ЗМІНЧИВЫЙ КЛИМАТ

Полковник Отто Брюхер зовсім охлял от спекы.

— Проклятый край! — проклинал Брюхер. — Ту тебе кидат то в жар, то в холод. Ниякого дня нормальной температуры! А вы казали, — накинулся он на лейтенанта Глистштока, — што днеска буде дощ. Где дощ, я вас звідую? Чом дотля ніт дощу?

— То было лем переносне, я думал налет большевитскых самолетов, коли говорил о дощу.

— А-а-а, — промычал полковник, вспомнувши минулый день. . . Недотепны жарты. . . Надальше заборонам вспоминати дощ. . .

— Я осмілюся запропонувати вам купель в чудесной річкі, — несміло сказал лейтенант.

— Ту недалеко. За лісом.

— А?. . . Гм?. . .

— Не нервуйтеся! Всьо спокойно.

— Глубоко?

— Мі буде так. . .

— Значит мі по пояс буде. . . Машину!

. . . Ефрейтор Плаксман остался коло річей. Полковник и два лейтенанты хлюпкалися в воді. Офицеры напребіжкы старалися показати свою майстерность в плаванию. Над річком розносился такий галас и регот, як бы пригнали напавати табун жеребцов.

— Ну, дост, — сказал полковник, выходячи з воды. — Покупалися на славу, тепер бы добри пообідати, тепер бы. . .

— А где річи? — звідал нараз лейтенант Гундзон.

— Пла-а-аксман! — закричал полковник роздражнено. — Где вы, свинячий недоносок? Куды вы поділися до геббельсовой мамы?

Тихо.

— Може он коло машины, — сказал, нарешті, Глистшток, звонячи зубами.

Пошли ку машині, што стояла под деревами край дорогы.

— Вот тото бесстыдне опудало крутится с шофером коло машины.

Офицеры повеселіли и прискорили ходу.

— Плаксман, — рюк полковник, уж коло лимузина, — давайте насамперед кальсоны и сорочку. . . Подруге вы мате пять дней гауптвахы. . . Потретье. . .

— Потретье, сідайте всі швыденько в машину! — сказал чий-си незнакомый голос. И двох моцных парубков с автоматами вышли зо-за машины.

. . . За годину німецкы офицеры стояли перед командиром партизанского отряда.

— Вам може холодно? — звернулся командир до полковника, што тремтіл, як лопуховый лист, — не звыкли до нашого климату?

— Дуже змінчивый климат, — отповіл полковник, обливаючися потом.