До войны не многым людям за границами Совітского Союза было ясно, чом совітскы люде, соткы миллионов жителей той державы так величают и славят Сталина. И не дивно. За границами Совітского Союза мало людей знало, што зробил для той державы Сталин, што то под його мудрым руководством стара Россия перетворювалася и перетворилася в модерну народну индустриальну державу с индустриальным механизованым земледілием, в перву социалистичну державу світа — непобідиму народну державу.

Генералиссимус И. В. СТАЛИН

Як под руководством гениального революционера и великого ученого В. И. Ленина была проведена Велика русска народна революция и был выробленый великий план будовы социалистичной державы, так под руководством гениального Й. В. Сталина была тота народна социалистична революция оборонена пред єй сильными врагами, и тот великий план социалистичной будовы проведеный.

До совітско-німецкой войны многым за границами Совітского Союза не могла быти ясном робота и гениальность Сталина, тым больше, што врагы народа старалися всякыми способами очернити тоту перву в світі социалистичну державу и єй руководителей. А што головным руководителем той первой социалистичной державы был Сталин, то они старалися чернити найбольше його. Треба было быти свідомым роботником, такым, штобы роспознати меж приятелями народа його врагов, хоц як бы они скрывалися, штобы не поддатися пропаганді против той первой социалистичной державы.

Но минувша война против гитлеровской Германии и самурайской Японии, война против вооруженного до зубов світового фашизма выявила світу велику силу первой народной, социалистичной державы и гениальность Сталина, не лем як будовничого той державы, но и як гениального воєнного организатора, стратега и полководца. То Сталин, як Главонокомандующий Красной Армии и глава совітской державы организувал величайшу побіду, яку знала история, то он выробил стратегичный план розгрома німецкой воєнной машины на русскых землях, той воєнной машины, яка уходила за непобідиму в цілом світі до єй розгрома Красном Армиом под Москвом и Сталинградом.

Так што днеска уж каждый знає, кто такий Сталин на самперед для Совітского Союза, а затым для цілого світа. Днеска уж каждый знає, чом народы Совітского Союза так величали и славили Сталина до войны, величали и славили в часі войны, величают и славят послі найбольшой воєнной побіды, яку даколи знала история.

И тот великий чоловік не походит из даякого “избранного” народа, из “высшой” расы, яком хвалятся німцы. Ани он не походит с “высшого” класса, зо шляхты, яка хвалится своим “шляхетскым” происхождением и требує для себе специальных привилегий. Сталин сын малого народа и сын бідного ремесленника и селянкы, а належит до найбольшых людей в истории.

СТАЛИН (Джугашвили), Йосиф Виссарионович, родился 21 декабря 1879 року в городі Гори, Тифлисской губернии. Отец його — Виссарион Иванович Джугашвили, по национальности грузин, походил с селянской родины села Диди-Лило, Тифлисской Губернии, по профессии швец, потом роботник обувной фабрикы Адельханова в Тифлисі. Мати — Екатерина Георгиевна Джугашвили — из родины панщизняного селянина Геладзе села Гамбуареули.

Осенью 1888 року Сталин поступил в Горийске духовне училище. В 1894 року Сталин покончил училище и поступил того самого року в Тифлисску духовну семинарию.

В России в тоты рокы на грунті розвития промышленного капитализма и роста робочого руху почала ширитися наука Карла Маркса, звана марксизмом. Створеный и руководимый Лениным петербурский “Союз борьбы за освобождение робочого класса” усилил розвитие социал-демократичного руху по цілой краині. Фали робочого руху докотилися и до Закавказья, куды уж проник капитализм, где сильный был национально-колониальный гнет. При конці XIX столітия капитализм почал быстро розвиватися в Закавказі, експлоатуючи робочых и селян, и угнетаючи национальности. Особливо быстро розвивалася на Кавказі добыча нафты, где основны позиции захопил заграничный капитал. С появлением желізных дорог и первых фабрик и заводов на Кавказі появился и робочий класс. Особливо быстро розвился город Баку, як центр нафтяной промышленности и робочий центр на Кавказі.

Розвитию промышленного капитализма товаришил рост робочого руху. Тифлисска духовна семинария была тогды россадником всякого рода освободительных идей среди молодежи. Пануючий в семинарии єзуитский режим вызывал у Сталина бурный протест и усилювал в нем революцийный дух. Пятнадцетрочный Сталин стає революционером.

В 1896-97 роках Сталин стоит на челі марксистскых кружков семинарии. В августі 1898 он и формально вступат в тифлисску организацию Российской социал-демократичной партии. Сталин много и упорно працує над собом. Он читат и выучує творы Маркса и Енгельса, знакомится с творами Ленина. Уж тогды Сталин почал высоко цінити Ленина, знаючи го лем по його творах. Разом с працом над своим образованием, Сталин веде организацийну и просвітну роботу в робочых кружках, бере участь в нелегальных робочых митингах, пише летучкы, организує страйкы. То была перва школа революцийной практичной роботы.

В семинарии починают догадуватися о нелегальной революцийной роботі Сталина. 29 мая 1899 його исключают из семинарии за пропаганду марксизма. Даякий час Сталин жиє из лекций, а потом поступат на роботу в Тифлисску физичну обсерваторию, но ни на хвильку не перестає революцийной роботы.

Уж в тоты часы Сталин — один йз самых енергичных и вызначных роботников тифлисской социал-демократичной организации.

Коли в декабрі 1900 року почала виходити ленинска “Искра”, Сталин цілком стал на єй позиции. Сталин дораз увиділ в Ленині творца правдивой марксистской партии, вождя и учителя.

“Знакомство с революцийной діятельностью Ленина с конца 90-х роков и особливо послі 1901 року, послі издания “Искры”, — говорит Сталин, — привело мене до переконания, што мы маме в особі Ленина чоловіка незвычайного. Он не был тогды в моих очах простым руководителем партии, он был єй фактичным творцом, бо он один понимал внутренню сущность и неотложны нужды нашой партии. Коли я зровнувал його с остальными руководителями нашой партии, мі цілый час здавалося, што соратникы Ленина — Плеханов, Мартов, Аксельрод и другы — стоят ниже Ленина на цілу голову, што Ленин в поровнанию с ними не просто один из руководителей, а руководитель высшого типа, горный орел, не знаючий страха в борьбі и сміло ведущий вперед партию по незбаданным путям русского революцийного руху.”

Сталин проникся безграничном віром в ленинский революцийный гений и пошол по пути Ленина. Он николи не скручувал с того пути, а послі смерти Ленина сміло и увіренно продолжат його діло.

Пришол економичный кризис. На Кавказі, под вплывом робочого руху в России и роботы социал-демократов в Тифлисі в 1900-1901 роках нарастат фаля економичных страйков, якы охоплюют одно предприятие за другым. В августі 1900 р. почался великий страйк робочых желізнодорожных варстатов и депо. В том страйку активну участь принимат высланный из Петербурга на Кавказ М. И. Калинин. 22 апріля 1901 р. в центрі Тифлиса организуєся первомайска демонстрация. Сталин — организатор и руководитель той демонстрации. Тоту демонстрацию ленинска “Искра” оцінила як событие историчне для всего Кавказа.

Настрашене ростом революцийной борьбы закавказскых робочых, царске правительство усилює переслідувания, рахуючи такым способом згнести робочий рух. В ночи 22 марта 1901 року полиция зробила ревизию в физичной обсерватории, где жил и працувал Сталин и занесла го в свой список, як небеспечного. Так што он мушеный был працувати дальше як подпольный революционер аж до февральской революции 1917.

С сентября 1901 року почала выходити нелегально перва робоча газета на Кавказі на грузинском языкі под назвом “Брдзола” (“Борьба”), котра проводила идеи ленинской “Искры”. Одним из основателей и сотрудников той газеты был молодый Сталин. Того самого року 11 ноября отбылася конференция тифлисской социал-демократичной организации, на котрой был выбраный Тифлисский комитет РСДРП (Русской Социал-Демократичной Роб. Партии). В комитет вошол Сталин. Комитет высылат го на роботу в Батум, третий по величині робочий центр на Кавказі. Там Сталин организує робочых, руководит их борьбом на заводах Ротшильда и Манташева, организує революцийну пропаганду на селі. Сталин основує в Батумі социал-демократичну организацию, основує Батумский комитет РСДРП. 9 марта 1902 року Сталин организувал знану политичну демонстрацию батумскых робочых. Послі той демонстрации Сталина арестуют, за даякий час держат в тюрьмі, а в ноябрі 1903 року высылают на три рокы в Восточну Сибирь, в Иркутску губернию, в село Нова Уда. Но там Сталин остаєся недолго, бо уж на третий місяц біжит и прибыват знов на Кавказ.

За тот час, за який Сталин пробывал в тюрьмі и в Сибири, отбылся II съізд РСДРП, котрый принял революцийну программу Ленина. Но против Ленина и його программы выступают меньшевикы внутри в партии, так што Ленин видит выход в созыві ІІІ съізда, який бы покончил с вредном роботом меньшевиков. Борьба за съізд стала тепер головном задачом большевиков.

Вірном опором Ленина в той борьбі на Кавказі был Сталин, котрый стоял на челі закавказскых большевиков. Он объізжат Кавказ, укріплят стары и основує новы партийны организации. В тот сам час Сталин организує страйк бакинскых робочых (13 до 31 декабря 1904), який закончился заключением первого в истории робочого руху России коллективного договора с нафто-промышленниками. Тота побіда робочых на Кавказі мала великий вплыв на робочий рух в России.

Сталин не лем организувал робочых, он был их учителем, редактором, писателем. Организация створила свою подпольну типографию в Тифлисі, где печаталися роботы Ленина, як “Революцийна демократична диктатура пролетариата и селянства”, “До сельской бідноты”, як также брошюры Сталина, листовкы, газеты “Борьба пролетариата” и “Листок борьбы пролетариата”. Редактором “Борьбы пролетариата” был Сталин. В своих творах и статьях Сталин показал незвычайный талант.

В декабрі 1905 року Сталин іде як делегат от закавказскых большевиков на перву Всероссийску конференцию в Таммерфорсі (Финляндия). На той конференции первый раз встрітилися лично Ленин и Сталин. На слідуючий рок Сталин активный участник IV съізда РСДРП (Стокгольм, апріль 1906), где разом с Лениным отстоювал против меньшевиков большевистску линию в революции.

В апрілі-маі 1907 року отбылся V (Лондонский) съізд РСДРП, який закріпил побіду большевиков над меньшевиками. Сталин — активный участник съізда. Вернувшися послі съізда, он публикує справоздание о його роботах — “Записки делегата”, в котрых дал оцінку рішений съізда, защитил большевистскы идейны и тактичны позиции, роскрыл буржуазну линию меньшевиков в революции и их ликвидаторство в отношению партии, показал классову природу меньшевизма, як дробнобуржуазного политичного руху.

Перва русска революция (1905) окончилася поражком. Меж концом первой и початком другой революции прошло 10 літ, за час котрых большевикы героично, самопосвятно и упорно организували массы, выховували их в революцийном духі, ковали грядучу побіду революции.

Для Ленина и Сталина то были роки непримиримой борьбы за сохранение и укріпление революцийной партии, за проведение большевистской линии в новой обстановкі, рокы напруженной роботы и упорной борьбы с царском полициом. Царизм чувствувал, што в особі Сталина он має діло с великым революцийным діятелем, и всякыми способами хотіл позбавити Сталина можности вести революцийну роботу. Аресты, тюрьмы и ссылка в Сибирь слідували одно за другым. С 1902 до 1913 року Сталин был арестуваный осем раз. Не успівали царскы слугы водворити Сталина в нове місце ссылки, як он знов біжит и знов на “волі” кує революцийну енергию масс. Лем из послідной ссылки освободила Сталина февральска революция 1917 року.

В апрілі 1917 року, послі долгого выгнания, вернулся в Россию Ленин. Вість о приізді любимого вождя революции была встрічена русскыми робочыми с великом радостьом. Навстрічу Ленину, на станцию Белоостров выіхал Сталин с делегациом робочых. Встріча Ленина на Финляндской желізнодорожной станции была могучом революцийном демонстрациом. На другий день послі приізда Ленин выступил зо своим гениальным планом борьбы за переход от буржуазно-демократичной революции до революции социалистичной. Тезисы Ленина дали партии нову ориентировку в новых условиях борьбы послі скинения царизма. 24 апріля 1917 року открылася VII конференция большевиков, в основу робот котрой вошли ленинскы тезисы. Апрільска конференция повела партию на борьбу за переростание буржуазино-демократичной революции в социалистичну.

На конференции Сталин, отстоюючи линию Ленина, дал рішительный отпор скрытым защитникам капитализма Каменеву и Рыкову. Сталин выступил на конференции с докладом по национальному вопросу. Розвиваючи марксистско-ленинску линию в национальном вопросі, Сталин обосновал большевистску национальну политику, отстоювал право наций на самоопреділение и творение самостоятельных держав. Ленинско-сталинска национальна политика обеспечила партии поддержку угнетенных национальностей в Великой Октябрьской социалистичной революции.

В маю 1917 року, послі конференции, творится Политбюро ЦК. Сталин выбраный як його член. С того часу до днешного дня Сталин незмінно выбератся членом Политбюро ЦК. Партия, на основі рішений Апрільской конференции, розвиват огромну роботу по завоюванию масс, по бойовому их воспитанию и организации.

В тот трудный период революции, коли события стремительно шли вперед, требуючи от партии мудрой тактикы, Ленин разом зо Сталиным руководит борьбом масс.

Ленин и Сталин сміло и увіренно, твердо и осмотрительно вели партию и робочий класс на социалистичну революцию, на вооружене восстание. Ленин и Сталин — вдохновители и организаторы побіды Великой Октябрьской Социалистичной революции. Сталин — найблизший помочник Ленина. Он беспосередно руководит всім ділом подготовкы повстания. Сталин вызыват к собі представителей районных и областных организаций и дає им инструкции и бойовы задачы. 16 (29) апріля Центральный Комитет избрал Партийный центр для руководства повстанием на челі зо Сталиным. Под руководством Сталина выраблятся план повстания и намічатся самый термин. Вчас рано 24 октября Керенский выдал приказ закрыти центральный орган партии “Рабочий путь” и послал броневикы ку поміщению редакции и типографии “Робочого пути”. Но до 10 годины рано по указанию Сталина красногвардейцы и революцийны солдаты оттіснили броневикы и установили охрану у типографии и редакции. До 11 годины вышол “Робочий путь” с написаном Сталиным передовом статьом “Что нам нужно”, яка звала массы скинути буржуазне Тымчасове правительство. Одночасно, по указанию Партийного центра, были подтянуты ку Смольному отряды революцийных солдатов и красногвардейцов. Повстание почалося и побідило в тот сам день. Вечером 25 октября открылся II съізд Совітов, передавший всю власть Совітам.

Сталин вошол в первый Совіт народных комиссаров, выбраный на челі с Лениным послі побіды Октябрьской революции на II Всероссийском съізді Совітов.

С первых дней истнования Совітского правительства и до 1923 року Сталин — народный комиссар по ділам национальностей. Он беспосередно руководил цілом роботом партии и Совітской власти в ділі розрішения национального вопроса в СССР. Он написал историчну “Декларацию прав народов России”, яка проголосила нову еру о взаимных отношениях меж народами: на зміну отношениям панования и подчинения, гнета и насилия пришла ровность, братске довірие и дружба меж народами СССР. Под руководством Ленина и Сталина робочы и селяне на місці царскых колоний створили свободны и квітучы Совітскы республикы. Ніт ни одной совітской республикы, в организации котрой Сталин не принимал бы активного и руководячого участия. Сталин руководит борьбом за Украинску совітску республику, руководит ділом створения Білорусской республикы и Совітскых республик в Закавказі и Средной Азии, помагат многочисленным национальностям Совітской краины строити свои автономны совітскы республикы и области. Ленин и Сталин — вдохновители, организаторы и творцы великого Совітского Союза.

Скинены Русском социалистичном революциом российскы поміщикы и капиталисты почали сговорюватися с капиталистами другых краин о организации воєнной интервенции против краины Совітов. Они поставили собі за ціль розгромити робочых и селян, скинути Совітску власть и поневолити знов Россию. Почалася гражданска война и интервенция. Совітске правительство объявило социалистичне отечество в опасности и призвало весь народ до борьбы. Партия большевиков подняла робочых и селян на отечественну войну против заграничных наіздников и білогвардейцов.

Весном 1918 року англо-французскы империалисты организували бунт корпуса чехословаков, формуваных из воєнноплінных австро-венгерской армии. Выступление чехословаков, высадка английского десанта в Мурманскі — розвязали всі силы контрреволюции. Бунт чехословаков мал місце в критичный момент. Краина лем што вырвалася с тисков империалистичной войны. Господарка капиталистов и поміщиков довела краину до катастрофы. Робочы столиц получали не больше як осму часть фунта хліба в день. Республика была отрізана от украинского и сибирского хліба. Оставалася лем одна область, откаль мож было достати хліб, т. є. Поволжский край и Сіверный Кавказ, дорога от котрых провадила через Царицын (днеска Сталинград). Спасти революцию мож было лем добывши хліб. Сталин был командированый Центральным Комитетом партии на юг с надзвычайными правами руководителя живности на югі России.

6 юня 1918 року Сталин с отрядом робочых прибыл в Царицын. Соєдинение в одной особі прозорливости политичного вождя и таланта полководца позволило Сталину розгадати роль Царицына, як місца головного удара зо стороны контрреволюции. Взятие Царицына отрізало бы республику от послідных хлібных ресурсов, от бакинской нафты, позволяючи білым объєдинити донску контрреволюцию с чехословацком и спольным фронтом идти на Москву. Треба было за всяку ціну удержати Царицын. Очистивши желізном руком город от врагов революции, добывши и пославши в голодаючы столицы значну сколькость живности, Сталин занялся обороном Царицына. Беспощадно ломаючи опор контрреволюцийных специалистов, присланных и поддержуванных Троцкым, Сталин быстрыми и рішительными мірами реорганизувал розлюзьнены отряды, ускорил прибытие отрядов Ворошилова, якы стали ядром наново сформуваной X армии. Желізна воля и гениальна прозорливость Сталина отстояли Царицын, не дали білым прорватися в Москву.

30 ноября 1918 року был утвореный Совіт робочой и селянской обороны на челі с Лениным для руководства цілом роботом обороны на фронті и в тылу, мобилизации промышленности и транспорта, мобилизации всіх ресурсов краины. Представителем от ВЦИК в Совіт обороны был выбраный Сталин, який стал фактично заступником Ленина.

При конці 1918 року зо стороны Сибири наступал Колчак, штобы соєдинитися с английскыми войсками, якы наступали с сівера. Для задержания был посланый Сталин, котрый быстро восстановил положение на востокі. Красны войска почали громити Колчака, отрізаного от союзников и на югі и на сівері.

В маі 1919 року почал наступ на Петроград генерал Юденич, поддержанный английскым флотом. И на фронт Центральный Комитет послал Сталина. Он ликвидувал загрозу Петрограду.

Літом 1919 року Сталин працує на западном фронті, в Смоленскі, организуючи отпор полякам. Антанта, розбита в первом поході, предприняла другий поход, втянувши в него, кромі білых войск и своих отрядов, армии малых пограничных с Россиом держав, до котрых належала и Польша Пилсудского.

В тот сам час Деникин захватил Донбасс и вдерся широкым фронтом на Украину. Троцкий зрадничо розвалил роботу на южном фронті. И на тот фронт был посланый Сталин для организации побіды над Деникиным. Прогнавши зо штабов ставленников Троцкого и потребувавши невмішувания Троцкого в діла фронта, Сталин откинул преступный план прорыва деникинского фронта от Волгы на Новороссийск и выробил свой гениальный план борьбы, котрый предвиділ головный удар на Деникина через Харьков—Донбасс—Ростов, штобы россічи армию контрреволюции на дві части. Тот план обеспечивал быстре продвижение Красной Армии по району с робочыми центрами, где население ждало Красну армию, где была густійша сіть желізных дорог. Тот план освобождал разом с тым Донбасс, який обеспечувал краину топливом.

План Сталина припровадил до цілковитой поражкы Деникина.

Из той початковой биографии Сталина видиме, што уж тогды он показал свой огромный организаторский и воєнно-стратегичный талант. Заслугы Сталина на фронтах гражданской войны были зазначены по инициативі Ленина постановлением Всероссийского Центрального Исполнительного Комитета от 27 ноября 1919 року, в котром сказано:

“В минуту смертельной опасности, коли оточена зо всіх сторон тісным перстенем врагов, Совітска власть отбивала удары неприятеля; в минуту, коли врагы Робоче-Селянской Революции в юлі 1919 року подступали к Петрограду, в тот тяжкий для Совітской России час, назначенный Президиумом ВЦИК на бойовый пост Йосиф Виссарионович Джугашвили (Сталин) свойом енергиом и неутомимом роботом змог сплотити дрогнувшы ряды Красной Армии. Будучи сам в районі бойовой линии, он под бойовым огнем, личным приміром воодушевлял ряды борцов за Совітску Республику. В зазначение його заслуг по обороні Петрограда, а также самопосвятной його дальшой роботы на южном фронті, Всероссийский Центральный Комитет постановил наградити И. В. Джугашвили (Сталина) орденом “Красного Знамени”.

Творцом Красной армии — первой в світі Червеной армии, армии освобожденных робочых и селян, армии братства меж народами совітской краины, армии, выхованой в межнародном духі, — была партия большевиков на челі с Лениным и Сталиным. Ленин и Сталин беспосередно руководили ділом обороны краины разом с ліпшыми діятелями большевистской партии.

Беспосередным вдохновителем и организатором важнійшых побід Красной армии был Сталин. Имя Сталина связано зо самыми славными побідами Красной Армии за час гражданской войны и интервенции.

Діятельность Сталина мож поділити на три периоды: в революции, в будові социалистичной державы и в Отечественной войні.

Первый период революцийной діятельности Сталина представленный по “Краткой биографии” Сталина (1942 — ГОСПОЛИТИЗДАТ), из котрой выняты важнійшы діла и заслугы Сталина для великой революции и побіды над контрреволюциом и заграничными интервентами.

Но сама социалистична революция без перебудовы старой заотсталой краины в нову индустриальну державу не мала бы успіха. Тото знали Ленин и Сталин, и Ленин не раз говорил и писал, што для цілковитой побіды социалистичной революции стару Россию, яку перебрало совітске правительство, треба перетворити в перворядну индустриальну державу с социалистичном индустриом и социалистичным земледілием.

И в той именно перебудові державы — головна заслуга Сталина для Совітского Союза, так як по смерти Ленина (12 января, 1924 року), Сталин перебрал руководство в Совітской державі. Лем такий мудрый и твердый чоловік, як Сталин, лем чоловік, котрый тішился такым довірием народных масс, як предтым Ленин, мог перевести тоту гигантску роботу индустриализации и коллективизации, поборовши всіх врагов социалистичной будовы, внутренных и заграничных. Ленин и Сталин предвиділи воєнный напад капитализма на перву социалистичну державу, и знали, што єсли она не буде мати силы оборонитися, то буде знищена. Но без высокорозвитой индустрии держава не могла мати оборонной силы. То виділи лидеры первой социалистичной державы. И потому Сталин постановил приложити головну роботу для проведения индустриализации, для проведения головного плана индустриализации, котрый складался с пятилітных планов.

Завдяки проведению пятиліток, Совітский Союз стал сильном державом и змог розгромити фашистску воєнну машину, яка выбралася на завоювание Совітского Союза, поневоление не лем русского, но всіх совітскых, всіх славянскых народов, маючи в дальшом плані завоювание цілого світа и поневоление всіх народов. Завдяки твердости и вытревалости совітского народа и стратегичному гению Сталина, фашизм был розгромленный на русскых землях и його воєнна сила знищена в його берлогі, в Берлині.

Весь Совітский Союз знал гениальность Сталина, не лем як революционера, великого будовничого совітской державы и єй индустрии, но и як гениального полководца. И коли німецка воєнна машина напала на Совітский Союз, Сталин был назначеный Предсідателем державного комитета обороны, потом Главнокомандующым Вооруженных сил СССР. В 1943 року Сталин был назначеный Маршалом Совітского Союза, а в 1945 року Генералиссимусом.

6 ноября, 1945 року, Верховный Совіт СССР наградил Сталина орденом Суворова первой степени, за правильне руководство операциями Красной Армии в дни Отечественной войны.

Заслугы Сталина в Отечественной войні, його стратегичный гений, будут розберати будучи историкы и ставити го на первом місці, як воєнного гения в другой світовой войні. Як державный муж и ученый — Сталин, то Ленин сегодня.

Воєнна Рада в декабрі 1941, пред розгром ом німцов под Москвом. (Сталин и Жуков)