Смутна судьба того народа, даколи одного из найбольшых и кріпкых славянскых народов, а днеска найменьшого из всіх славян и майже зникаючого на нашых очах. Могучий был народ лужичан, мильчан и полабскых сербов, який занимал всі обшары меж ріками Салом и Лабом в днешной Германии. Могучы были их городища, на котрых сиділи их князи. Но німецкы напады майже цілком знищили тот народ ище с VIII віка. Храбро оборонялися лужицкы сербы. Еще до XIV віка звучал их язык по цілой их территории. Но германский режим был сильнійший, и лужичане утратили кусочок за кусочком всю свою территорию. Німцы розділили их землю на дві части, штобы они не могли разом оборонятися: Нижню Лужицу заняла Пруссия, Верхню Лужицу — Саксония. Потом Пруссия заняла и часть Верхньой Лужицы, так што Лужица была розбита на три части. Пруссия наступала против лужичан так жестоко, што Нижня Лужица майже вся онімечена. И, наконец, гитлеровска Германия поглотила всю территорию Лужицы. Уж в XX вікі число лужичан упало до 200 тысяч людей, так што днеска всіх лужицкых сербов не больше як 160 тысяч.

Но не лем смутна судьба того найменьшого славянского народа. Радостно смотріти, як он оборонятся от поневолителей, як он до сего часу сохранил свою национальность. До сего часу живе язык лужицкых сербов, живут их национальны звычаи и обычаи. Лужицке село не стратило свого национального характера. И высшу национальну культуру створили лужичане за час XIX и XX віков. Гандрий Зейлер, Ян Ернест Смолер и Михаил Горник стали основоположниками лужицко-сербской литературы, Ян Петр Йордан и Арношт Мука — основоположниками лужицко-сербской национальной наукы. В городі Будишині организованый “Национальный дом”, в котром находилися музей лужицкого народа, издательство Матица, сербско-лужицка типография. В том домі собералися лужичане, давали представления на лужицком языкі.

Так было до Гитлера. Под гнетом Гитлера положение лужицкых сербов сильно погоршилося. Гитлера злостило, што тот маленький народ, и при том ище славянский, зо славянском национальном культуром, осмілятся истнувати в самой Германии. Длятого Гитлер постановил зробити то, што не удалося зробити німецкым поневолителям в протягу тысячи літ, — цілковито вынищити тот народ. Лужичанам тепер цілком заборонено выдавати книжкы або газеты на лужицком языкі, закрыты и их народны институции, лужицкы патриоты заключены в концлаеры. В лужицкы села пришли гестаповцы, котры нищат всьо, што могло бы подкріпити лужичан в их национальной свідомости.

Гитлер жестоко преслідує и друзей лужичан поза Германию. Лужичане уж в конці XVIII віка открыли семинар для воспитания своих национально-свідомых священников в Прагі, и с того часу связи меж чехами и лужичанами все были дуже тісны. И в новы часы чехы помагали лужичанам тым, што запрашали лужицкых дітей в Чехию на вакации и старалися зробити им тото пребывание в чешскых лісах и лугах як лем мож было приємным и корыстным. В Чехию приізжали лужицкы хоры, ту выдавали лужицкы книгы и газеты, в Пряжском университеті в ряді кафедр всіх славянскых языков створено кафедру и лужицкого языка и литературы.

Гитлер, оккуповавши Чехословакию, не лем прекратил всю тоту чешско-лужицку дружбу, но он приказал арестувати и пражского профессора лужицкого языка Пата, як “врага Германской империи.”

Но николи Гитлер не знищит лужицкых сербов! Страшны их страдания, но тверда и их воля не змінити свою национальность, сохранити єй и передати своим дітям так, як им передали єй их родиче. Розгром Гитлера принесе спасение и лужицкым сербам — тому малому, но доблестному славянскому народу, послідному остатку великого даколи народа полабскых славян.