Андрей Дзямба родился 30 мая 1887 року в селі Ждинья, горлицкого повіта на Лемковині. Його жена Анна родилася в марті 1889 року, в селі Гладышов, того самого повіта, по родичах Матвия и Марты Мадзуля. До Америки прибыли обоє в єдном 1904 року, в город Юнкере, Н. Й., где працували, позналися и в 1907 року поженилися. Вінчал их священник о. Добротвор. До Стамфорд пришли в 1912 року и разом з Андрейом Френцко взялися за бизнес, гросерню и бучерню, а потом отворили гостинницю. Маєток розвивался дуже добре. В их гостинници лемкы, котры приходили до Стамфорд, встрічалися и помагали собі получыти роботу. Андрей Френцко ище помагал нашым лемкам доставати граждански папери, ходил за свідка и так помагали собі чым могли.

Коли в Америкі была затягнена прогибиция, Андрей Дзямба вышол на свою фарму, котру купил перед тым, побудувал галю до танцу и другы будинкы, якы потребны до бизнесу на пикнику и с того часу кажде літо на його фармі отбываются пикникы ріж-ных народностей и ріжных парафий и клубов. Аж и славне Лемковске Русаля там отбывался пару раз.

Дзямбы выховали 5 дітей: двох сынов и три дочкы, и теперь у них 5 внуков. Діти всі школены, роблят по офисах, але люблят своих родичов и 1-го сентября минувшого року устроили для них Золоте Весіля в гали свойой пикниковой полянкі, где зышлися многы краяне и теперішны сусіде и весело отмітили тот почетный праздник своих дорогых родичей.