Склад населения Сянока при князях был бесперечно русский. Ище в 1550 року число православных жителей высоке, што польский король Зигмунд Август дозволил побудувати в середині города храм св. Николая.

Уж в середных віках Сянок славился писателями. Можеме указати на Михаила зо Сянока (1556—1661), дуже правдоподобно сына сянцкого пресвитера Михаила, о котром пише проф. И. И. Шараневич. Тот Михаил зо Сянока перевел евангелие на “мову русску для ліпшого вырозумления люду християнского постолитого."

В часі введения унии, т. є. в протягу XVII столітия, Сянок и його окрестности вызнавали православну віру. Длятого ту переселился из Перемышля епископ Антоний Винницкий (1650—1679), штобы уникнути преслідуваний, и жил ту приблизно меж роками 1668—1675. Єст ище одно свідоцтво стойкости сяночан в вірі своих предков. В 1612 року начальство города заборонило свому намістнику, попу Андрею, повиноватися униатскому епископу Атанасию Крупецкому. В “Сводной літописи" А. С. Петрушевича записано под 1650 роком, што міщане города Сянока заперли двери перед униатскым епископом, який хотіл в церкви служити Богослужение.

Рядом с русскым населением в Сянокі жили поселенцы не лем из востока, но и зо запада, с Польшы и Венгрии. Число тых пришельцов, здаєся, было уж в XIV столітию значне, бо первый костел в Сянокі был основавный королем Казимиром Великым, дораз по його приході на Русь в 1340 року. Треба додати, што в конці XVII столітия яка-си Гербурт основала монастырь для униатскых монашок, о чом свідчат писма Петра Каминского с 1685 року.

Як мы выше упоминали, майже цілый днешний сяноцкий повіт аж до Карпатскых верхов был наділом русскых князей. До них належали стары, богаты лісы, села и приселкы с дворами. До найстаршых поселений, якы несомнінно истнували в часы русскых князей, треба причислити села: Половцы, Костыровцы, Волошску Тыраву, Улич и Юровец. Бесперечно ними управляли княжы тивуны по старому русскому обычаю. Интересно звернути увагу на сохранившыся назвиска селян в окрестности Сянока: Вайда, Чюнь, Кобеля.

Сянок в часах русскых князей мал свого посадника. Не выключена также возможность, што на чолі управления города стояли от часу до часу воєводы из бояр, высыланы князем в Сянок, як в один из головнійшых городов Галицкой Руси. Таке заключение мы в праві вывести из факта, што при Владиславі Опольском (1370-1379) Сяноком, подобно як и другыми головными галицкыми городами, управляли прибывшы до нас из Моравии Гербурты.

Судоводство отбывалося в Сянокі по установам “Русской Правды”. То доказуют сохранены с XV віка грамоты. Тогды не было ружницы меж земскыми и городскыми скаргами. Всі больше важны справы граждан судилися соборно. В склад суда входили: воєвода, судья, тивун, писар и засідатели. Грошевы належности опреділялися гривнами серебра або куницами, о чом упоминают русскы и польскы грамоты.

Наш образ стародавного Сянока не был бы цілый, єсли бы мы не упомянули о святынях його. Точно не мож установити, сколько было храмов в старину. Храм в Замкі во имя Воздвижения Креста с чудотворном иконом распятия Христа, несомнінно возник ище при русскых князях. Церков имени Рождества Пресвятыя Богородицы, с чудотворном иконом Богоматери, стояла до 1790 року на юго-восточном склоні Сторожни, называном днеска Аптекарском гором. В том року цінный памятник по приказу австрийскых властей во Львові был проданый с публичного торга якому-си Гофману.

Из составленной в 1784 року описи видно, што церков Рождества Богородицы была побудувана з дерева и лем в олтарі стіны были с каменя. Долгота церкви была 28 локтей, ширина 12. Коли и кым она была створена, трудно сказати. Однако можеме знати, што она истнувала пред 1550 роком. Тото ясно выходит с привилея Зигмунта Августа, дозволяючого побудувати храм св. Николая в городі. Чудотворна икона Богоматери была найдена в 1876 року.

Всі нашы відомости о сяноцкых церквях ограничуются лем до записок священника Раставецкого. Из тых записок мож зробити заключение, што из Замковой церкви, городской Николаєвской и церкви Рождества Богородицы осталося до нашых часов по одной иконі: Распятие Христа, св. Николай, Богородица, котры в протягу XVIII столітия были наділены папскыми индульгенциями. Треба подчеркнути, што в списках тых чудотворных икон нашлися ище дві: Изображение св. Троицы и чудотворна икона св. Онуфрия.

Несомнінно, што при нашых князях истнувал Свято-Троицкий храм, котрый, правдоподобно, находился там, где в польскы часы был приходский храм св. Духа. Києвска літопись под 1399 роком зазначат: “прийдя король краковский и взя землю Волынскую и много зла христианам сотвори, а церкви христианския претвори на латинское служение.”

Свято Онуфриєвский монастырь, як православна обитель, один из стародавнійшых. Згодно зо “Сводном літописью” А. С. Петрушевича, латино-польске духовенство, забравши русскы церкви, задержало праздникы занятых ним церквей. Мало тото місце не лем в Сянокі, но и в Дрогобычі, Самборі и в другых галицко-русскых городах.

Кым и коли был основаный монастырь, о том ніт точных данных. В списку принявшых унию игуменов перемышльской епархии (Краков, 1694), сяноцкого игумена не встрічаме. Из того мож заключити, што в тот час монастыря в Сянокі уж не было. Найправдоподобнійше он был знищеный набігами татар або турков в XVI—XVII столітиях. Тых набігов на наш край было много, а то: в 1498, 1504, 1524, 1548, 1575 и 1672 роках. Также покрыто мраком неизвістности основание монастыря в Межибродию близ Сянока. Відомо лем, што своє истнование он закончил в початку XVIII столітия разом с монастырем в Уличі.

Среди народа иде молва о пяти церквах в городі Сянокі. То не преувеличено, бо Сянок обок Львова и Перемышля, был одним из головнійшых городов на Червенной Руси.