Наука открыла в нашой землі солнечну силу — тепло, невыгасаючий огонь, який гріє солнце, силу, яка жене звізды. Тоту найбольшу природну силу открыто в земной материи, в єй атомах. О атомах мы слышали часто в бесіді, єсли кто хотіл поровнати найменьшу частку дачого, пожартувати над маленкостьом дачого, то жартом поровнувал тото с атомом.

Што єст атом?

Кажда земна материя дастся поділити на елементы. Елемент, то такий материал, што уж не дастся поділити дальше на елементы. Приміром, чисте золото, серебро, то елемент. Но елементы также складаются из маленькых частичок, котры мы уж не можеме видіти ни голым оком, ни через планный микроскоп. Атомы сут тяжшы и лекшы. Найтяжшы атомы має ураний, найлекшы газ гидроген.

Як маленький атом, то мож вносити о числа такых атомов в одной унции урания. Учены обрахували, што в одной унции урания находится около 100,000,000,000,000,000,000,000 атомов!

О атомі учены знали давно, но думали, што то послідня частичка материи, яка уж дальше неподільна. До войны, знаны французскы учены де Кюри, муж зо женом, котры открыли радий, зауважили, што атомы, радия дают енергию. Позднійше профессор Ейнштейн, знаный ученый, математик и физик, предсказал, што одного дня люде запряжут основну силу вселенной працувати на себе. Но над Ейнштейном сміялися реакцийны учены.

Но в 1939 року учены в своих лабораториях переконалися, што в атомі єст тота сила, тепло, енергия, о котрой говорит Ейнштейн. Они провадили свои исслідувания над атомом урания, як найтяжшым. Они переконалися, што атом, то не послідня, неподільна частка материи, а што атом складатся также из частичок — середнього ядра и електронов коло того ядра, и єсли отлучати от того ядра електроны и другы частичкы, то при том освобождатся енергия, котра держала тоты частичкы в купі. Так што учены почали бомбардувати атом и розбивати го и освобождати тоту силу для чоловіка.

Німецкы фашисты запрягли своих ученых в часі войны для открытия той страшной атомичной силы для ужитку в выбуховых материалах, для атомных бомб. Довідалися о том правительства демократичных держав и, по проекту покойного Президента Рузвельта, в Америкі были побудуваны специальны лаборатории и заводы коштом двох миллиардов долларов для роботы над открытием той атомной силы для воєнного ужитку против фашистскых держав.

В Америку приіхали тоты профессоры, котры працували даякий час в Германии, и або были німцами выкинены, як “не-арийцы”, т. є. “низшой” расы, або сами, не хотячи працувати для фашизма, выіхали тайно заграницу и приіхали в Америку. Ту они взялися до працы над атомом разом с американскыми учеными.

И ту, в США был открытый способ добывания атомной силы из одного елемента урания. Што тота сила была добыта, то уж знаме, бо она была вложена в тоты бомбы, из якых одна выбухла в пустыні в Нью Мексико, друга над японскым городом Гирошима, а третья над портом Нагасаки. Як описуют газеты, сила той атомной бомбы огромна.

Никто не знає, сколько ученым и инженерам удалося добыти той атомной енергии вынайденым ними способом. Но сами они признают, што выдобывание той силы тым способом, який они знают, дуже примитивне, так што тото выдобывание не оплачатся, лем для воєнного ужитку, для бомбы, а не для людского ужитку. Предповідают, што за пару десяток літ будут найдены другы способы выдобывания атомной силы, не лем с урания, но с другых материй, так як кажда материя має в собі атомну енергию, бо складатся из атомов.

С открытием атомной енергии починатся для людства нова ера и дуже счастлива ера, тота нова природна сила може претворити нашу Землю в правдивый рай, єсли чоловік дорос культурно, штобы контролювати тоту силу для ужитку людства.

Бо може быти и так, што открытие той новой силы може стати концом нашого світа, єсли чоловік окажеся замало розвитым культурно, абы контролювати тоту найбольшу природну силу.

Открытие и выдобывание атомной силы лем для нищительных атомных бомб — грозит людству войном и знищением. Мы часто читаме тепер, або слухаме по радио бесіды неотповідальных людей, котры грают том атомном бомбом и грозят ньом другым. Часто мож читати в поважных американскых газетах таку писанину, што раз США мают тепер тоту атомну бомбу, то мы можеме подиктовати цілому світу свою волю и свой порядок.

Який порядок тоты люде мают на мысли? Розумієся, што капиталистичный порядок, так як они ненавидят социализм. Мы всі памятаме выступление Черчилля спочатком августа 1945 в английском парламенті, коли он получил в свойой бесіді борьбу “с коммунизмом” с атомном бомбом. Мы памятаме заявление бывшого американского президента Гувера о борьбі против “коммунизма и социализма”, котры “вползают” в их капиталистичный порядок.

То люде, котры хотят новой войны, тым разом против нашого союзника Совітского Союза, потому што он являтся социалистичном державом и не признає у себе Черчилльового и Гуверового порядку — т. є. приватной власности на земны богатства на свойой землі.

Єсли бы тота атомна сила, атомна бомба нашлася в руках такых завзятых капиталистов, под их контрольом, то они не вагалися бы ни минуту, штобы закидати тоты державы, где при власти социалисты, тыми нищительными бомбами.

Бог сохранил нас, што німецкым фашистам не удалося вчас вынайти способ добывания атомной енергии для воєнного употребления, так як днеска цілый світ был бы в руинах, а над тыми руинами реготал бы страшный фашизм.

Мы боимеся, што тота атомна сила и способ єй добывания были завчасу вынайдены, коли людство ище не готово, культурно не розвито так, штобы єй приняти не для знищения, а для великой будовы и счастливого житя людей на нашой Землі.

Атомна сила може быти правдиво небесном, або дьявольском, пекольном силом. Зробити єй єдном або другом — в руках чоловіка. Єсли чоловік настолько уж культурный, што способный покончити раз навсе с войнами и взаимным вынищением, то оберне тоту чудесну силу для свого мирного ужитку. Єсли же окажеся, што чбловік не дорос ище до нового світа, який открыватся с вынаходом атомной силы, то он може погибнути, знищити себе сам и всьо житя на землі.

Мы побідили агрессивны нации — гитлеровску Германию и самурайску Японию, дві великы державы світа, котры взяли за свою ціль завоювание и панование над світом. Против тых двох держав боролися всі свободолюбивы народы под именем Объєдиненных наций. В тых Объєдиненных нациях руководячу роль мают дві найбольшы державы — Соєдиненны Штаты Америкы и Совітский Союз, два великы и миролюбивы народы — американский и совітский под руководством великого русского народа. Ни американский, ни русский народ не агрессивны народы, потому и их державы не можут быти агрессивны.

Гдекотрым американцам не подабатся Совітский Союз, потому што там инше державне и социальне устройство и инша господарка земными богатствами, што там ніт свободы писати в газетах того, што мож писати в Америкі. То правда, што в Совітском Союзі немож писати такы страшны річы о знищенню другых народов, як пишут в американскых газетах и страшити Америку и американский народ атомном бомбом, або даякым другым страшным оружием, знаючи, што то не агрессивный, а миролюбивый народ. Єсли бы там осмілился дакто позволити собі написати так по адресу Америкы, як в Америкі пишут по адресу Совітского Союза, то поставили бы го пред воєнный суд, як воєнного преступника.

Капитализма никто не може оборонити атомичными бомбами и войном. У нас в Америкі капитализм буде так долго истнувати, як долго даст американскому народу роботу и житя, ліпше житя, як дагде в социалистичной державі. Як долго в Америкі жити буде ліпше, як в Совітском Союзі, то Америкі ніт чого боятися социализма. Грозити днеска знищением социалистичной державі силом зо стороны капиталистичной державы, не може инше означати, лем признание высшости социалистичного господарства над капиталистичным.

Правду мают тоты мудры американцы, котры бесідуют и пишут, што атомна бомба, єсли мы єй скрываме пред другими, штобы страшити ньом другых и усилуватися диктовати им свою волю, так само, а може больше страшна для нас самых, так як и тоты, котрых мы усилуємеся настрашити, готовят таке саме страшне, а може ище страшнійше оружие против нам, што означало бы знищение и для нас и грозило бы знищением людству.

Най пропадут такы мысли, и тоты люде старого світа, што наводят нас на такы мысли. Мы думайме о новой природной, атомной силі, як небесной, божой силі, яка дана нам и нашым поколіниям для ліпшого, счастливійшого житя от житя нашых предков.