Русь вела многы войны, многы отразила нашествия на свои земли, из востока и запада. Но ище николи в свойой истории не вела Русь таку тяжку войну, не отразила таке страшне нашествие, як днеска за нашого часу, в войні против гитлеровской Германии и єй фашистскых союзников. Бо нам все треба памятати, што Совітский Союз веде войну не лем против самой объєдиненной Германии и єй “непобідимой” армии, а и против Румынии, Венгрии, Финляндии, котры кинули всю свою воєнну силу разом з гитлеровском воєнном машином на Совітский Союз. Но за том их объєдиненном воєнном машином, и поодинокых дивизий остальных держав — стоит и працує на тоту огромну воєнну машину вся захвачена Гитлером Европа з близко 400 миллионами населения, зо всіми своими другыми ресурсами и з огромном индустриом всіх крайов европейского континента. То каждому треба знати, штобы собі мог представити, против якой силы веде войну Совітский Союз, бо тогды лем зможеме представити собі величие побіды и славы русского народа, яку он вынесе с той найтяжшой войны в свойой истории.

То нич дивного, што така сила шла так певна себе на завоювание русскых земель и поневоление народов Совітского Союза, што німецкы фашистскы бандиты змогли объєдинити німцов для той войны, мадьярскы фашистскы бандиты мадьяров, румынскы румын, финляндскы финнов. Та-ж всі они выбералися на легку войну, бо виділи страшну гитлеровску силу. Всі хотіли скорыстати в том бандитском поході — капиталисты великы земны богатства и заводы, паны поміщикы, як німецкы бароны, мадьярскы грофы, румынскы бояре великы обшары земли; роботникам своим обіцували, што єдны з них будут директорами фабрик и заводов, другы форманами и надзорцами над невольничыми русскыми, украинскыми, білорусскыми роботниками. Селянам обіцували добры земли, колонизацию на русскых землях, где они будут властителями земли, а робити на них будут русскы селяне.

Итак, майже каждый німец, каждый румун, каждый мадьяр шол на войну з великом охотом, смакуючи и обраховуючи наперед, сколько йому с того припаде. А в том, што Гитлер побідит, никто з них не мал найменьшого сомніния. Таж то сила, техника, машинерия — то німцы!

А мы, емигранты из Карпат, из бывшой Австро-Венгрии, знаме, што значил у нас и нашых славянскых сусідов німец! Вот што значил німец:

Якоси под осінь в 1942 року получаме писмо от одного нашого “діятеля”, “механика” и мудрагеля. Пише он, што задумал перестати читати нашу газету “Карпатску Русь”, потому што она не пише правду и обманює людей, бо им каже вірити в русску побіду над німцами. “Вы, каже, знате, што значит німец! Каждый німец механик, каждый німец знає машину, німцы дисциплинованы люде и над німецку армию ніт армии в світі. Русскы не можут ровнатися німцам под ниякым взглядом, и они мусят войну програти. А вы пишете, што німцы програют, як бы сте німцов не знали. . .” и т. д,

Было то тогды, коли німцы дерлися в Сталинград и на Кавказ за нафтом. Не можеме знати, ци тот наш мудрагель змінил днеска свою опинию о русскых и німцах, но он служит нам добрым приміром тых людей, што шли разом з Гитлером на Совітский Союз. Меж ними были и такы славяне, и такы руснакы с Карпат, як тот наш мудрагель, было такых дост, што вірили в “абсолютну высшость” німца над собом, над всякым славянином, а уж што до руснака, русского, “москаля”, то чоловік до ничого не способный.

Скади взялася у нас така наука? Таж Гитлера ище тогды не было.

Така наука была от німцов, от німецкых писателей, философов, политиков. Славянскым народам они передавали тоту отрову через своих агентов славянского роду. Они клепали в уха славянам, што німцы “высшы”, непобідимы люде, бо они наймудрійшы, найліпшы механикы и машинисты, найліпшы солдаты и мают найліпшых генералов. Над німца ніт чоловіка.

Мадьяров научили думати, што они дораз по німцах другий народ. А специально о русскых учили всіх думати, што то найпосліднійший народ, який єст на світі, абсолютно до “новой цивилизации” неспособный, а даяку машину му ани не показуй, бо дораз попсує.

Гитлера выпыртнула тота німецка “наука”. Гитлер свято тому вірил о німцах и русскых, што писали о них “учены” німцы.

Так што як Гитлер, так німцы, накормлены свойом “высшостьом”, так и мадьяре, румыны, финны, накормлены отровом той западной “цивилизации”, што хоц они не можут ровнатися расово з німцами, англичанами и “нордик”-ами, но все-таки они высшы от славян, а особливо русскых. Та и гдекотры славяне не хотіли уж быти такыми послідными, як русскы, так што дакотры чехы, полякы, а даже словакы, хоц признают свою “низшость” от німцов и “нордик”, але зато уважают себе “высшыми” от русскых. И тым объяснятся, што тоты полякы и чехы хотят панувати хоц лем над даяком частьом русского народа. Та даже нашы галицкы украинскы националисты хотіли бы приказувати России и Украині, як “высша” от своих братов раса, бо они німецкой школы, "западной цивилизации”.

Красна Армия очищат от фашистов Сталинград.

Так приготовлялися німцы в поход на восточно-славянскы земли для завоювания их и поневоления русского и другых совітскых народов. Для того похода они отровили и засліпили німецкий и другы народы дикунском науком о “высшых” и “нисшых” людях, о неспособности восточных народов до модерной индустрии, техникы и войны. И вот чом мы знали наперед, што, мимо огромной перевагы в людях, индустрии, воєнных машинах и другом оружию — німцы и их фашистскы союзникы стратят войну зо Совітскым Союзом, и што Совітский Союз выйде с той тяжкой войны з великом побідом и великом славом.

На Гитлера мы смотріли от самого початку, не як на даякого политичного або воєнного руководителя, а як на німецкого дикуна бандита, жаждучого людской крови, а на німцов, німецку армию и армию фашистскых союзников, як на сліпу массу, засліплену том диком фашистском науком о свойой расовой “высшости” и непобідимости, и о “низшости”, неспособности до ниякого опору перед таком силом — русского народа и другых народов Совітского Союза. А мы знали, што Совітский Союз и його народы, завдяки Русской революции, яка освободила тоты народы до наукы и прогресса — стали культурно о много выше от німцов и другых народов западной Европы. Мы знали, што скромны руководители Совітского Союза стояли о много выше своими знаниями, интеллигенциом и розумінием державной политикы и народного господарства от руководителей западных держав. Мы знали, што борьба фашизма против Совітского Союза буде борьбом тьмы против світла, и світло мусит побідити тьму.

Того не могли видіти и знати фашизмом засліплены люде. Воєнны “знатокы", котры предсказували нам скору побіду фашистскых армий над Красном Армиом, то свідомы або несвідомы фашисты. Свідомый фашист, то тот, кто желат побіды фашизма и ненавидит русскых, уважат их за “низшу” расу, — ци то німец, англичанин, американец, француз, або славянин. Несвідомый фашист, або сліпе орудие фашизма, то чоловік, який не хотіл бы, штобы так было, но дал себе затемнити фашистам так, што уж не може повірити, штобы могло быти иначе, як, приміром, тот бывший читатель “Карпатской Руси”, або простый роботник поляк, чех, словак, што не може поняти того, штобы могло так быти, абы над ним не панувал німец, а он над руснаком.

Ленинградцы спасают Исаакиевский Собор.

Побіда Совітского Союза над гитлеровском Германиом покончила и с фашистском темнотом меж славянскыми народами. Славяне видят, што их восточны братья, котрых так понижали в их очах німцы и их власны славянскы руководители, розгромили гитлеровску воєнну машину под Москвом, под Сталинградом, над Доном, на Кавказі, под Орлом, над Азовскым морем, над Дніпром, вынищуют их беспощадно и женут решткы назад в Германию. И встают славяне помочи своим братьям. Не помагают фашистскы страхы “большевизмом”. Не вірят уж больше ни німецкым, ни своим фашистам. Видят, што были обманюваны цілы вікы німецком “высшостьом”.

Яка-ж найбольша русска побіда? Ци тота под Сталинградом, ци под Орлом або под Києвом? Но, ни одна з них. Всі тоты воєнны побіды выплывают из одной найбольшой побіды русского народа в цілой його истории, побіды, яком не може похвалитися другий народ в світі. Тота найбольша побіда русского народа, одержана 26 літ тому назад, то велика народна Октябрьска революция (25-го октября, 1917 року по старому стилю, 7 ноября по новому).

Тота найбольша побіда русского народа над своим внутренным врагом отдала направду огромну державу, огромны земны богатства в рукы русского и другых народов России, и зровнала направду всі народы и всіх граждан державы, передала направду власть в рукы народа. То перва держава в світі, где были знищены классовы и расовы привилегии, панование єдного класса над другым, або єдной национальности над другом. А тым самым народы Совітского Союза досягли найвысшой демократии и свободы.

Нам кажут, што в Совітском Союзі ніт демократии и свободы, бо там єст лем одна — коммунистична партия. Передовсім коммунистична партия в Совітском Союзі перестала быти “партиом” в нашом смыслі, она лем носит старе имя партии, коли она ище истнувала як партия — при другых партиях в державі. Но там, где ніт "другых партий", и тота одна перестає быти партиом, а стає одним народным руководством. Коли коммунистичны партии в другых державах осталися партиями при другых партиях в державі, то коммунистична партия в Совітском Союзі сама стала народным руководством в державі, в якой ніт классов народа, а тым самым непотребны и партии для каждого класса, якы боролися бы за интересы своих классов. Так што совітска коммунистична партия остаєся партиом в нашом розумінии лем в світовом смыслі.

Такым политичным и економичным народным руководством стала коммунистична партия послі той найбольшой побіды русского народа, послі Октябрьской революции, котра была переведена под руководством той партии Ленина.

Послі смерти Ленина вождем того державного народного руководства, коммунистичной партии Совітского Союза был избранный Сталин, як самый лучший ученик Ленина, и он попровадил тоту молоду народну державу до слідуючых великых побід — культурных, политичных, индустриальных, земледільскых, а теперь воєнных, коли на тоту державу напала гитлеровска Германия и єй фашистскы союзникы.

Мы много начиталися и наслухалися враждебных историй о Совітском Союзі и Сталині, и многы з нас вірили тым враждебным Совітскому Союзу и русскому народу историям. Война, побіды той державы, єй армии и народа над “непобідимыми” армиями гитлеровской Германии и єй фашистскых союзников, змели всі тоты истории, всю неправду, а правда о Совітском Союзі и його народах, особливо о русском народі, о силі той державы вышла, як олива на воду.

Днеска народам світа стало ясно, што той первой найбольшой русской побіді, Октябрьской революции, завдячают свою свободу не лем народы Совітского Союза, но и цілый світ, всі народы, и мы ту в Америкі, и нашы братья в краю будут свободны. Нашы братья в краю будут завдячати своим русскым братьям своє освобождение и житя, як и другы славянскы народы. Може дакотры славяне не вірили, што гитлеризм несе им смерть, тепер всім видно, што гитлеризм направду мал намірение перевести свой план вынищения славянскых народов, бо он переводит тот план на захваченых славянскых землях. Днеска уж каждый то видит.

Сколько то другы державы, приміром, ослабляются борьбом разных национальностей, рас, религий. Из всіх держав світа Соєдиненны Штаты уважаются, як держава не лем з найбольше передовом индустриом, но и в культурном отношению за передову, за державу найбольшых демократичных свобод. А однако в той державі має місце понижение чоловіка по причині його национального або расового происхождения. Paсовы забобоны ослабляют Америку, стягуют на ню ганьбу. Расова дискриминация по отношению к неграм глубока рана американской демократии. Рожденный в Америкі чоловік понижаный на каждом кроку своими согражданами лем длятого, што його предкы родилися под горячым солнцем в Африкі и тото солнце опалило их кожу. Чоловік англо-саксонского або так званого “нордик" происхождения уважатся за высшого чоловіка от чоловіка славянского роду, и т. д. Тот поділ людей в Америкі истнує и он глубоко вкорененый. То велике понижение для американской демократии и западной цивилизации.

Но нам кажут, што з расовом дискриминациом, с том неровностьом меж людми покончити не дастся, бо тоты расовы забобоны глубоко вкоренены в народі и выкоренитися не дадут.

Совітский Союз доказує нам, што то неправда. Там тоже за старого режима тота держава была хвора на тоту хвороту расовой и национальной неровности. Но з ньом покончила Русска революция, не даяком різньом народа, як многы думают, а справедливыми законами, якы карают за расову нетерпимость и дискриминацию, и через правдиве просвіщение народа, через правдиву народну школу. За 26 літ совітска власть так перевоспитала народы Совітского Союза, што тепер уж тоты початковы законы против расовой дискриминации непотребны. Там уважатся ганьбом для чоловіка расовый забобон. Всім людям, всякых рас и национальностей доступны всі державны посты. Выберают людей на посты не по национальности, не по происхождению, а по способностям. В старой царской России найбольшы гении нашых часов, такы як Ленин и Сталин, сиділи в тюрьмі або скиталися по-за границы. Русска революция не лем освободила их из тюрем, но освободила из одной великой тюрьмы всі народы России и зровнала их. А за 26 літ нова народна власть под руководством тых гениальных людей освободила народы старой России и от найбольошого врага людства — тьмы.

Такий народ уж не даст себе поневолити ниякой силі старой тьмы, проповідуючой “новый порядок" с панами и невольниками. Вот чом мы были переконаны, што німецка тьма не зможе побідити русске світло.

Тото світло русскому народу, восточным славянам и другым совітскым народам дала Русска революция. И при том світлі они збудували найбольше могучу державу, могучу народну социалистичну индустрию и народне социалистичне земледілие, и стали непобідимы. Тото світло дало им духовну силу, яку нияка материальна сила зломити не може. При том світлі они организували и выучили Красну Армию, яка розгромила німцов под Москвом, Сталинградом, Курском, Орлом, Смоленском, Києвом и жене их назад в Германию.

Не будь той силы у восточных славян, яку дала им Русска революция и єй плоды, гитлеровска Германия зо своим фашистскыми союзниками поневолила бы всі народы світа и німецкий “герренфольк” стал бы направду пануючым народом над всіми народами.

Велика побіда Красной Армии и Совітского народа под руководством Сталина и велика их слава!