У нас в Мизури дуже добра земля и родится на ней прекрасна катна (баволна), коли єй добри обробити. Великы обшары земель мают богаче. На их землях працуют звычайно бідны шеркраперы, так як в старом краю працували бідны у поміщика за пятнастый або шеснастый сноп. Потом у нас великы рентовникы земель. Єсли чоловік має грошы на машинерию и живый инвентар, то вырентує с парусот або больше акров, и робит так само, як поміщик — бере роботников-шеркраперов, и може выграти великы грошы. Біднійшы люде або працуют у тых обшарников, або, кого стати, то собі купит кусок поля, котрый обраблят зо женом и дітми, або вырентує собі столько поля, сколько може обробити з родином. И працовита родина може робити добре житя, ліпше, як в индустрии.

Раз прибігла сусідова дівчина и говорит, што маме нового сусіда, но што тоты люде такы бідны, што не мают што істи, и просили єй маму пожичити мукы, цукру, кавы, и т. д.

Позднійше я довідался, што тоты люде вырентували аж 200 акров земли, а ту не мают ниякой машинерии, всього до роботы — два мулы, и тоты выголоднілы. И сами істи не мают што. Так што зберали стару корну по полю, варили єй, и так живилися. Но так долго жити было неможливо.

Видно, што тот чоловік виділ, який фармере мают добрый доход с катны, и то кто має больше поля и больше посіє, то має больше доходу. На великых фармах люде поміщиками стали. И так он, легковірный, постановил собі также стати такым поміщиком, а обрахуватися не знал. И так вырентувал аж 200 акров, и взял собі трьох помочников, тых шеркраперов. А ту ниякой машины, ни што істи.

Так до єдного сусіда посылал просити за поживом, а до мене прислал одного шеркрапера за машинами. Я, розумієся, машин му не мог дати, бо мі самому треба.

Так запрягли они тоты бідны два мулы до плуга, и єден с тых шеркраперов почал орати. Другий вышол посмотріти, як ся му оре. Тот дал му плуг в рукы, а сам вернул до шанды, взял свой мішок на плечо и пошол гет. Тот другий взял пару скиб, посмотріл як того мало, а як дуже треба орати, тай также оставил плуг и пошол собі зо своим мішком. Вышол третий шеркрагіер, взял знов зо дві скибы, тай выпряг мулы и запровадил до стайні, но істи не мал што им дати. Взял свой мішок и пошол за тамтыма двома.

Тот, што вырентувал тоту велику фарму, рахувал, што тоты три роботникы повинны зробити “крап” (урожай) — про властителя фармы, и про него самого, што вырентувал тоту фарму, а ци роботникам дашто ся уйде, то он тым не журился. Раз он постановил собі быти поміщиком, то он не повинен сам робити, лем одержати готового чека.

И так о пару день мой сусід поміщик забрался гет, там, откаль пришол. А пришол с Аркансо.

Поміщиков такых, што сами не працуют, мы ту маме на всі стороны, но они мают найменьше по пару тракторов и другу машинерию, и по пять пар мулов, лем брак роботников.