ПИСМО С КАНАДЫ КРАЯНА
ОТ МЕЖЕЛАБОРЦА

Скончилася перва світова война в 1918 року. Упало австро-мадьярске габсбургске ярмо с карку карпаторусского народа. Но нашому народу не была писана национальна свобода и объєдинение. Версальскы паны оставили нашу Карпатску Русь поділеном по-старому, лем панов змінили. Пряшевску Русь, где я родился, дали словакам, галицку часть полякам, а лем половину посчитали за “Подкарпатску Русь”, аж там за Ужом, и отдали тоту половину чехам, як колонию. Так што и в Чехословакии мы оставалися поділены на дві части.

Чехословацку республику світ привык называти демократиом. И была то демократия, но Годжовска аграрна демократия, котра была не демократиом для нашого народа. Каждый може розуміти, што там, где премьером Милян Годжа, то там може быти лем габсбургска демократия.

Так што нашы люде, абы даяк жити, мушены были глядати на ємиграции даякого заробку и куска хліба, и велика часть нашых молодых здоровых хлопцов мушены были покидати свой родный край, свои веселы карпаторусскы Бескиды, свои веселы горы и полонины, свою зелену Лемковину и і хати до Канады.

Іхали мы с том надійом, што Канада, то великий край, великы обшары земли, и ту для нас буде больше місца, што тот великий край будуєся, то мож буде заробити пару центов и помочи собі и свойой родині дома. Бо никто з нас не думал іхати навсе в чужий край. Мы дуже любиме свой родный край, и каждый з нас іхал с тов надійов, што он розлучатся от своих родных на короткий час, на рок або два, и заробивши пару центов, верне назад. Но никому з нас ани не снилося, што го чекат в Канаді. Показалося, што и ту уж нас чекали тоты “аграрникы”, як и в Чехословакии.

Коли мы приіхали в Канаду, то никто з нас не мог остановитися в западной, промышленной части Канады. Што найближе, каждый мушеный был іхати в Виннипег. А в Виннипегу уж ждали на нас тоты канадийскы аграрникы, по большой части галицко-украинскы “січовы стрільцы”, и они розділяли нас по своих фармах чистити “дичи”, карчовати на их фармах корчы. Мы своими твердыми руками взялися до той роботы: зберали каминя, вытягали пнякы и корчы, вырубували лісы. Так што роботы мы мали дост. Але за платню не вспоминай, на платню не маєш права, бо право на английском языкі, а мы славяне, то права не найдеме. Так што о платні не мож нам было думати, лем работати, штобы дали істи, даякий кусок хліба.

Але по пару роках мы научилися дашто английской бесіды, так што уж мож было самым дагде поіхати, и мы порозбігалися по цілой Канаді. Єдны забрали гомстеды, другы пошли работати в лісы, но найбольша часть из них працує тепер в воєнной индустрии, бо каждый из нас завзялся выграти войну и помочи знищити проклятый фашизм.

Для той ціли также мы организувалися ту в Карпаторусске Общество борьбы с фашизмом. В тоту организацию належит много и моих краянов от Межилаборца, Пряшевской Руси, но мы ище далеко от того, абы сме брали діло серьозо и стали массово членами той организации. А тота организация помагат нашым русскым братьям, котры несут головный тягар войны с фашизмом, и котры освободят и наш родный край з мадьярской и німецкой фашистской неволі.

Так што нам, краяне от Межелаборца в Канаді, треба объединитися всім разом для помочи своим русскым братьям и своим близшым родным в Карпатах.

Мы уж зробили початок нашого объєдинения в 1942 року, коли мы, краяне Межилаборецкого округа 15. ІІ. устроили старокрайове пущаня. На том пущаню брали участь ємигранты из 16 сел Межилаборецкого округа. И мы тогды постановили собі помагати нашым русскым братьям и Канадийскому Червеному Кресту — аж до побіды над фашизмом. В тот день мы зняли фотографию с тым, што мы єй помістиме в нашом карпаторусском календарі, штобы нашы краяне в Соєдиенных Штатах запозналися з молодыми ємигрантами из своих родных сел. Они може ани не знают, што нас ту в Канаді тысячи, и што нам треба разом работати за освобождение нашой Карпатской Руси и єй объєдинение зо Совітском Россиом, где бы наш народ мог працувати на свойой великой землі, а не в чужых краях. Мы пойдеме разом с вами, дорогы нашы братья в Америкі, в каждой честной роботі за освобождение нашого Родного Краю.