Больше як пол віка водил Кутузов русскых солдат в битвы — на Балканах и побережу Чорного моря, в придунайскых степах и на бастионах Измаила, в Центральной Европі и на российскых просторах. Долгы десятилітия будучий полководец командувал компаниом, батальоном, полком, корпусом, служил штабным командиром. Бесстрашный в боях, он был двараз тяжко раненый, солдаты выносили го в беспамятю с поля битвы, лікари приговорювали го к смерти, а могучий организм побіждал — Кутузов выздоровлювал, и хотя послі одного ранения стратил око, но вернулся в строй.

На основі долголітного служебного и бойового досвіду розвился могучий талант полководца Кутузова. Його учителями были замічательный русский фельдмаршал, послідуватель Петра I — Румянцев и гениальный Суворов.

Пару раз Кутузов оставлял армию, ставал дипломатом и в Стокгольмі, и в Берлині, а особливо в Константинополі, котрый был узлом дипломатичной борьбы европейскых держав, отстоювал интересы России, пером посла закріплял завоювания генерала. В рокы затишья на фронтах Кутузов участвувал в роботі державного совіта в России, з його именем рахувалися Екатерина друга и даже Павел первый, до його голосу прислухувалися в народі.

Кутузов был одним из самых образованых людей свого часу и ціле житя не переставал удосконалятися. Подорожуючи по Европі, он посіщал єй научны центры, встрічался з вызначнійшыми полководцами, в Петербургі дом Кутузова был широко открытый ученым, писателям, музыкантам, артистам, поетам, а любима дочка Кутузова стала потом другом Пушкина.

Кутузов знаный и як воєнный педагог. Будучи директором кадетского корпуса, он сам преподавал будучым офицерам тактику, воєнну историю, воспитал цілу плеяду учеников, котры в войні з Наполеоном стали найблизшыми помочниками Кутузова.

Тото рідке сочетание талантов стратега и дипломата, педагога и державного діятеля позволило Кутузову правильно розбератися в складных межнародных обставинах, рішати трудны стратегичны задачы, вести за собом армию и народ на борьбу з Наполеоном в войні 1812 року, коли рішалася судьба России и европейского континента. В войнах з Наполеоном Кутузов командувал войсками, котры были обучены суворовской “наукі побіждати”; слідуючи суворовской воєнной штукі маневра и сокрушительного наступления, Кутузов примінял стратегию и тактику активной обороны, тактику отхода для дальнійшого суворовского наступления и цілковитого знищения врага.

Битвы Кутузова з Наполеоном отбывалися в неровных для русской армии, а часом в дуже тяжкых условиях. В 1805 року Наполеон, який стремился до панования над світом, сконцентрувал свои корпусы на берегу Ла-Манша и заявил, што он высадится на английском берегу и сокрушит британску силу. На помоч Англии пришла Россия; в их коалицию вступили Австрия и Швеция. Кутузов с 50-тысячном армиом рушил через Польшу, через нынішню Чехословакию в глуб Австрии, штобы соєдинитися в кріпости Ульм з австрийском армиом генерала Макка.

Узнавши о том, Наполеон также рушил под Ульм. Первый раз шли навстрічу собі, штобы столкнутися в бою, могучий император Франции и великий русский полководец. Тысяч километров русскы войска шли майже без отпочинку, без огляду на осень и бездороже, робили назначены 60 верст на добу. Кутузов подходил под Браунау, коли, узнал, што огромна австрийска армия в Ульмі ганебно капитулювала. Тепер против 50-тысячной армии Кутузова, змученой тяжкым походом, Наполеон двинул 200 тысяч солдатов под командом ліпшых, уж прославленых маршалов Франции. Треба было спасати русскы войска от окружения и гибели. Кутузов повернул от Браунау назад, ку городу Цнайму, штобы соєдинитися с подходившыми из России резервами. Його настигали авангарды Наполеона, союзникы австрийцы не давали ни хліба, ни подвод.

Наступила мокра осень. На маршу Кутузов узнал, што Наполеон перекинул корпус Мортье на лівый берег Дуная, штобы не пустити русску армию за Дунай, а головными силами притиснути єй ку Дунаю на правом берегу и знищити. Кутузов обогнал Мортье, встиг перейти Дунай и взорвал за собом мосты. Тепер вся русска армия осталася сам на сам с корпусом Мартье, розгромила го на очах у встеклого от бессильной злости Наполеона и откинула го за Дунай.

Первый раз за долгы неділи тяжкого похода солдаты росположилися на отдых, но скоро Кутузову донесли, што на його армию знов надвигатся катастрофа. По приказу Наполеона маршалы вступили с австрийцами в переговоры о мирі, в часі котрых захватили єдиный мост коло Відня. Французскы корпусы рушили ку Цнайму, для отрізания русской армии от идучых из России резервов.

Кутузов дораз приказал генералу Багратиону прегородити дорогу французскым маршалам и задержувати их до того часу, покаль русска армия прорвеся ку Цнайму.

Багратион выполнил приказ. Он “цілый день и половину ночи бился против цілой французской армии” (Енгельс).

Находившийся в авангарді маршал Мюрат, боячись, што Кутузов выслизнеся, пустился на хитрость и через парламентеров предложил Кутузову остановитися и начати переговоры о мирі. Кутузов согласился, начал пороговоры з Мюратом, вынудил його тым збавити час, а сам рушил вперед и выпровадил армию из окружения.

Наполеон пришол в встеклость. Он увиділ, што знов на очах цілой Европы Кутузов уходит, зробивши з него дурня, и возновил атакы. Арьергард Багратиона гинул, но продолжал держати противника; сами фрацузы назвали корпус Багратиона “дружином геройов”. Коли армия Кутузова достигла Цнайма, Багратион собрал оставшых при житю солдатов, пробился из оточения, догнал Кутузова и припровадил зо собом 50 плінных французскых драгунов, 2 французскых полковников и трофейны французскы прапоры.

На протягу 400 километров Кутузов ціном “мастерскых рухов” (Енгельс), уводячи русску армию, змусил Наполеона роскидати свои корпусы, спас свои войска и добился стратегичного успіха.

Через сім літ, в 1812 року, на полях битв знов встрітилися Кутузов и Наполеон. Русска армия с тяжкыми боями отходила ку Москві. Оставлена была Білоруссия, в руинах лежал спаленый оставленый Смоленск, до Москвы оставалося пару переходов, близился кризис войны. В такых условиях Кутузов был назначеный головнокомандуючым вооруженными силами России.

7 сентября на Бородинском полі он дал Наполеону генеральну битву. Русска армия на бородинской позиции перехватувала нову cмоленску дорогу и стару, ведучу зо запада ку Москві. У Можайска обі дорогы сходилися, и мож было, наступаючи по старой смоленской дорогі обыйти лівый фланг и тыл русской армии, отрізати єй от Москвы, выставляючи єй на поражку. Наполеон, все стремившийся к обходному маневру, ту от него отказался. Он постановил фронтальном атаком прервати ліве крыло русской армии коло села Семеновска и потом обыйти головны силы Кутузова, росположение в центрі и на правом флангі, притиснути их ку берегам рікы Москвы и знищити.

Кутузов виділ опасность, яка грозила лівому флангу, на старой смоленской дорогі коло села Семеновска, он оставил свои головны силы на правом флангі, близко новой смоленской дорогы. Многы историкы рахували тото головном помылком Кутузова, но Кутузов писал, што пойде на генеральну битву, єсли Наполеон не буде його обходити. “Но єжели он, найдя мою позицию кріпкою, маневрировать будет по дорогам, идущим к Москві, тогда должен буду итти и стати позади Можайска, где всі сии дороги сходятся.” И там, на правом флангі и за центром свойой позиции, Кутузов оставил моцны резервы, бо Кутузов рахувал, што “тот генерал, котрый сохранил ище в своих руках резерв, не побіжден.”

Так в рішаючой Бородинской битві, котра была для русской армии оборонительном, в котрой инициатива повинна была належати наступуючому Наполеону, Кутузов позбавил го той перевагы и сохранил можность маневра и контрудара с каждой стороны, чым принудил Наполеона на кровопролитне фронтальне наступление.

Наполеон атакувал ліве крыло позиции Кутузова, котре обороняла армия Багратиона. Сім раз кидалися французскы корпусы в наступ и откочувалися под контрударами Багратиона, який принял на себе и отражал головный удар французской армии. В часі осмой атакы смертельно раненый Багратион пал. Його дивизии, стративши командира, отходили. Император отдал приказ: “Гвардию в огонь!” Головный резерв французской армии — императорска гвардия, рушила в наступ. То грозило гибелью русской армии. Кутузов, узнавши о грозившой лівому флангу його армии катастрофі, кинул на лівый фланг Наполеона козачий корпус Платова и кавалерийский корпус Уварова. Они посіяли панику среди французов. В страху за свой лівый фланг Наполеон остановил гвардию, потратил час, а Кутузов перевюл свой резерв ку лівому флангу и вернул ровновагу битві.

Через пару годин Наполеону удалося ціном огромных жертв захватити центральну батарею Раевского, котру обороняли войска Барклая-де-Толли. Барклай ставил завзятый опор, но, стративши віру в успіх, послал адъютанта до Кутузова за дозволом отступати. Што было робити полководцу Кутузову? Он знал, што всі укріпления нашлися в руках французов. Русскы войска понесли тяжкы страты, найблизший друг и помочник Кутузова, командуючий 2-м армиом Багратион, смертельно раненый и унесеный с поля битвы, а другий його помочник, командуючий 1-м армиом Барклай, наперат отступати. Заміст приказа отступати Кутузов дал приказ готовитися в контрнаступление.

Насколько правду мал Кутузов, видно из поведения Наполеона. Маршалы требували у него кинути в бой императорску гвардию. Уступуючи их требованиям, Наполеон выіхал ку батареі Раевского и посмотріл на позицию армии Кутузова. Так они стояли один против другого — два полководцы, розділены полем битвы и воля Кутузова, поднимавша в контрнаступление русскы войска, оказалася сильнійшом от воли французского императора.

Наполеон посмотріл на строившыся русскы полкы и отповіл своим маршалам:

— Я не можу рискувати своими послідными резервами три тысячы километров от Парижа.

Наполеон приказал оставити Бородинске поле, на котром стратил 58 тысяч убитых и раненых солдатов и 47 генералов. Кутузов на Бородинском полі подорвал наступательну силу французской армии, змусил єй отойти в исходне положение ку селу Шевардино и добился стратегичной побіды. Всі ждали зрана контрнаступу на французов, но Кутузов ночом поднял армию и отошол ку Москві.

Ясным сентябрьскым днем Кутузов стоял на вершині Поклонной горы. Перед ним была Москва. Кутузов розуміл, што борьба ище впереди, треба хранити русску армию, рішаючу силу в той борьбі.

Кутузов уміл видіти не лем зовнішню сторону войны, он проникал в характер войны, в природу войны. Он виділ, што силы русского народа ростут, а силы Наполеона вычерпуются. Он знал, што русскы селяне уж наносят сокрушительный удар по стратегии Наполеона, одном из основ котрой было заосмотріние армии на рахунок завоюваной краины. Война кормит войну, говорил Наполеон. И так направду было во всіх краях Европы. Но в России селянин палил хліб, жилища, уходил в лісы, почал беспощадну борьбу и армия Наполеона терпіла бідствия.

Кутузов, як никто другий, розумл Наполеона, котрый привык в Европі кончати войну захватом великых городов. Кутузов предвиділ, што Наполеон буде ждати мира в Москві. В тот сам час русский полководец, як никто другий, вірил в силу и конечну побіду русского народа. Но треба было продолжати заманювати Наполеона, вычерпувати го, выкорыстуючи пространство и час для соберания своих сил. Всьо тото давало Кутузову внутренню силу, штобы приняти тяжке рішение — оставити Москву и отходити по Рязанской дорогі.

Французскы корпусы заняли Москву, император поселился в Кремлі. Но скоро пожар обнял Москву. За Москвом, охватуючи одно село за другым, розгорілся пожар партизанского руху.

Кутузов первый в воєнной истории так широко организувал взаимодійствие партизанскых отрядов с отрядами селян, што их удары мали огромну стратегичну вагу. Послі Бородинского боя партизаны знищили и взяли в плін понад 30 тысяч французов. Єсли взяти на увагу, што из 58 тысяч французов, выбывшых из рядов под Бородином, значна часть раненых вернулася в ряды, а партизаны выводили з рядов французов “бесповоротно”, можно рахувати, што русский селянин дал Наполеону другу генеральну битву.

Тогды Наполеон почал в тревогі думати: где-ж русска армия? Маршал Мюрат на його приказ догнал козачий арьергард Кутузова, откинул козаков и увиділ, што дорога на Рязань пуста. Кутузов выконал гениальный фланговый маневр, звернул з Рязанской дороги на Калужску, отрізуючи Наполеону пути во Францию.

В ході войны было видно перелом. Побідила полководска штука Кутузова, основом котрого были, в условиях борьбы с переважаючыми силами противника: вытревала оборона, широкий стратегичный маневр по-за поле бою на коммуникации врага, переход в наступление и сокрушительных розгром врага.

Наполеон понял, што треба як лем можно скорше миритися, пробувал вести переговоры, терпіл неудачы и, наконец, посылаючи свого министра до Кутузова, он, заміст звычайных грозьб, взмолился: “Мі потребный мир, потребный за всяку ціну. Спасайте лем честь”

Кутузов принял Лористона дуже гречно, взял от него два писма Наполеона — одно адресоване Кутузову, друге — Александру I, и почал с Лористоном бесіду о погоді, о Парижі, о французскых женщинах, о чом угодно, лем не о войні.

Лористон гречно напомнул му, што одно из писем адресовано Кутузову лично. Старый фельдмаршал открыл писмо, прочитал и, граючи конвертом, знов завюл бесіду о розрывках, театрі, женщинах и вспольных знакомых. Забывши о дипломатичном етикеті, Лористон різко зауважил, што он приіхал говорити о мирі, но Кутузов отповіл, што русскы лем починают войну и не закончат єй до того часу, покаль хоц лем один французский солдат останеся в России.

Кутузов дал поняти Лористону, што за ним стоит непокорена Россия и што он знає положение в Европі, яка тяготит владычеством Наполеона. Перед Лористоном был мудрый полководец и дипломат, и Лористон почувствувал, што в пухлых руках старого фельдмаршала не лем писмо французского императора, но и судьба французской армии, и што ту, в маленьком русском селі Леташевкі, а не в столиці, рішатся исход войны, рішатся судьба Европы.

Кутузов отказался говорити о мирі. Наполеон покинул Моску, пустился ку Калугі, штобы розбити армию Кутузова, зимувати на Украині и знов начати борьбу в 1813 року. Вот тепер Кутузов перешол от обороны в наступление. В завзятом бою под Малоярославцом он остановил французску армию и откинул єй на опустошену Смоленску дорогу.

Почалося ганебне бігство Наполеона. “Мог бы я гордитися, што от мене первого біжит Наполеон! — писал Кутузов жені — но Бог смиряет гордыню”. Великий полководец гнал французов до самой границы. В боях под Смоленском, под Красным он нанес послідны сокрушительны удары Наполеону. Огромна Смоленска дорога стала цминтарищем великой французской армии. Кутузов привюл побідоносну русску армию в город Вильно, откуда написал:

“Война закончилася полным истреблением неприятеля.”

Рухнула огромна имперя Наполеона, посягнувшого на истнование России. Русскы войска вступили в Париж.

Прошли рокы, прошли десятилітия, минул вік. Русска армия в 1912 року празднувала столітие Бородинской побіды. Организаторы праздника узнали, што в городі Кишеневі близко казармы 55-го Волынского полка проживат 128-рочный старик Антон Винтанюк, участник Бородинской битвы. Просмотріли архивны документы и установили, што направду тот Винтанюк, ефрейтор того самого 55-го Волынского полка, потом фельдфебель, бился на Бородинском полю. Он был тяжко раненый коло села Семеновске, где послі боя його нашли селяне и вылічили.

Коли армия Кутузова шла в наступ, Винтанюк вернулся в свой полк, пошол з русском армиом в Европу, побывал в Варшаві, штурмувал Берлин, брал участь в битві народов под Лейпцигом, прошол на параді русскых войск по Елисейскым полям в Парижі и послі полной побіды в Европі вернулся в Россию. Загоралася война на Балканах, и Винтанюк воювал там, ходил в польский поход, участвувал в боях на Кавказі, и, наконец, герой Бородина стал геройом обороны Севастополя.

Винтанюка привезли в Москву, и на параді войск он стоял на правом флангі Волынского полка на Бородинском полю, котре он оборонял, на том самом місті, котре он сто літ тому назад обагрил свойом кровью.

Послі парада Антон Винтанюк в числі гостей пришол ку памятнику Кутузову, коло котрого собралися царь и його свита, генералы и министры, корреспонденты, воєнны аташе и представители держав всего світа. Всі они, забывши о великоліпном параді, не звертаючи увагы на царя, с подивом смотріли на русского чудо-богатыря.

Стародавный старик-великан стоял, возвышаючись над гурмом вельмож и заграничных гостей, затуманеным взором виділ холмы Бородинскогуо поля и через столітие виділ на них страшне кипіние зударвшыхся в бою людей и коней.

Знов пробігли рокы, прошли и десятилітия, и в 1941 року на Бородинске поле знов пришли русскы солдаты. Форсуваным маршом прошли они мимо памятника Кутузову, штобы по приказу товариша Сталина отразити натиск бронированных колонн фашистской армии, яка рвалася ку Москві. В тяжкы дни бойов за Москву памятают свого вождя призыв:

“Най вдохновляє вас в той войні мужественный образ нашых великых предков — Александра Невского, Димитрия Донского, Кузьмы Минина, Димитрия Пожарского, Александра Суворова, Михаила Кутузова! Най осінит вас побідоносне знамя великого Ленина!” Бойцы отстояли в жестоком бою Москву, подорвали офензивну силу войск Гитлера. Зимом 1942-43 р. в новых боях за Родину до высот воєнного искусства поднялися генералы и офицеры Красной Армии, и грудь их украсили ордены Суворова и Кутузова.

В часі битвы у Бородина совітскы воины были собраны в Бородинском музею, який был оберненый в передовый госпиталь. Над головами раненых геройов бородинскых бойов 1941 року склонялися портреты геройов Бородина 1812 року. Раненым героям роcповідали о Бородинской битві, о Антоню Винтанюку, и они, полявшы свойом кровью землю, где сто тридцет літ назад проляли кров солдаты Кутузова, восхищалися героизмом своих предков, не думаючи, в великой скромности свойой, о том, што в невиданой борьбі з німецкыми танками, натиск котрых они отразили под Москвом, воины Красной Армии возродили героизм солдатов 1812 рока, умножили славу русского оружия и слава тота знов пройде через столітия и буде звучати вічно.