Яку силу можут мати объєдинены славяне в борьбі против німецкого “дранга нах остен”, то о том найліпше свідчит розгром Тевтонского ордена под Грюнвальдом в 1410 року, т. е. 535 літ тому назад. До того великого историчного события был тревалый период завзятой борьбы славянскых и другых народов против німецкых грабежников.

Початок німецкого напору на восток належит до ѴІІІ—ІХ столітий, коли німцы почали завойовувати и вынищувати западных славян (лужичан, лютичей, што жили над ріком Лабом). Славяне вели с німцами беспрестанны войны, отбиваючи их натиск. Но политичне роздробление славянства причинялося до того, што они не могли противостояти объєдиненным силам німцов. Спочатку німецкы грабежникы завоювали всю сербо-лужицку группу полабскых славян, а потом — бодричей и лютичей. Славяне усилувалися скинути ярмо німецкых угнетателей, но их повстания придушувалися заграбниками с неслыханом жестокостьом. Постепенно полабскы славяне были вынищены и онімечены.

Завоювавши до XIII столітня полабскых славян, німецкы феодалы усилили свой наступ на территорию восточной Прибалтикы, на земли ливов, естов, пруссов, литовцов. Тот наступ был связаный с возникнением в Прибалтикі на початку XIII столітня Ливонского и Тевтонского орденов, што злялися в один в 1237 року.

Німецкы заграбникы посувалися в глуб восточной Прибалтикы, завойовували и вынищували місцеве население, обертали го в панщизняных невольников, перетворювали квітучы земли в пусткы. Прибалтийскы племена ставили агрессорам завзятый опор и задавали им не раз тяжкы поражкы, но отбити німецку навалу не могли, бо их, як и полабскых славян, ослаблювало политичне розъєдинение. Операючись на свои переважаючы силы, німецкы грабежникы перемогли ливов, естов, пруссов и другы племена и загрожували поглотити Литву.

Одночасно с тым німецкы рыцари змагалися посунутися на территорию Руси (России, Украины и Білоруссии), захопити земли Пскова, Полоцка, Великого Новгорода, Галицко-Волынского княжества. Но ту они встрітил рішительный, мужественный отпор восточно-славянскых народов. В 1237 року Галицко-Волынский князь Данило Романович розгромил німецкых наіздников под Дорогочином на Волыни, захвативши при том в плін рыцарей и самого их воєводу Вруна. В 1242 року Новгородский князь Александр Невский задал страшну поражку німцам на леду Чудского озера. Тота знаменита битва вошла в историю под именем “Ледового побоища”.

Ледове побоище положило конец німецкому наступу на русскы земли. Грабежникы были остаточно откинуты от границ Руси. Восточны славяне вышли побідителями в жестокой схваткі зо знахабнілыми агрессорами.

Послі Ледовитого побоища німецкий натиск был направленый, основно, в сторону Литвы и Польшы. Німецкы рыцари захватили у Польшы Поморье и загражували самому истнуванию Литвы. Тот наступ серьозно загрожувал также Білоруссии и Украйні, так як в XІѴ столітню всі білорусскы и больша часть украинскых земель были присоєдинены до Литвы, кромі Галичины, яку, при конці XІѴ столітня взяла Польша, и Закарпатской Руси, што была под владінием Угорщины. Богаты білорусскы и украинскы земли дуже притягували німецкых грабежников. От Людовика Баварского рыцари одержали грамоту на Литву и Русь. Німецкы грабежникы чинили грабежны опустошаючы напады на Литву и Польшу, хотячи не лем поневолити, но и совсім знищити народы тых держав.

Но німецкым рыцарям не удалося выполнити свои розбойничы планы што до Польшы и Литвы. Протягом всього ХІѴ столітня Польша и Литва вели завзяту борьбу против німецкых наіздников. В той борьбі велика заслуга належит украинцам и білоруссам.

Присоєдинение Білоруссии и большой части Украины до Литвы и Галичины до Польшы дуже змоцнювало тоты державы, особливо Литву. Русскы (украинскы и білорусскы) земли змоцнювали Литву не лем своими численными ополчениями, но и свойом высшом культуром. Русскы генералы дали литовцам свою лучшу воєнну организацию, умінье будувати и обороняти укріпления. В самых литовскых отрядах заведено русску дисциплину и русскы воєнны прийомы, о якых німецкы літописцы, сучасникы многых поражок німецкых рыцарей з рук литовцов и русскых, выражалися з великом похвалом, называли их воєнны прийомы подобными до прийомов рыцарей.

Загроза зо стороны спольного врага — німецкых рыцарей — примусила Польшу и Литву объєдинити свои силы. В 1385 року в Крево была уложена польско-литовска уния шлюбом польской королевы Ядвигы и великого князя литовского Ягайла, при чом Ягайло принял титул польского короля.

Кревска уния была великым политичным событием в истории Европы тых часов. Объєдинены силы Польшы и Литвы могли тепер не лем отбити дальший натиск німецкых грабежников, але и задати им, уж в недалекой будучности, цілковиту поражку.

На початку ХѴ столітня отношения Польшы, и Литвы с Тевтонскым орденом надзвычайно заострилися. Обі стороны готовилися до рішаючой битвы. Тота битва отбылася под Грюнвальдом в 1410 року и покончилася розгромом Тевтонского ордена. Объєдинены силы Польшы и Литовской державы задали німецкым грабежникам страшну поражку. Як свого часу Ледове побоище задержало посунение німецкых рыцарей в русскы земли, то тепер побіда одержана Польшом и Литовском державом под Грюнвадьдом, задала німецкому рыцарскому ордену сокрушительный удар, от якого он уж не мог поднестися.

Грюнвальдска битва єст одным из найбольшых событий всемирной истории. Была то, на сам перед, битва славянских народов с могучым Тевтонскым Орденом. Головном силом, с яком німцы встрітилися под Грюнвальдом, были полякы и русскы (украинцы, білоруссы и великоруссы, бо до Литвы належали Смоленск и другы великорусскы городы, як Брянск, Трубчевск и др.). Мож рахувати, што русскых и поляков в той битві брало участь приблизно поровну. Среди войск значну часть занимали украинскы отряды, што пришли ту зо всіх земель Украины, якы входили в склад Польшы (Галичина, Холмщина, Подолье) и Литвы (Волынь, Києвщина, Чернигово-Сіверщина и др.). Неумераючом славом покрыли себе в Грюнвальдской битві доблестны русскы смоленскы полкы.

Кромі поляков, русскых и литовцов, под знаменами Польшы и Литвы билися под Грюнвальдом чехы, моравы, силезскы славяне и татары. На челі одного из чешскых отрядов стоял будучий знаменитый вождь гуситов Ян Жижка.

В битві под Грюнвальдом славян объєдиняла велика идея борьбы против отвічных врагов и угнетателей славянства, и славяне добыли блестячий успіх; остановивши німецкий “Дранг нах Остен” на пару столітий.

Німецкий натиск на восток был остановленый, однако — лем на час. Прямым наслідником Тевтонского Ордена стала прусска держава Гогенцоллернов, што незадолго возникла в Прибалтикі, а потом объєдинена німецка империя, яка перетворилася на нашых очах в Третю империю” на челі с катом народов Гитлером.

Німецкы фашисты, завоювавши ряд европейскых народов, прагнут знищити и онімечити славянскы народы. В свойой ненависти до славян подлый и беспощадный враг катує и убиват миллионы людей, руйнує городы и села, вынищує культурны цінности славянства. Но николи славяне не будут німецкыми рабами. Уж недалекий тот час, коли гитлеризм буде остаточно розгромленый. Наслідуючи примір мужества и бойове єдинство своих славных предков — побідителей под Грюнвальдом, славяне отограют и в том розгромі свою почесну роль.