Уважаєма Президия, дорогы братья и сестры: За нашого короткого житя мы переживаме уж другу страшну світову войну. Минувшу світову войну єдны з нас пережили ту в Америкі и они не зазнали того, што зазнали тоты з нас, што переживали єй в краю. Тота минувша война перешла нам легко ту в Америкі, и потому тоты з нас, котры пережили минувшу світову войну в краю, розуміют и тоту другу войну ліпше, розуміют ліпше страдания нашых братов в краю и готовы больше причинитися до помочы им.

Ци тота друга світова война, котру переживаме тепер, така сама, як была минувша світова война? Но, не така сама. Война, котру мы тепер переживаме далеко страшнійша. Минувша война, то была война з обох сторон империалистична, подобна на попередны войны. Ведучым войну правительствам росходилося о новый переділ світа. Кайзеровской Германии здавалося, што у ней мало земель, мало колоний, мало рынков для выробов німецкой промышленности, и потому напала на Россию, штобы забрати єй Украину, прибалтийскы краи, от Великобритании и Франции часть колоний и рынков. Но тогды ни кайзеру ни німецкому правительству не пришла така идея в голову, штобы забрати, завойовати цілый світ и поневолити всі народы світа. Та и у русского царя была идея, на случай выграной войны с Германном присоєдинити до России новы краи, взяты Дарданеллы, и т. д. У Великобритании были свои империалистичны планы, у Франции свои. И минувша война покончилася империалистичным миром, краи, народы, світовы рынкы были наново переділены в корысть держав побідительниц.

В сей войні уж не росходится о даякий новый переділ світа. Гитлеровска Германия уж не веде тоту войну о даякий переділ світа, потому што Гитлер выразно сам заявил, што над цілым світом мают панувати лем німцы, яко высша раса. Гитлер выразно заявил, што он веде войну за панование над цілым світом, за поневоление всіх народов, за німецке рабство, німецке ярмо над всіми народами світа, за посідание гитлеровцами цілого світа, всіх його земных богатств, всіх заводов, фабрик, городов и сел.

Якже то Гитлеру могла придти в голову така шалена мысль завойования цілого світа и поневоления німцами всіх народов? На чию и яку помоч Гитлер рахує в том свойом чортовском плані?

Гитлер рахує на розъєдинение народов взагалі, на розъєдинение народа в каждой державі и на темноту народных масс. Он выраховал, што розъєдинены народы йому удастся ище больше розъєдинити при помочы своих агентов, и затемнены ище больше затемнити. А при помочы террора и фашистской тьмы удастся му объєдинити німецкий народ заохотом до світового бандитизма и грабежа. И гитлеровской банді удалося то. Удалося найперше при помочы темной фашистской пропаганды затемнити, здичити и объєдинити німецкий народ для світового грабежа, а гитлеровскым фашистскым агентам удалося ище больше розъєдинити, посварити и насадити фашистскых зрадников, так звану пяту колонну, в каждом народі, в каждой державі, кромі Советского Союза. И потому Гитлеру было так легко завойовати и поневолити всю Европу, кромі Совітского Союза.

Найбольшу погорду має Гитлер для славян и взбудил тоту погорду для славян у німецкого народа. План Гитлера — вынищение славянскых народов. Гитлер поневолил и вынищує поляков, чехов, словаков, сербов, хорватов, словенов, болгар, карпаторуссов, украинцов, білоруссов, выкорыставши розъєдинение и взаимны споры славянскых народов.

Гитлер говорит, што славян замного, што их три раз столько, як німцов, што славян 250 миллионов, а німцов 80 миллионов, и потому славян треба так вынищити, штобы через 100 літ славян осталося лем 100 миллионов, а німцов намножилося до 250 миллионов. Тоты 100 миллионов славян должны остатися вічными рабами німцов, без маєтку, без землі — землю, заводы, фабрикы, взагалі маєток — будут мочи посідати лем німцы.

Днес нам всім ясно, што єсли Гитлеру пришла в голову така шалена мысль поневоления славян, то лем завдяки тому, што меж славянскыми народами не было згоды, што они были розъєдинены. Єсли славянскы народы были бы объєдинены в єдном славянском союзі против угрозы німецкого империализма, то німцы не посміли бы напасти и на найменьший славянский народ, та и самого Гитлера не было бы, и той страшной войны не было бы. Империализм німецкий и самого Гитлера, и тоту страшну войну, страшны страдания славянскых народов — родило розъєдинение славян, споры славянскых малых державок, враждебна политика руководителей тых славянскых держав к найбольшой славянской державі — Совітской России.

Чехословакия поддалася без єдного выстріла и отдала німцам всьо вооружение, высоко розвиту индустрию, великы заводы оружия. В 3-ох неділях была розбита Польша, в 4-ох неділях Франция, Бельгия, Голландия. Английска армия оставила Гитлеру всьо своє вооружение во Франции. Так што Гитлер захватил всьо готове вооружение европейскых армий, всю богату западно-европейску индустрию, яку европейскы народы будували 150 літ. Всю квалификовану робочу силу, всі ресурсы. И всю тоту силу разом з німецком кинул больше як рок тому назад против Совітского Союза — державы, котра почала будову свойой модерной индустрии всего 15 літ тому назад.

Недавно гитлеровский министр пропаганды Геббельс заявил, што гитлеровцы зробили лем єдну помылку за свого житя: они планно обраховали силу Совітского Союза. Они обраховали, што тота огромна их сила розбиє силу Совітского Союза за час пару неділь, як Францию и єй союзников, тым больше, што они приготовили зрадничий, несподіванный напад. Но минул рок, а Совітский Союз не побіжденный силами цілой Европы.

Што дало таку силу Совітскому Союзу?

Таку силу Совітскому Союзу дало — объєдинение народа коло свого правительства для войны против фашистскых наіздников. Тот объєдиненный народ и його героична Красна Армия знищили гитлеровский “блицкриг” и квіт німецкой армии. Красна Армия розгромила “непобідимых” німцов под Ростовом и Москвом и загнала их гет назад. Но Гитлер мал ище с чого набрати новых сил, наробити новых воєнных машин в своих німецкых и всіх захваченых европейскых заводах, через зиму он собрал всі силы и всі силы кинул дві неділі тому назад против Совітского Союза.

Совітский Союз, своим геройскым отпором гитлеровской воєнной машині дал нам, западным демократиям, тепер уж своим союзникам, дост часу для приготовленияся до войны, и потому пришол час, абы мы открытием другого фронта в западной Европі улекшили нашому союзнику, котрый уж другий рок сам повздержує всю навалу гитлеровской воєнной машины. Мы требуєме открытия другого фронта сейчас. Нам стыдно, што за нашу свободу проливают рікы крови лем русскы люде и другы народы Совітского Союза. Нам не буде приятна свобода, куплена кровью лем русского народа. Мы, американский народ, хочеме боротися и сами, в союзі з русскым и английскым народами за свою свободу — сейчас, коли на то час, коли мы можеме в коротком часі, ище в 1942 року, при меньшых жертвах покончити общими силами з ненавистным фашистскым поневолителем и вынищователем народов.

Наша держава — Соєдиненны Штаты — сама могуча держава світа. На што раховали Япония и Германия, коли нападали на нас? Они раховали на розъєдинение американского народа, на свою пяту колонну меж нами, на непорозуміния и недовірие меж союзниками — США, СССР и Великобританиом. Най не буде у нас розъєдинения, най пропаде у нас пята колонна, най счезне найменьше непорозуміние и недовірие меж союзниками, а побіда наша и освобождение поневоленых фашизмом народов — запевнены.

Объєдинение карпаторусской емиграции, то часть єдинства американского народа. Мы кладеме сегодня ту, на том объєдиненном Американском Карпаторусском Конгрессі кріпкий фундамент, на котром будеме будовати єдинство нашого карпаторусского народа для отдания всіх нашых сил для ведения войны против фашистской оси аж до побіды. Мы включиме всю нашу карпаторусску емиграцию в американске єдинство, мы будеме смотріти за тым, абы меж нашым народом не было ни одного роботника, котрый бы не працовал честно, зо самопосвятом в воєнной индустрии, абы не осталося ни одного меж нашым народом, котрый не причинился бы пожичком нашой державі для ведения той нашой народной войны.

Мы объєдинямеся для помочы свойой державі, для помочы свому родному краю Карпатской Руси и для помочы своим русскым братьям в России, котры несут на собі головный тягар, несут найбольшы жертвы крови, житя и народного доробку в той нашой вспольной войні, против вспольных врагов.

Розумієся, што первым обовязком каждого, кого лем наше правительство покличе, боротися с оружием в руках, быти готовым посвятитися, отдати своє житя за свою державу. Но не всі из нас будут мати возможность боротися с оружием в руках. Але наш труд за фронтом, то таке саме участие в войні, як нашых солдатов на фронті. А кромі того наше правительство дало нам возможность приняти участь в той войні, помочи нашой и союзной армии — пожичком на вооружение через покупку державных Воєнных Бондов. Мы знаме, што наше правительство потребує соткы миллиардов долларов на вооружение, и што тоты миллиарды не можут быти собраны в таксах. Кошта войны мушены быти розложены на многы рокы. Но держава мусит платити за оружие сейчас, на удержание армии и на ведение войны грошы потребны сейчас. Скады наше правительство возме грошы? Часть приходит с таксов, друга часть из пожичкы от банков, а третя часть из пожичкы от своих граждан. Єсли граждане не выпожичат свойой державі столько, сколько правительство сподівалося, то оно буде мушене запожичитися больше у банков, котры напечатают больше банковок и тоты банковкы стратят на вартости, через што всьо подорожіє, а робоча плата упаде в вартости, так што найбольше потерпиме на том мы, роботникы. И потому в нашом интересі дати як найбольше пожичкы свойой державі, держати нашы грошы, нашу заплату вартостными. Нам шепче пята колонна, што куповати Воєнны Бонды опасно: “А як Америка войну програє?” — То, розумієся, мы не смієме даже припускати, но єсли припустити подобне, што фашисты войну выграют, то мы стратили бы всьо, не лем нашы ощадности, но и нашы домы, нашу свободу, а многы з нас своє житя. Оставшы при житю стали бы рабами. Того не буде. Войну выграме мы, потому што мы сильнійшы от фашистской оси. Єсли бы мы войну програли, то никто нам не буде виноватый, лем мы сами, наше недбальство.

Нашы ощадности найбеспечнійшы в Воєнных Бондах, бо то пожичка свойой державі. Єсли кто не вірит свойой державі, то не вірит сам собі, а кто ширит зневіру в нашу державу, тот належит до пятой колонны.

Война покончится побідом народа над фашизмом. А тогды вас звідают — ваш брат, ваш сусід, знакомый, — “а ты чым причинился до нашой побіды? — “Я причинился пожичком свойой державі, народу. Я отдавал 10% из каждой свойой заплаты, яко пожичку державі, куповал Воєнны Бонды. Я помагал щиро и честно Америкі побідити врага!”

Наш родный край Карпатска Русь бореся за свою свободу. В американскых газетах, и русскых газетах мы читаме о найбольшой діятельности партизан поза совітскы земли — в Сербии и Карпатской Руси. Мы можемее быти горды, што нашы братя в краю вступили в борьбу с фашистскыми поневолителями с оружием в руках, што их геройство поровнуют с геройством русского и сербского народов. Мы видиме, што велика Руоска революция пробудила наше нове карпаторусске поколіние до борьбы за свою свободу с оружием в руках. Мы поможеме им в той борьбі за их свободу, за свободу Карпатской Руси. Мы не даме обманути нашых родных братов ниякым политиканам и купленым самозванцам. Мы требуєме полной свободы для Карпатской Руси в єй етнографичных границах, свободного выражения народной волі, свободного рішения самым карпаторусскым народом о свойой судьбі и будучности. Мы не допустиме до того, абы нашым народом дальше торговали всякы покутны дипломаты и самозванцы. Мы не “присоєдиняме” Карпатску Русь ку той або другой державі, бо у нас ніт права на то. Но у нас єст право боротися за свободу свого родного народа, за право самоопреділения, и мы будеме боротися за тото право, яке належится каждому народу послі розгрома фашизма. Тото право обеспечує каждому народу Атлантик Чартер. Мы знаме, и врагы нашого народа знают, яку будучность выбере собі карпаторусский народ. Потому они так боятся того народного права, Атлантик Чартера для Карпатской Руси. Но мы, вся карпаторусска емиграция объєдинено постоиме за тото право для Карпатской Руси в єй етнографичных границах.

Нашы русскы братья в России приносят огромны жертвы за свою и нашу свободу, за свободу всего світа. Мы им хочеме помочи. Каждый честный, культурный чоловік хоче им помочи. А мы, наша карпаторусска емиграция тым больше, яко родны по крови. Як мы можеме помочи? Мы шли бы помагати с оружием в руках, но такой возможности у нас ніт. Зато єст у нас возможность помочи им грошевом жертвом, на помоч раненым и пострадавшым от войны. До сего часу наша карпаторусска емиграция зложила на медичну помоч своим русскым братям в России понад 50,000 долларов. Лем через рукы К. Р. Н. Комитета и через газету “Карпатску Русь” перешло на медичну помоч русскому народу до сего часу около 35,000 долларов. Но то всього мало. Єсли нас в Америкі 500,000, то на кажду карпаторусску душу приходит заледво по 10 центов. Недавно лем на єдном американском собранию в Нью Йорку, яке устроил “Рошен Вор Релиф”, собрали 500,000 долл. на тоту ціль. Всі честны культурны американцы жертвуют на медичну помоч русскому народу. Докажме, што мы не лем на словах, но и в свойом сердци русскы. Организуйме на каждом плейзі комитеты медичной помочы русскому народу под руководством Американского Карпаторусского Конгресса. А тепер ту мы, дорогы братя и сестры делегаты дайме примір жертвенности и нашого родного чувства к нашым русскым братьям, пожертвуйме, кто што може каждый на помоч нашым русскым братям. То буде найліпша резолюция нашого Конгресса, то буде найліпший документ, найліпший доказ нашых желаний относительно будучности Карпатской Руси.