Тепер часто можеме читати в американской прессі, што “русскы вертают до национализму”. Што они называют у русскых “национализмом”?

У русскых они называют национализмом горячий патриотизм народа и рост национальной гордости. Но то не єст национализм в нашом понятии. В нашом понятии национализмом называют — шовинизм. В западной Европі всі шовинистичны партии носили назву “национальных”. То были тоты партии, котры хотіли панования над другыми народами. То были попередникы фашистскых партий. Ку Гитлеру примкнули найперше німецкы националистичны партии — німецкы националисты с идейом “Дейтчланд ибер аллес” — Германия понад всіх. Німецкы националисты были попередниками днешного німецкого фашизма. Гитлер назвал свою партию “национал-социалистичном”.

Ци мож говорити о таком русском национализмі, о повороті до такого русского национализма, як национализм німецкий, або другий западный национализм? Ци мож поровнувати тот национализм у западных народов зо совітскым патриотизмом и ростом национальной гордости не лем у русского, но и у другых совітскых народов? Розумієся, што ніт. Такий национализм, якым хвалятся німцы або друты западны народы, як не мал так и не має місца в Совітском Союзі. При таком национализмі понижания слабшого народа сильнійшым, панования сильнійшого народа над слабшым, поневоления слабшых народов сильным народом в державі — в Совітском Союзі пановал бы над другыми народами народ русский, як то мало місце в панской Польщі. Єсли бы то мало місце в Совітском Союзі, то другы народы не могли бы быти патриотичными в войні Совітского Союза против гитлеровской Германии, як не были патриотичны в Польші украинцы и білоруссы, и Совітский Союз при найбольшом русском “национализмі” не змог бы оборонитися против німецкой воєнной машины. Но мы днеска видиме, што в Совітском Союзі всі народы патриотичны и не уступают один другому в патриотизмі. Не меньше патриотичны от великоруссов білоруссы и украинцы, грузины и армяне, казахы и татаре.

Так што-ж называют нашы “знатокы” у русскых “национализмом”? Национализмом называют у русскых — национальну гордость. Но национальна гордость не єст национализм в западном смыслі. У німецкых “наци” ніт ани за одного цента национальной гордости. Бо национальна гордость єст сильно связана с национальном честью. Чоловік, стративший честь, тратит свою гордость, чоловіче достоинство. Німцы, при свойом диком национализмі стратили национальну гордость, национальну честь и своє людске достоинство. Німецкий национализм знищил у німецкого народа всьо то, на што німцы могли быти национально горды, знищил всьо, што лем припоминало у німецкого народа людску культуру, прогресс, світло, знищил у них чувство людского достоинства.

На што днеска може быти гордый німецкий народ? Може на людоіда Гитлера и його книжку “Мейн Кампф”? На тых зогнаных несчастных невольников в Германии и на их невольничий труд? На тортуры людей, якых не знала история світа зо самого свого початку? На убийства миллионов безборонных людей, меж ними стариков, женщин, и дітей? На страшне знищение спокойных крайов, міст и сел? На такы діла не може быти гордый найгорший дикун.

Так што німцы, своим дикунскым национализмом, котрому имя фашизм, стягли на себе вічный стыд и проклятие людства, а всьо потому, што тот их дикий национализм позбавил их национальной гордости и национальной чести.

Русский национализм, о котром нам тепер пишут, то не национализм западного типа — панования над другыми, поневоления слабшых, а освобождения и помочи другым народам, зровнания их. Национальна гордость русскых не позвалят им нищити у другых народов то, на што они национально горды, их национальну культуру, язык, национальны культурны памятникы. Напротив, национальна гордость русскых на их культуру, змушат их помагати другым народам розвивати свою.