КОРОТКА ИСТОРИЯ

История мого житя подобна до истории всіх нашых лемковскых емигрантов. Родился я в селі Терстяна Кроснянского повіта, от родичов Григория и Марии Гулик. Як тринадцет-рочного хлопца, родиче отдали мя до шевца в Дукли учитися шевского ремесла. Ледво минул рок той мойой наукы, як мой родич, мой няньо Григорий помер. По смерти отца я пробыл в Дукли ище два рокы. За тоты три рокы я не лем научился шевского ремесла, но и познал кривду, яка діяліся нашому бідному народу, нашым лемкам в Карпатах. Тото мене загартувало в любви до свого народа.

В тоты часы мы свойой газеты, яка бы говорила до народа його родном бесідом, не мали, ни в краю, ни ту на емиграции, аж пришол “Лемко” и тот нас дуже загартувал в любви до свого родного брата.

По трьох роках в Дукли я вернулся в своє родне село и родный дом. Мама жили при найстаршом браті, який был на газдовстві. Наймолодший брат Тимко, котрый находился до войны где-си на Совітской Украйні, жил при мамі и найстаршом браті.

Коли мі было 17 літ, я оставил родне село. 18-го августа 1913 року я выіхал в Америку. На шифу сіл 23-го августа в Бремен. Шифа называлася Джордж Вашингтон. До американского порту шифа прибыла в субботу перед Лейбор Дей, и зато нас держали на шифі неділю и понеділок, бо было два дни свят. Пустили нас зо шифы аж во вторник. На той шифі приіхало много моих краянов лемков, и може дакто з них забыл имено той шифы, а му треба знати при получению гражданства, то я ту зато тото вспоминам.

7-го сентября я приіхал до брата до Дженсвил, Висконсин. Роботу достал меж американцами, нашых людей ту не было. Позднійше я почал учитися на машиниста. Ище я тоту науку не покончил, коли в 1917 року, в январі, поіхал до сестры, до Сингек, Н. Дж. Там я познакомился с дочков Андрея и Катрены Саламон, родом зо села Криживка Ново-сандецкого повіта, и мы побралися. Весіля отбылося на Сингеку в новой церкви. По весілю мы переіхали назад до Дженсвил, где почалося для вас обоих нове житя. Рокы шли и мы дочекалися красной фамелии — пят сынов и одна дочка.

Жили мы так тихо, в любви и згоді, и мало што знали зме о світі и нашой емиграции в Америкі. Аж в 1931 року нас нашла ту на Дженсвил газета “Лемко”, и с того часу чоловік нашол то, чого прагнул такы долгы літа.

Коли я то пишу, то мі пришла на мысль моя мати, котра дожила до 90 літ. Коли мои мама померли, то оставили 50 внуков и штырьох правнуков. А с тых внуков жили до войны в родном краю 25, а в Америкі другы 25. Из тых 25 внуков служит в Американской Армии до сего часу 10. Што до моих близкых в старом краю, то не знам, где ся повертают. Мушу чекати, як и другы мои краяне, коли скончится война, то довідамеся, што сталося с нашыми близкыми в краю.

Ту в Америкі всі мы, матери и отцы, чекаме на конец войны, штобы нашы діти поверталися ку нам.