутся перед очами Вашыма.
Птахы с дерева на дерево тихо, як тіни, літают,
Бо тут великы акторы грают ролю, то они их не нарушают.
И Вы нараз и радуєтеся и хочете плакати,
Бо Вы знате, же всьо то скоро буде умерати.
Так Вы лізете потихоньку и пришли до поляны,
И тут перед Вами чудо — стоите, як пьяны.
Тут дуб, як стожок на горбку стоит розшыреный —
С ног аж до самой головы бронзово-буравым плащом крепко обгорненый.
Но теперь Вы потихоньку дошли до потока,
А там вода, майже спьяча, плыне не широка.
Вы выходите с ліса крайом при убочы,
А там ряды живых ище цвітов на Вас выстріщили очы.
Вы уж теперь утомлены, хочете дома быти —
А якась непонятна сила Вам каже до ліса вернути.

А. Белоглав,
Шелтон, Конн.