ИСТОРИЯ ЛЕМКОВСКОЙ ЕМИГРАЦИИ

Из восточных славян найскорше почали массово емигрувати в Америку лемкы, т. є. жители западной Карпатской Руси, галицкой Лемковщины и Пряшевщины. То лемкы дали початок численным грекокатолицкым и православным церквам, численным запомоговым братствам и центральным запомоговым организациям, из котрых єдны называются днеска русскыми, другы карпаторусскыми, третьи украинскыми. И то нич дивного, потому што лемкы из восточных славян пришли ту первы и отразу в великом числі. Пред первом світовом войном на галицкой Лемковщині и Пряшевщині в нашых русскых селах не было такой хижи, штобы дакто с ней не вышол в Америку. А было много такых хиж по нашых лемковскых селах, што вышли в Америку всі, и єсли не было кому жити в той хижі, то стояла пусто, с позабиваными дверми и окнами. Пред самом первом світовом войном половина лемков, а може больше, переселилася и жила в Америкі.

Но світ о том не знає, так як лемкы приходили ту под разными именами: то “австриякы”, то “венгры”, то “словакы” або “полякы”. И ту в Америкі лемкы поділилися помеж разны церкви и организации, так што их нигде не было, мимо того, што их ту была половина.

Послі первой світовой войны массова иммиграция в Америку была закрыта, так што и из лемков лем єдиницы могли достатися ту. И само собом розумієся, што число нашых старокрайовых людей ту в Америкі почало уменьшатися, разом с тым почало упадати число членов церковных и запомоговых организаций; аж приде такий час, што ту в Америкі не буде тых нашых организаций, бо нестане старокрайовых людей. Нове наше поколінне злієся с американскым народом и американскыми организациями.

Но емиграция нашого народа в Америку, то велике историчне событие в його житю, то цілый период його истории в Карпатах, и тот период истории житя нашого народа повинен быти зазначеный, описаный, иначе його история не буде полна. Так што нам треба написати историю лемковской емиграции. И откладати с том роботом немож, так як скоро, як вспомнено выше, нашых людей и организаций на емиграции нестане, а с тым нестане и жерел для описания житя нашой емиграции в Америкі.

Я думам, што днеска пришол послідний час, штобы створити Историю лемковской емиграции, бо в той роботі поможут днеска ище нашы люде, котры прожили сами ту долгы рокы и смотріли своими очами на наше житя в Америкі, належали до нашых организаций, организували их сами.

Так што я звертамся до читателей того календаря, штобы они помогли мі в той роботі, штобы описали всьо то, што они пережили ту на емиграции, описали тоты индустрии, в котрых нашы люде працуют на их плейзах, описали основание и розвитие нашых церковных и народных организаций в их місцевостях. Потребны фотографии из тых индустрий, в котрых нашы люде працуют. Такы фотографии мож достати от самых управителей индустрии — фабрик, заводов. Также потребны фотографии нашых церквей на плейзі и народных домов, єсли такы истнуют на плейзі.

Я надіюся объіхати дакотры нашы колонии спочатком нового року и собрати дашто материала сам, но неможливо объіхати всі колонии и собрати весь материал. Так што каждый може помочи, и чым больше нашых людей поможе в составлении такой Истории лемковской емиграции, тым она буде полнійша.

Отповідати головно на такы вопросы: “Коли нашы люде почали поселятися на вашом плейзі? Из якой околицы зо старого краю походят? В якой индустрии найбольше працуют? Якы церкви и организации основали? Сколько нашых людей жиє днеска в вашой місцевости? Сколько нашых людей в бизнесі? Сколько профессионалов, и т. д. По можности пришлийте фотографии вызначных индустриальных робочых нашого роду, ремесленников, бизнесменов и профессионалов, котры помагали и помагают свому родному народу. Всі такы информаций о вашой колонии просится посылати найдальше до 15 марта, 1946 року, на адрес: