В истории не было ище войны, котра бы зазначилася такыми страшными звірствами, якых допускалися в другой світовой войні німецкы фашисты над безборонным цивильным населением, стариками, женщинами и дітми, и безборонными воєнноплінными, попавшыми в их рукы. Лемкы, котры в минувшу світову войну были интернованы в Талергофском лагері коло Грацу в Стырии, а потом досталися ту в Америку, вспоминают тото лагер, як пекло на землі. Но Талергоф, при німецкых лагерях в другу світову войну, при Майданках, Освєнцимах, Дахау и десятках другых німецкых фабрик смерти, то ище правдивый курорт. В Талергофі німцы морили интернованых голодом, поширили меж ними тиф, но там не было техникы массового убийства, не было прирядов тортур, троков и камер для мордования газом, не было фабрик и форнесов для спалювания тіл, млинов для молотя людскых костей. Там німцы не садили капусту на полі, спрогноєном попелом из людскых тіл и молотыми людскыми костьми.

Всьо то робили німецкы фашисты в другой світовой войні в специальных фабриках смерти, збудуваных по послідному слову техникы для вынищения ненавистных им людей, особливо єврейов и славян.

До войны німцы хвалилися свойом найвысшом цивилизациом и называли себе творцами западной цивилизации, котру они збералися насадити на цілом востокі и на цілой кулі земной. Но єсли направду німцы представители западной цивилизации, то будь она проклята! На світі не было больше жестокого, звірского народа, як долго тот світ стоит, от німецкых фашистов в другу світову войну, в половині 20-го столітня по Христі.

С найбольше заілом встеклостьом німецкы фашисты вынищували славянске население на оккупованых ними славянскых землях. Они вынищили около 5 миллионов поляков, от 6 до 7 миллионов украинцов, около миллиона білоруссов, около полтора миллиона югославов, миллионы русскых, чехов и словаков.

Тоты німецкы фабрикы смерти и вынищение славянского населения на оккупованых німцами землях были роблены по обдуманому німецкому плану. Німцы захотіли панувати насамперед в Европі, а потом над цілым світом. Но на пути стали им численны, трудолюбивы и тверды славянскы народы. Штобы досягнути свою ціль, німцам треба было насамперед часть славян вынищити, а остальну часть поробити своими невольниками, робочым скотом на німецкых панов, німецку “высшу" расу.

Німецкы планы вынищения и поневоления славянскых народов провалилися, а с ними провалилася и Германия, єй воєнна сила. Но славянам треба розуміти, што приятели німцов, а врагы славян, не счезли с розгромом Германии. Они осталися, и они дуже сильны, и вплывовы на світову политику. Уж от днеска, тоты люде, люде той самой с німцами культуры, тоты самы, котры помагали німцам в их планах завоювания славянскых земель и поневоления славянскых народов, — почали отбудову німецкой воєнной силы для поновного нападу на славянскы земли.

Най-же для славянскых народов пережити ними страдания в другой світовой войні останутся вічном школом той правды, што лем их єдинство забеспечат их поколіния от новых німецкых фабрик смерти и цілковитого вынищения. Бо єсли німцы осмілилися напасти на славянскы земли, то лем завдяки тому, што славянскы народы были розъєдинены своими несовістными и продажными руководителями. И лем так славянам грозит даколи нова катастрофа зо запада, коли врагам славянскых народов удастся наново порознити славянскы народы, штобы сами меж собом билися для выгоды чужого империализма.

Дальше поміщаме официальне справоздание Совітской державной комиссии о німецкых звірствах в Львовской области. Най тото справоздание буде лекциом для нашого народа, як Майданек и Освєнцим для польского, а Лидице для чешского, што славянскым народам, штобы уникнути повторения того, треба строити свою будучность в славянском єдинстві.