ОТДІЛ КАРПАТОРУССКОГО ОБЩЕСТВА БОРЬБЫ С ФАШИЗМОМ В ФОРТ ВИЛЛЬЯМ, КАНАДА

Карпаторусскых емигрантов, т. є. нашых людей с Лемковщины и Подкарпатской Руси не много, так як нашы люде почали емигрувати в Канаду аж по першой світовой войні, и то аж в 1926 року почало приізжати в Канаду больше нашых людей с Карпат, и то с ограничениями. До того часу было може пару десяток нашых фармеров, котры переселилися в Канаду из Соединенных Штатов.

По войні приізжали звычайно молоды мужы, оставляючи своих жен в краю, або неженаты, и каждый з них думал, як бы то заробити пару центов и вернути до краю ку свойой родині. Потому нашы молоды емигранты старалися осісти не на фармах, бо у никого не было гроша купити фарму, а в индустриальных містах, як Монтреал, Торонто, Гамилтон, Видзор, Форт Вилльям.

Но мы приізжали як раз в саму найтяжшу депрессию и заробити на житья было трудно, не то дашто отложити або послати до дому. Были часы, што мы зарабляли по 5 долларов на місяц.

Котрый был самотный, то приізжал до Форт Вилльям, центра канадийской лісной индустрии. Ту мож было достати роботу в лісах. Но лісны бароны платили дуже мало за нашу роботу, лем $1.25 за корта. А борд рахували так, што роботнику осталося дуже мало зо свого заробку. Но с часом лісны роботникы почали организувати свою юнию и организовано боротися за ліпшы условия роботы. Мы получили ліпшы условия.

Коли нас, краянов с Карпат, нашлося больше в Форт Вилльям, то мы основали собі отділ Лемко-Союза, карпаторусской культурно-просвітительной организации, и мы читали газету “Лемко” и литературу, яку издавала тота организация. А 22-го апріля 1942 року мы основали отділ Карпаторусского Общества борьбы с фашизмом, задачом котрого помагати борцам с фашистскими силами, котры хотіли поневолити цілый світ, а особливо свому родному народу и його армии, котры приносят найбольшы жертвы в той нашой спольной народной войні против фашизма. На тоту ціль мы собрали меж собом в Форт Вилльям около 5,500 долларов, из чого на помоч для нашых братов в Совітском Союзі мы переслали 4,244 дол., а решту на Канадский Красный Крест, на Рошен Вор Релиф через місцеву канадску организацию, и т. д.

А нас, ту в Форт Вилльям, карпаторусскых емигрантов не много, а и то не всі стоят в нашом отділі и не всі помагают.