Києвска Русь была спольным початковым периодом в истории Украины, России и Білоруcсии. В тот период починатся оформление украинской, великорусской и білорусской народностей, якы остаточно сложилися около ХІѴ-ХѴ столітня.

Послі роспада Києвской державы на территории днешной Украины утворилося пять самостоятельных земель, або великих феодальных княжеств: Галицке, Волынске, Києвске, Чернигово-Сіверске и Переяславске. На территории тых княжеств в основном и сложилася украинска народность.

Найбольше сильными и економично розвитими стали Галицке и Волынске княжества. Центром Галицкой земли были Карпаты. Южна граница Галицкого княжества шла вниз по Дністру, Пруту и Серету до Чорного моря и Дуная.

Галицка земля отділилася от Києва скорше, як иншы земли. Ку концу XI и на початку XII столітий ту укріпилися правнуки Ярослава Мудрого, князьи Ростиславичы — Василько, Володар и Рюрик. Спочатку Галицка земля была роздроблена на пару княжеств, але князь Володимирко Володаревич (1145-1152) объєдинил єй в єдине княжество, установивши свойом столицом Галич.

Володимирку треба было вести завзяту борьбу против Венгрии и другых врагов, якы хотіли заграбити Галичину. Он не лем отстоял цілость и независимость свого княжества, но и росширил його границы.

При сыну Володимирка Ярославі Осмомыслі (1152-1187) Галицке княжество ище больше укріпло и стало найсильнійшым княжеством на Украйні (Малой Руси). Літописец подчеркує вплывове межнародне положение Ярослава, говорячи, што он был “уважаный во всіх землях”. “Слово о полку Игоревѣ", воспіваючи Ярослава рядом с могучим князем Всеволодом Юрьевичем, владимиро-суздальскым (князем Великой Руси), звертат, передовсім, увагу на то, што он грозный для Угорщини: “Галичкы Осмомысле Ярославе! Высоко Сѣдиши на своем златокованном столѣ, подпер горы угорские своими желѣзными полки, заступив королеви путь, затворив Дунаю ворота, меча бремены чрез облаки, суды рядя до Дуная.”

Послі смерти Ярослава Галицке княжество почало занепадати. Головном причином того было надзвычайне усиление в Галичині великого боярства, яке вело борьбу против централизованой княжеской власти.

Тоту борьбу постановила выкорыстати, с цілью захвата Галичины, Угорска держава Арпадов, яка уж предтым захватила Закарпатску Русь. Угорский король Бела III в 1188 року захватил Галичину, але галицке население выгнало оккупантов.

По смерти галицкого князя Владимира Ярославича в 1199 року владимирско-волынский князь Роман Мстиславич завладіл Галичином и объєдинил й с Волыньом. Так было утворене могуче Галицко-Владимирске княжество, яке долгий час отогравало головну роль в истории Украины (Малой Руси) и стремило до объєдинения роздробленых украинскых земель в єдину централизовану державу.

Штобы укріпити свою власть в Галичині, Роман росправился с великым галицкым боярством.

Объєдинивши Волынь и Галичину, Роман хотіл подчинити собі и Києв. Києвске княжество пребывало даякий час под двойным вплывом — Романа и Всеволода Юрьевича, владимиро-суздальского, — найсильнійшых князей Руси, котры были союзниками.

Роман погиб в 1205 року в часі походу на Польшу. Смерть могучого Романа, який оставил малолітных сынов — трьохлітного Данила и однолітного Василька, розвязала рукы великому боярству, князям черниговосіверскым, києвскым и иншым. Велике галицке боярство не хотіло допустити до укріплення Романовичей в Галичі. На Украйні выбухли феодальны войны, якы держали понад тридцет літ.

Корыстаючи из ослабления Галицко-Волынского княжества, угорский король Андрей II и краковский князь Лєшек Білый в 1214 року уложили угоду в Спиші о поділі Галичины и Волыни. Угорский король захватил Галич, где послал свого сына Коломана. Краковский князь одержал сіверо-западну часть Волыни и Перемышльску область в Галичині. Романовичам была оставлена лем Владимирска волость на Волыни.

Но меж Андрейом и Лєшком скоро пришло до конфликта при поділі галицко-волынскых земель. В тот сам час галицке население повстало против оккупантов, якы грабили го, жестоко росправлялися с ним и насильно насаджували католицтво. На помоч галицкому населению пришол новгородский князь Мстислав Удалый. Он выгнал с Галича угорского воєводу и прибочников угров — великых галицкых бояр и в 1219 року занял Галич. Меж Мстиславом Удалым и Данилом Романовичем, котрому было уж 18 літ, был заключеный союз для спольной борьбы против внішных врагов, при чом Данило Романович женился на дочкі Мстислава.

С того часу Данило Романович починат активну политичну діятельность, хотячи предовсім объєдинити в своих руках всю Волынь. В том самом 1219 року он отобрал от оккупантов волынскы земли.

Угорский король и краковский князь знов объєдинилися. Вражы войска захватили Галичину и посунулися на Волынь. На чолі тых войска стоял воєвода — пан Фильний, якого літописец называт “Филя прегордый”. Но в 1221 року Мстислав с помочом Данила, што давал приміры храбрости, розгромил оккупантов и освободил Галич.

В 1227 року угорский король ище раз вдерся в Галичину, але знов зазнал поражкы. Не зважаючи на то, под вплывом великых бояр, якы боялися укріпления Данила, Мстислав згодился выдати свою другу дочку за угорского королевича и передал му в управление Галичину, хотя галицке население хотіло мати князем Данила. Потом Мстислав жалувал, што отдал Галич “иноплеменнику”, а не Данилу и предложил Данилу почати спольно войну за Галич. Но в 1228 року Мстислав помер.

В 1230 рр. Данило почал войну за Галичину. В той борьбі он оперался на силы свойой Волыни, а также на поддержку галицкых средных и дробных бояр и міщан, взагалі всіх тых елементов, якы были заинтересованы в остановлении беспрерывных опустошаючых войн, боролися против чужоземной оккупации и хотіли сильной княжеской власти.

Послі 1230 р. Галич пару раз переходил з рук до рук — то до угров, то знов до Данила, то до черниговскых князей Михайла и сына його Ростислава. Наконец в 1238 року Данило знов занял Галич.

Тыми часами Галицко-Волынскому княжеству почали загрожувати новы врагы — німецкы рыцари. Покоривши протягом IX — XII столітий полабскых славян, німецкы грабежникы усилили свои напады на земли восточной Прибалтики. В 1202 року в устью Западной Двины появился Ливонский німецко-рыцарский орден, а в 1228 року на берегах Вислы утвердился Тевтонский орден. Тоты два ордены в 1237 объєдинилися. Німецкы грабежникы посувалися в глуб земель ливов, єстов, пруссов и иншых племен, спустошали тоты земли огнем и мечом, грабили и вынищували місцеве население, поневолювали и жестоко угнетали го. Прибалтийскы племена ставили роспачливый опор насильникам, но отбити их не могли, бо их ослабляла политична розъєдиненность.

Одночасно с тым німецкы рыцари змагалися просунутися на территорию Руси, захватити великорусскы, білорусскы и украинскы земли. Но восточно-славянскы народы дали рішительный отпор німецкым грабежникам.

В 1237 року німецкы рыцари захватили в сіверной Волыни город Дорогичин, но не надолго. За словами літописца, Данило Романович сказал: “Не добре, штобы нашом отчизном владіли крестоносцы.” В 1238 року, ище до занятя Галича, Данило Романович с великым войском выступил под Дорогичин и розгромил німцов. Сам воєвода крестоносцов Брун был взятый в плін Данилом Романовичем.

Так што проба німецкых “псов-рыцарей” (так называл их К. Маркс) закріпитися в Дорогичині и претворити в плацдарм для наступу на украинскы и білорусскы земли кончилася крахом.

В 1242 року славный князь Александр Невский на леду Чудского озера цілковито розромил ливонскых рыцарей, в наслідок чого “пройдисвіты были остаточно откинены от русскых границ”.

Данило хотіл завладіти также Києвом, и того он достиг. В 1240 року Данило занял Києв и посадил там свого храброго воєводу Дмитрия.

На початку XIII столітня один из монгольскых ханов, Темучин, объєдинил под свойом властью монголо-татарскы племена и был объявленый на курултаі (собрании начальников племен) Чингис-ханом, то єст самодержавным владітелем, великым ханом. Укріпившись в Монголии, Чингис-хан роспочал свои великы завоювання.

В 1223 року на річкі Калкі монголы розгромили объєдинены силы русскых князей и половцов. Потом монголы повернули назад и пошли с причорноморскых степов в Азию.

Однако, завоювание Восточной Европы уж вошло в планы монгольскых ханов. В 1236 року внук Чингис-хана Батый с великым войском рушил в Восточну Европу и напал спочатку на Поволжя. Протягом 1237-1238 р. монголо-татары опустошили великорусскы земли. Были обернены в руины Рязань, Коломна, Москва, Владимир, Суздаль и иншы городы. Порознены княжы ополчения, не зважаючи на всю свою храбрость и мужность, не могли устояти перед монголо-татарскыми полчищами.

В 1239 року Батый почал завойовувати лівебережны украинскы земли, а в декабрі перешол Дніпр и осадил Києв.

Києвляне на челі с воєводом Дмитрием отчайдушно оборонялися, але не могли отбити татар. Києв был взятый и спустошеный. Дмитрий, раненый в часі обороны города, попал в плін, но Батый оставил го при житю “мужества ради его”.

Взявши Києв, Батый рушил на Волынь и Галичину, а оттамаль на Угорщину, Польшу и Чехию. В Галичині и на Волыні было зруйновано много городов. Однако, встрітивши в Чехии сильный опор, татары в 1242 року повернули на восток, где Батый основал свое царство — Золоту Орду зо столицом Сарайом у устья Волгы.

Русскы земли нашлися в зависимости от Золотой Орды. Хан оставил князей и бояр на своих місцах, лем подчинил их свойой власти. На население была наложена тяжка Данина, котра шла в корысть хана и татарcкых вельмож. В разі неуплаты данины татары заберали население в неволю. Православне духовенство было от данины освобождене.

Особливо тяжкым было панование для народных масс, якы были гнетены и татарcкыми ханами и своими панами — князями и боярами. Народ на много віков сохранил память о страшном татарском ярмі.

Навала татар усилила економичный и политичный упадок Києвщины и взагалі середнього Подніпровья. Число населения ту уменьшилося ище больше. За словами літописна, Києв стал “мизерным” городом: “в ньом не осталося больше як 200 будинков, и над жителями тяжит сурове рабство.”

В том упадку Києв тратит также значение церковного центра Руси, бо митрополит переходит из Києва в Сіверо-Восточну (Велику) Русь.

За час пару роков Данило не признавал над собом власти Золотой Орды, хоц позиции його внутри Галицко-Волынского княжества ослабли. В Галичині знов почало поднимати голову велике боярство, яке не хотіло подчинитися Данилу.

Силу великого боярства в Галичині хотіли выкорыстати угорский король Бела ІѴ и його зять, сын черниговского князя Михаила, Ростислав. Бела дал Ростиславу велике войско и тот вырушил против Данила. В 1245 року под городом Ярославом (в Галичині) войско Ростислава было розгромлене войсками Данила. Сам угорский воєвода “прегордый Филя” попал в плін и был страченый Данилом.

Битва под Ярославом привела до остаточного укріплення Данила в Галичині. Загроза захвата Галичины Угорщином была отбита завдякы героизму галицко-русского населення, яке вопрекы зрадникам, великым боярам, встало на борьбу за свою национальну независимость. Велику роль в той борьбі отограл храбрый и талантливый полководец, патриот свойой отчизны, князь Данило Романович.

Однако, положение Галицко-Волынского княжества на Востокі осталося грозным. В 1246 року Данило признал свою зависимость от Золотой Орды. Но от борьбы против татар он не отказался и незадолго он почал готовитися до ней.

Признание Данилом зависимости от хана сприяло укріпленню позиций Галицко-Волынского княжества на западі. Головный враг Данила угорский король Бела ІѴ, настрашеный тым, што галицко-волынский князь признал власть Золотой Орды, заключил союз с Данилом. Сын Данила Лев был ожененый на дочкі Белы. Завдякы тому союзу Данило был втянутый в войну Белы за австростырийскы земли. Другий сын Данила — Роман, ожененый с дочком послідного австро-стырийского герцога з дому Бабенбергов — Гертрудом, посідал даякий час австро-стырийский престол.

Выкорыстуючи союзны отношения е польскыми князьями и с первым объєдинителем Литвы князем Миндовгом, Данило подчинил свойой власти часть земли литовского племени ятвягов по Западному Бугу. Ятвягы были постепенно вытіснены с той территории и она была заселена частично білорусскым, частично галицко-волынскым населением. Тота территория разом с сіверными владіниями Волыни — Брестьом и Дорогичином — получила назву Подляше. Данило поширил свой вплыв также на Турово-Пинске княжество.

Готуючись до борьбы с татарами, Данило старался втянути в ню и другы европейскы державы. С том цілью он установил отношения с папом римскым, який хотіл добитися унии — объєдинения православной церкви с католицком под свойом властью. Надіючись получити помоч для борьбы с татарами, Данило згодился на унию. Папа предложил му титул короля и прислал королевску корону, яком Данило и коронувался (1253р.). Потом папа специальном буллом призвал християн Польши и иншых держав до крестового походу против татар, но тот призыв успіха не мал. Данило, не получивши помочи от папы, перервал с ним сношения, уния не была переведена, хоц титул короля Данило задержал. Послі того папа наказал католицкым епископам прокляти Данила и почал проповідати Крестовы походы против Руси.

Данило постановил выступите против татар сам. Силы його с часу подорожы в Орду зросли. Край уж трохы оправился послі иноземных спустошень. Сколькость населения в Галичині и на Волыни убольшалася. Были основаны новы городы, меж ними Львов, названый именем сына Данила Льва. Данило укріплял городы баштами и мурами, штобы их татары не могли взяти. Он также старался як найбольше заселити тоты городы, дбал о розвитие ремесла и торговли в них. Особливо Данило дбал, штобы заселити и укріпити побудованый ним город Холм, який стал його столицом.

Скорыставши з незгоды в Золотой Орді, Данило в 50-х роках ХІІІ столітия переходит в наступ против сусіднього татарского воєводы Куремсы. Данило завладіл землями, якы находилися под владінием татар по Сіверному Бугу, Случи и Тетереву. Потом он взял Возвягль (тепер Новгород-Волынский) и зберался рушити дальше на завоювание Подніпровья и Києва. Но до такого походу не дошло через стычку с литовцами.

Тым часом зо Золотой Орды был присланый на місце Куремсы новый воєвода Бурандай з величезным войском. В тот момент Данило не отважился починати борьбу з Бурандайом. Бурандай примусил брата Данила Василька и сына його Льва в 1259 року знищити укріплення міст Кременца, Луцка, Львова, Владимира и иншых. Сохранилися лем укріплення Холма, население котрого, замкнувшись в городі, не схотіло поддатися. А напасти на Холм Бурандай не отважился, бо город был сильно укріпленый.

Галицко-Волынске княжество мушене было признати зависимость от Золотой Орды.

Данило Романович помер в 1264 року. Вспоминаючи о смерти Данила, літописец подчеркує його мудрость и называт го “другым по Соломоні”. Данило был бесперечно выдатным державным діятелем и дипломатом, талантливым и храбрым полководцем. Ведучи постоянно войны с численными ворогами, он доложил сил до того, штобы створити войско, яке не уступало бы войскам сусідных держав. Своих воинов он выховувал в духі патриотизма и мужности, говорячи: “Воин, який пошол в бой, повинен або побідити, або умерти.” Не маючи сил отбити татарску навалу, Галицко-Волынске княжество змогло зато отбити угрозу зо Запада.

Як Александр Невский стал на челі борьбы великорусского народа против шведскых и німецкых наіздников, розгромивши первых на Неві в 1240 року и другых на ледах Чудского озера в 1242 р., так Данило Романович стал на челі юго-западной Руси (Украины) против німецкых и угорскых наіздников, розгромивши первых под Дорогичином в 1238 року, и другых под Ярославом в 1245 року.

Данило был в роли иных связях с князями новгородскими и владимиро-суздальскыми, а также с Угорщином, Австриом, Литвом и Польшом. Сам он был первый раз ожененый на дочкі Мстислава Удалого, а дочку свою выдал за Андрея Ярославича, князя владимирского, (а потом суздальского), брата Александра Невского.

При наслідниках Данила политичне єдинство Галицко-Волынского княжества почало слабнути, а с тым слабне и його сила. Не зважаючи на то, Галицко-Волынске княжество ище долго оставалося грозным для Угорщини, Польшы и Литвы. Литву Галицко-Волынске княжество о мало не подчинило свому вплыву: Литовскым великым князем даякий час (около 1267—1268) был сын Данила Шварно, ожененый на дочкі Миндовга.

Галицко-Волынске княжество продолжало ставити опор татарам. Тот опор мал велике значение для Европы. По словам сучастника, Галицко-Волынске княжество было для запада “непоборимым щитом от жестокого племени татар.”

Послідным независимым галицко-волынскым князем был Юрий-Болеслав (1323-1340) — сын польско-мазовецкого князя Тройдена, кровняк галицко-волынскых князей. Юрия-Болеслава убили бояре, незадоволены тым, што он оточил себе чужеземцами и насаджувал католицтво.

За того часу за галицко-волынекы земли почалася завзята борьба меж Польшом и Угорщином, з одной стороны, а Литвом, з другой. Тота борьба тянулася около сорок роков и привела до утраты независимости Галицко-Волынского княжества.

ДМИТРИЙ ДОНСКИЙ

Тяжке было для Руси татаро-монгольске ярмо! Завдякы роздроблению Руси на удільны княжества татаро-монгольекы орды легко поневолили Русь и держали єй в свойом ярмі майже 250 літ. Но Русь не стала рабом наіздников, а собирала свои силы для скинения татарского ярма под руководством князей патриотов. Одним из такых князей патриотов, собирателей русскых сил для освобожедния Руси от татаро-монгольского ярма, был Великий Князь Московский Дмитрий. Он собрал на тоты часы велику русску армию в 150.000 воинов и двинул против татарекых орд. У татарекых ханов была два раз численнійша армия, в 300.000 воинов. На Куликовом Полі, над Доном, русске войско, под руководством великого князя патриота и воина Дмитрия, розгромило два раз большу татаро-монгольску силу 8 сентября 1380 року. Но у русского народа тогды ище не было силы знищити цілковито татаро-монгольску силу и чуже ярмо. Лем через сто літ были татаро-монгольска сила и єй ярмо на Руси знищены.