Украинске козацтво в XѴІ—XѴІІІ столітиях высунуло ряд выдатных полководцов, якы отограли велику роль в борьбі против турецко-татарскых наіздников. Особливо вславился в той борьбі гетман Петро Конашевич-Сагайдачный.

Починаючи с конца XІѴ и до початку XѴІ столітия турецкы султаны завоювали славянскы державы на Балканском полострові, Валахию, Константинополь, Кафу (на місці днешной Феодосии в Крыму) и весь Крым, устья Дуная и Дністра, всю Молдавию з Буковином. В другой половині XѴ столітия роспочалися турецкы напады на подвладны Польші украинскы земли — Подолье и Галичину. Турецка навала, як и монгольска, “загрожувала всему европейскому розвитию” (К. Маркс и Ф. Енгельс, творы, г.ѴІІ. стр. 276).

Одночасно украинскы земли, што были под властьом Литвы, почали дознавати нападов зо стороны Крымского ханства. Татарскы феодалы (паны) майже каждорочно повторяли свои напады на Украину, палили и пустошили міста и села, брали тысячы людей в ясыр и продавали их на восточных рынках або выкорыстували, як рабов в свойом господарстві в Крыму.

Тоты турецко-татарскы напады перетворили величезну территорию южно-восточной Украины по нижному и середному течению Дніпра и южному Бугу в пустыню.

Но прото турецкым султанам и крымскым ханам не удалося поглотити Украину. В том велика заслуга украинского козацтва, вольного вооруженного населения южно-восточной Украины, яке стало воєнным барьером от навалы татар и турков не лем для самой Украины, а и для другых крайов Европы.

Зародившися ище до XѴІ столітия, козацтво скоро взрастало в основном из селян, якы утікали от панщизняного гнета и концентрувалися в южно-восточной части Украины — Каневскому, Черкасскому и Брацлавскому повітах, дуже спустошеных татарами и не объятых панщизняным порядком.

Особливо прискорился рост козацтва послі Люблинской унии 1569 року, на основі котрой украинскы земли (Волынь, Брацлавщина и Києвщина) были оторваны от Литвы и присоєдинены до Польшы. Люблинска уния широко отворила двери польскым панам в Украину. Они захвачували величезны земли с селами и містами, остаточно закріпощували селян, утискали міста, насаджували католицизм.

В 1596 року на церковном соборі в Бресті была проголошена уния православной церкви с католицком. Польскому правительству и римскому папі допомагала в том зрадницка верхушка украинскых и білорусскых духовных и світскых феодалов (панов), котры, хотячи укріпити свои позиции в шляхетско-католицкой Польші, переходили в католицтво и полячилися. Украинский народ вперто боролся против навязувания му унии и католицтва, обороняючи православие. Тота борьба была направлена против наступу польского панства на Украину, який загрожувал ополячити украинский народ.

Жестокий гнет зо стороны панов выкликал массове бігство селян з Волыни, Полісья, Галичины на территорию восточного Подолья, южно-восточной Брацлавщины и Наддніпровья. Ку концу XѴІ столітия южно-восточна Украина покрыватся значном сколькостьом сел, хуторов и місточок зо силом вольного покозаченого населения. Козачилися также украинскы міщане и шляхтичы, незадоволены своим становиском.

Рост козацтва являлся великом загрозом для панов. Покозачение массы селянства, предовсім, позбавляло панов робочых рук, подрывало их господарство, убольшало сколькость “неслухняного”, “свавольного” населения, яке не признавало над собом власти шляхты и выступало разом зо селянством против ней. А до того козацкы походы на татарскы и турецкы земли заострювали отношения меж Польшом з одной, а Турциом и Крымом з другой стороны. Тыми походами татары оправдували свои напады на Украину, а Турция загрожувала Польші войном, якой Польша боялася и уникала, бо не мала для такой войны ни дост войска, ни средств. Нашовшися в таком положению, польске правительство рішило взяти часть найзаможнійшых козаков на державну службу и, надавши им даякы права, выкорыстати их як для поскромления козацкой “сваволи”, так и защиты своих границ на востокі от татар. Тото козацтво, взяте на державну службу, вписувалося в специальны реєстры, и длятого называлося реєстровым.

Но тым польске панство не досягло свойой ціли. Реєстрове козацтво не могло остановити козацкой “сваволи”. Сколькость козацтва и дальше взрастала; отбывалися дальше и його походы на турецкы и татарскы земли. Само реєстрове козацтво не было задоволене своим положением, бо права, якы надало му польске правительство, были уж ограничены, а права уж наданы беспрестанно нарушувалися. Не могло не отбыватися на реєстровом козацтві и незадоволение селянства и другых верств украинского народа пануванием польской шляхты, з якыми реєстрове козацтво было спороднене национально, связане вспольном культуром, религиом. Зрештом реєстрове козацтво и його старшина сами брали участь в повстаниях украинского народа против польскых панов.

В отповідь на наступ панов на территорию южно-восточной Украины козацтво в другой половині XѴІ столітия утворює за дніпровскыми порогами, то єст, за межами панувания шляхетской Польшы, свой центр — Запорожску Січ.

Запорожске козацтво было в поровнанию добри вооружене. В Січі были арматы, а серед козаков — прекрасны пушкари. Головне оружие у козаков становили шабли и рушницы, з якых они дуже цільно стріляли. Уживали также короткых копий и луков. Панцеров не носили. На суші особливу умілость и отвагу выявляли в битві табором, т. є. под прикрытием возов. Знамениты были з них воины и на морі. Флот козаков складался з лодок (човнов), т. з. чайок або байдарок. Чайка вміщала 50—70 людей.

Сучастникы малюют козаков, як людей сильных, вытревалых, неутомимых на войні, храбрых и отважных. Старовольский каже, што запорожцы, “коли встрічаются с турецкыми галерами (тогдашными воєнными кораблями), волят завсе загинути, як ганебно утікати або поддатися; длятого, навет маючи неровны силы, они не ухиляются от бою и часто перемагают.” По словам иншого сучасника, Боплана, “в бою они не щадили свого житя. Большинство з них умерало на полі чести.”

В первой четверти XѴІІ столітия козацтво стає могучом силом. Оно числило десяткы тысяч войска и обнимало всю южно-восточну Украину.

Борючись против польскых панов, козакы одночаснсо устроювали походы на турецкы и татарскы владіния. 3 надзвычайным мужеством и смілостьом переплывали они на своих легкых чайках через ціле Чорне море и несподівано появлялися коло берегов Анатолии. Украинска народна поезия дуже яскраво малює опасности, на якы были выставлены козакы в часі тых морскых походов. Вот пару такых рядков:

Тоты походы набрали особливого розмаху в другом и третьом десятилітиях XѴІІ віку, коли козакы “окурювали мушкетным дымом” Синоп, Трапезунд и саму столицу Турции — Константинополь, наганяючи страху на турков и на того самого султана, перед котрым тремтіли Польша и иншы европейскы державы.

В 1614 року близко двох тысяч козаков на 40 чайках напали на Синоп, захопили замок, знищили гарнизон, спустошили місто и спалили турецкы корабли. В 1915 року на 80 чайках они предприняли поход на Константинополь и перед очами турецкого султана спалили гавани Мизевны и Архиокы. Розгніваный султан приказал свому флоту знищити козаков. Турецкы корабли догнали их коло устья Дуная. Але козакы сміло вступили в бой, захопили турецкы галеры и взяли в плін самого турецкого адмирала. В 1616 року козакы взяли Кафу, а незадолго послі того предприняли удачный поход на Трапезунд.

В тот сам период запорожскы козакы устроювали походы против турков и татар и вспольно з донскыми козаками. Тоты походы были выразом тых звязей, якы истнували меж донцами и запорожцами ище з давных часов и якы с часом поширювалися и укріплялися.

Мож сміло сказати, што козацкы походы первый раз и навсе подорвали престиж воєнной силы турков и розвіяли загальну думку про их непобідимость. На требование султана польске правительство в свойом договорі с Турциом в 1617 року под Яругом, обовязалося успокоити и знищити “козацкых розбойников”. Зобовязание тото было для Польшы понад єй силы и выполнити она го не могла; кромі того, польске правительство взагалі не желало знищити цілком козацтво, бо оно было головном, а часто єдином силом, што защищало границы от татар.

Прото польске правительство робило всьо, штобы найтіснійше покорити козацтво свойой власти и ограничити його сколькость. Але тоты усилия были марны: козацтво убольшалося числом, а разом с тым зростала и його сила. Сила його показалася в первой половині XѴІІ столітия, особливо в борьбі против Турции и Крыму.

И вот именно в тот период росквіту славы козацтва и розвилася діятельность вызначного полководца Петра Сагайдачного.

Появившися на Запорожу, он, як чоловік дуже розумный, образованый, надзвычайно храбрый, енергичный, зо желізном вольом, скоро занял вызначне місце среди козаков. Незадолго был выбраный гетманом, якым, з даякыми перерывами, оставался десят роков.

Один из представителей управляючых магнатскых кол Польшы — Яков Собєский (отец короля польского Яна Собєского), який особисто знал Сагайдачного, пише про него, што он был чоловіком рідкой мудрости и зрілого суждения в ділах”, “дотепным в словах и учинках”, “простым способом житя и привычками”, надзвычай смілым, який “глядал опасностей, зневажаючи житя” и был “первым в нападі, а в отступі послідным.”

Первым великым ділом Сагайдачного, як гетмана, был в 1616 року світлый поход на Кафу, што тогды входила в склад Крымского ханства. Город тот был світовым рабскым рынком, где отбывалася широка торговля людми, захвачеными татарами на Украині. Ту перебывал турецкий беглер-бег (генерал-губернатор) з великым турецкым гарнизоном, бо Крым был в вассальной зависимости от Турции. И вот козакы на челі з Сагайдачным, спустившися на чайках по Дніпру в Чорне море, обогнули Крымске побереже, ударили на Кафу и взяли єй. Сакович так оспівує поход Сагайдачного на Кафу: 

В 1620 року Сагайдачный на челі 5 тысяч козаков предпринимат сухопутный поход на Крым. Бой отбылся по сей стороні Перекопа, под самом стіном города. Козакы розгромили и знищили много татар и высвободили с пліна велике число невольников.

Того самого року почалася нова война меж Турциом и Польшом. Коронный гетман польский, головнокомандуючий польской армии Жолкевский вырушил за Дністр. Але туркы розбили польске войско. Сам Жолкевский был убитый, а його заступник, польный гетман С. Конецпольский и ряд другых воєнных начальников были взяты в плін.

Украинский літописец, сучасник тых подій, пояснювал поражку Жолкевского тым, што он враждебно был настроєный до козаков, зо зневагом отнюсся до их помочи. Он нибы говорил: “Не хочу з грицями воювати! Най пасут свині и орют землю.” Не показували охоты воювати по стороні Польшы и сами козакы на челі зо старшином, што были незадоволены политиком польского правительства.

Корыставши з войны Польшы с Турциом, козацтво постановило привернути на Украині православну церковну єрархию, скасовану послі Брестской унии 1596 року. В тот час, повертаючи з Москвы, через Києв проізжал єрусалимский патриарх Феофан. Патриарх высвятил на всі православны кафедры Украины, Литвы и Білоруссии епископов, а Йова Борецкого, ректора Києвской братской школы, высвятил в сан митрополита києвского. Вызначну роль в том ділі отограл Сагайдачный.

Отновление православной єрархии было важным политичным актом, скеруваным против католицко-униатской политикы польского правительства на Украині. Польске правительство и униатске духовенство почали утискати новопоставленых православных епископов. То привело до великого заострения отношений меж польскым правительством, католицкым и униатскым духовенством и шляхтом, з одной стороны, и украинскыми міщанами и козацтвом — з другой. Штоправда, под вплывом росту турецкой загрозы в тых отношениях незадолго сталися значны зміны.

Послі поражкы Жолкевского Польша нашлася в критичном положению. Поширилися слухы, што сам молодый турецкий султан Осман готовится з величезном армиом вырушити в поход против ней. Росходилося о саме истнование Польшы. Тогды польске правительство постановило дораз звернутися за помочом до козаков. Велику надію оно покладало на Сагайдачного, што нераз отзначался в борьбі с татарами и турками. Хотя в тот час Сагайдачный не был гетманом, лем полковником, но вплыв на Украині он мал великий.

Штобы обсудити пропозицию польского првительства, в юні 1621 року в Сухой Дуброві была скликана рада. Кромі козаков, козацкой старшины, гетмана Бородавкы и Сагайдачного, в раді брало участь много православного духовенства. Участникы рады добри розуміли, што турецкий поход на Польшу загрожує насамперед козацтву, бо турецке правительство желало знищити козацтво и заселити Украину мусульманами. Рада ухвалила взяти участь в войні против Турции. Але разом с тым выбрала посольство на челі с Сагайдачным до польского короля. Оно мало представити ряд требований, а головне — заперестание утисков против религии и утверждение новопоставленых єрусалимскым патриархом православных епископов и митрополита.

Раду в Сухой Дуброві описал ксьондз Оборницкий, королевский агент, што был на ней разом с послом Обалковскым.

“Першого дня, — пише Оборницкий, — говорил пан Борецкий (митрополит києвский — К. Г.) з великым взрушением, дуже сильно, скаржачися на Річ Посполиту и короля, што их стару и святу віру гнетут, нищат, допчут. Вынял писмо, прислане вольнянами и прочитал реєстр, сколько там побито за віру, сколько посажено во вязницу, сколько кинено в ямы. Потом Сагайдачный вынял писмо патриарха (в том писмі патриарх на прошение короля умолял козаков взяти участь в войні против Турции. — К .Г.), наперед його поцілувал, потом, як прочитал, положил собі на голову. Тогды раптом счинился крик: присягали всі, што обороняти будут свою віру аж до горла.

Другого дня привели в середину кола королевского посла. Поставили для него дві діжкы ци бочкы деревяны и застелили килимами. Коли он выголосил коротку бесіду, пан гетман Бородавка приказал стріляти з рушниц и армат, и тота стрілянина тревала без перервы цілы дві годины. По закончению єй складали присягу, што будут вірны королю и в теперішной потребі Річи Посполитой готовы на всяку службу, коли сполнены будут их прошения.

Третього дня призначили сотников, полковников, атаманов, есаулов и послов до короля: пана Сагайдачного, пана Курцевича и ище двох. Головна справа посольства, “штобы король утвердил на митрополии и владицтвах высвяченых патриархов; инакше будут брати в неволю шляхту, як им порадил Борецкий”.

Посольство выіхало до Варшавы, а козацке войско числом 40 тысяч чоловік на челі з Бородавком вырушило в поход на помоч польской армии. Козакы по дорогі нападали на шляхетскы маєткы. Ксьондз Оборницкий с того поводу писал: “Треба дуже боятися, штобы козакы не учинили даякого великого повстания и не сталася хлопска война. Дуже они ту роспаношилися и все больше взрастат их смілость и сваволя, коли увиділи они себе в таком числі и силі. Бородавка в свойой бесіді на той свойой раді сказал: “Перед войском запорозкым трясеся земля польска, турецка и цілый світ.”

Тым часом польска армия подошла ку Дністру. Войсковы инженеры почали будувати мост через ріку, але безуспішно: они не могли справитися з быстрым течением рікы. Один украинец-селянин, який молчкы на всьо то позерал, пришол им на помоч, предложивши свои услугы. Незадолго мост был готовый, и польске войско з обозом и артиллериом переправилося на молдавский берег Дністра, под Хотин.

Козацке войско не хотіло объєдинитися с польскым, покаль оно не переправится через Дністр; козакы боялися зрады зо стороны поляков. Але и послі того, як полякы перешли Дністр, козацке войско не соєдинилося з ними, хоц польске командование, занепокоєне отсутностьом козаков, не раз посылало до них гонцов.

Головнокомандуючий польскых войск, литовский гетман Ходкевич нетерпеливо ждал на Сагайдачного. Послі встрічи с королем Сагайдачный просто з Варшавы вырушил на театр воєнных дійствий. Прибытье його в польский табор под Хотимом “немало додало отвагы”, — пише участник походу Яков Собєский. Выіхавши отталь глядати козацке войско, Сагайдачный натрафил на турецкы отділы и мало што не згинул, получивши серьозне поранение в руку.

Коли Сагайдачный прибыл в козацкий табор под Могиловом на Дністрі, рада позбавила Бородавку гетманства и натоміст выбрала Сагайдачного. Послі того козацке войско отразу рушило до Хотина для объєдинения с поляками.

В козацком войску под Хотином числилося близко 40 тысяч людей. Польского войска было коло 35 тысяч. Козацка артиллерия была ліпша от польской. А турецке войско числило приблизно 150 тысяч людей. Кромі того в його складі было пару десяток тысяч татар.

Бои под Хотином были дуже запеклы и тревали майже цілый місяц вересень. Козакы показували в них надзвычайну смілость и отвагу. Отбивши первы атакы турков, што были скеруваны головно против них, козакы сами 4 вересня перешли в атаку и вдерлися в турецкий табор. “Послі несподіваного вторгнения запорожцов в табор Османа, — пише Яков Собєский, — турков охопила паника: люде всіх звань и станов были в неимовірной тревогі. Сам Осман, який ище не так давно думал, што ніт в світі больше могучого от него, тепер на власны очы увиділ цілу непевность свого положения, и попередна зухвалость змінилася женскыми скаргами, коли он переконался в марности своих надій. Розвіялося його рыцарство, с помочом якого он надіялся не лем побідити польске войско, а завоювати цілу земну кулю; тепер лишилася лем одна надія на безславный мир.”

Прото бои тревали, хоц не могли уж забеспечити побіду Осману. Длятого он згодился на мирны переговоры, и 9 октобра 1621 року договор был подписаный.

Хотинский поход отбил и остановил турецку навалу на Европу. Цілый европейский христианский світ оцінювал тот поход, як світлу побіду над найсильнійшым, непобідимым до сего часу, врагом. В успішном закончению Хотинской кампании рішаючу роль отограло украинске козацтво под проводом Сагайдачного. Тото открыто признавали и в Польші. “Слава их (козаков), — пише Яков Собєский, поширилася далеко среди разных народов.”

Хотинский поход был послідным ділом Сагайдачного. 20 апріля 1622 року он помер в Києві от раны, яку получил в часі того походу. Як вірный сын свого народа, перед свойом смертью он записал значну часть свого маєтку (пару тысяч золотых) для розвития украинской культуры — Києвской и Львовской украинско-православным школам.

Сагайдачный войшол в историв Украины, як талантливый полководец, добрый политик, защитник родной культуры, як чоловік, што, не зважаючи на свою принадлежность до шляхетско-старшинского классу и на тото, што, в силу условий часу, поддержувал мирны отношения с польскыми панами, завсе оставался патриотом свойой отчизны, боролся за родный край.

Про Сагайдачного, як полководца и патриота Украины, козацтво завсе было высокой думкы. Именно його на раді в Сухой Доброві козацтво призначило на челі посольства до польского короля, а потом, перед самым походом под Хотин, знов выбрало гетманом.

Удачны походы на турецко-татарскы владіния и, особливо, Хотинска побіда поставили Сагайдачного в ряд найвызначнійшых полководцов, геройов украинского народа. Память о нем завсе жити буде с сердцах всіх совітскых патриотов, якы за свою отчизну готовы на всі жертвы.

В дни великой отечественной войны мужественный образ Сагайдачного запалює наш народ на беспощадну борьбу против гитлеровскых варваров, якы пробуют поневолити цілый світ и обернути свободолюбивы народы на рабов німецкых империалистов.