БОСОРКА

В недавно освобожденнном селі в хаті самотной бабусі соселился сержант Филип Костенко зо штырома солдатами. Сіли вечеряти. Бабуся горнец молока принесла.

— Ічте, родненькы, — принукуе она, — ічте на здравичко! Горе лем, што Бог с коровом покарал, молоко в ней пропало.

— Та што з ньом сталося, бабусю? — заинтересувался сержант.

— Та уж може с тыждень. Як німца выгнали, так и захворіла. Не инакше, лем босорка поробила. . .

Зашол сержант рано в стайню. Уважно оглянул повалу, стіны, жолоб. Заглянул корові в зубы. Помацал вымя. Покрутил ухо. Дунул в ноздря. . .

— Корова цілком нормальна и навет весела, лем нервова, — сказал он бабусі. — Но я звідам ветеринара, може он дачым допоможе, бо я на коровячых нервах не розуміюся.

— Звідай, голубе, звідай! Може таки направду допоможе.

Вночи сержант повертался до дому. Зашол в обору и нараз почул, як штоси голосно плямкало в стайни. Он осторожно подошол ку дверям и потом рванул и засвітил кишенковый лихтарик. Очам сержанта представился чудный образ. В кутку стоит корова, а под коровом сидит яка-си заросла бородом мара, впялася в вымя и ссе молоко. Сержант аж остолпіл с несподіванкы.

Тым часом перестрашена шумом и світлом “босорка” выскочила опод кровы и шахнулася до стіны. Сержант навюл на ню світло лихтарика. Пред ним стоял грубезный німчура в униформі фельдфебеля.

— А вот где тота босорка! — крикнул сержант и выхопил револьвер. Фельдфебель поднял в гору рукы. Давши босоркі-фельдфебелю два раз в морду, сержант припровадил го в хату.

Бабусю, вот я вам босорку привюл.

— Што ты, голубе, та яка то босорка? Таж-то фриц! Он у сусідкы на квартирі стоял.

— Ах, ты антихристе собачий! — ударила руками о полы бабуся и кинулася за погрібачом ку пецу.