Єсли бы сполнилося то всьо, што говорили, писали и предсказували о Совітском Союзі разны економичны и воєнны “експерты”, світ находился бы уже в фашистской неволі, панами світа были бы німецкы фашисты людоіды и японскы самураи.

Представме собі, што гитлеровска воєнна машина розбила бы Красну Армию в протягу шести неділь, як предсказували воєнны “експерты”, совітске социалистичне господарство розвалилося бы послі первого удара як предсказували економичны “експерты”, поодинокы народы Совітского Союза повстали бы против совітского правительства, як предсказували политичны “експерты”, и сам русский народ восстал бы против “безбожной интернациональной власти”, як предсказували “експерты” русского народа, — где бы мы днеска были, где была бы Америка, Велика Британия, где был бы цілый світ, єсли мы, як нам кажут тоты самы “експерты”, ище днеска до войны не готовы? Розумієся, што мы были бы уж днеска всі под чоботом Гитлера.

Єсли мы днеска ище свободны люде, єсли мы можеме выберати губернаторов, конгрессменов, сенаторов, президента, — то мы завдячаме то Совітскому Союзу и його Красной Армии. Єсли днеска може засідати английский парламент и вести дебаты, то англичане завдячуют то Совітскому Союзу и його Красной Армии. Английский народ розуміє то, и он выражат голосно тоту вдячность Совітскому Союзу и його руководителям.

Фальшивы люде кажут нам, што Англия и Америка оборонилися бы и без Совітского Союза, а за примір подают оборону Англии послі розгрома Франции. Но честны люде, до котрых належит и маршал Сматс, премьер Южной Африкы, говорят, што Гитлер захватил бы Англию, єсли бы не боялся оставити за своими плечами сильну совітску державу. Як Наполеон, так и Гитлер розуміл тоту правду, што дорога в Лондон веде через Москву. Та не лем в Лондон дорога веде через Москву, но она веде через Москву к панованию над світом. Раз Гитлер поставил за свою ціль панование над світом, он мушеный был найперше поневолити Совітский Союз. Захвативши земли и богатства Совітского Союза и поневоливши його народы, Гитлер стал бы паном світа.

Русско-німецка война доказала силу Совітского Союза, котру дала му нова социалистична система господарства — индустрии и земледілия. Тота война доказала дальше, што совітскы народы, народны массы приняли тоту систему за свою, народну. И не лем само социалистичне господарство народ совітской державы принял за своє народне, но и политичне и национальне устройство. Говорити днеска, што народы Совітского Союза хотят даякого иншого господарского, политичного або национального порядку — можут лем фальшивы люде, сторонникы фашизма, такы люде, котры не дбают о интересы народа, лем о свои личны интересы. Совітско-німецка война доказала, што руководителі Совітского Союза дбают лем о интересы народа и його державы, и потому тот народ так объєдиненный около своих руководителей в той отечественной войні против німецкого наіздника, с таком самопосвятом оборонят тоту свою народну державу, своє народне добро. Мы днеска видиме, што на світі ніт такой другой державы, абы єй народы были так объєдиненны вколо свого центрального правительства, своих головных руководителей, як народы Совітского Союза объєдиненны вколо свого совітского правительства и своих державных руководителей, свого вождя Сталина.

Нам казали, што Сталин страшный диктатор. Но мы видиме тепер, што то неправда. Мы видиме, што он не диктатор, а гениальный вождь, што його не даром славили народы Совітского Союза. Єсли Сталин был бы дикататором, то против него бунтовалися бы народы, части армии с генералами, як бунтуются против Гитлера. Нам так и говорили до совітско-німецкой войны, што на случай войны, против Сталина будут бунтуватися поодинокы народы и поодинокы части Красной Армии з генералами. Як видиме, нич таке не має місца в СССР и николи мати не буде. То єст найліпший доказ, што Сталин вождь и учитель народов Совітского Союза, а не диктатор. Яко гениальному вождю и учителю, народы Совітского Союза завдячуют силу свойой державы — розбудову социалистичной индустрии, социалистичного земледілия, организацию и воспитание непобідимой Красной Армии.

Так, Сталин и воєнный гений. Нашы воєнны “експерты” не можут погодитися с тым, абы Сталин, цивильный чоловік был воєнным гением, головным руководителем Красной Армии. Но оно так єст. Всі славны молоды русскы генералы — Тимошенко, Жуков, Лелюшенко, адмирал Кузнецов, и др. — ученикы Сталина, и они славятся тым. Ворошилов, Буденный, Шапошников — товаришы Сталина, його помочникы в организации Красной Армии и исполнителі сталинского плана ведения войны. Бо нам треба знати, што як по сталинскому плану будувалася индустриальна и оборонна сила совітской державы, так по сталинскому плану ведеся и оборона той державы.

Як в модерном господарстві державы, так и в модерной войні головна воєнна сила — в индустрии. Гитлер длятого был так певный побіды, што он был певный перевагы німецкой индустрии над индустриями другых европейскых держав. Всьо, што му треба было кромі индустрии, то засліпити німецкий народ, здичити го для тотальной войны, и то он зробил при помочи фашистской пропаганды.

Німецка индустрия и воєнна промышленность будовалися 150 літ. А кромі того німцы скоро, майже без ниякых страт для себе, захватили промышленность, всі воєнны заводы всіх европейскых держав, кромі Совітского Союза и новы миллионы квалификованых робочых. Высокорозвита чехословацка воєнна промышленность досталася німцам без одного выстріла, бельгийска, голландска, французска при маленькых стратах. Кромі того в рукы німцов попали горы готового оружия — аеропланов, танков, канонов — в захваченых державах. Англичане оставили німцам вооружение цілой свойой армии. Так што в индустрии, в оружию, в воєнных машинах Гитлер чулся непобідимым против цілого світа, тым больше што знал, што найбольша индустриальна держава до войны совсім не готова, и што єй индустрия организована для мирного выробництва, а переорганизовати для войны — забере часу.

Германия має тоже огромну перевагу в людском материалі. Коли она выбералася на войну против Совітского Союза, под контрольом гитлеровского німецкого правительства было понад 300 миллионов людей, т. є. вся континентальна Европа, кромі Совітского Союза. Из контрольованых Гитлером народов — Италия, Румыния, Венгрия, Франция, Словакия — шли против Совітского Союза, яко фашистскы “союзникы” гитлеровской Германии.

Против той силы Гитлера бореся сам Совітский Союз уж полтора рока, мимо того, што он слабший наименьше наполовину в индустрии, а тым самым слабший наполовину в воєнных машинах — танках, аеропланах, артиллерии и другом оружию. Он слабший наполовину и в живой людской силі от гитлеровской Германии и захваченых фашизмом крайов. И потому нич дивного, што Гитлер с таком певностьом скорой побіды напал на Совітский Союз. И то с тым большом певностьом завдякы тому, што нападал несподівано, зломивши договор о взаимном ненападении.

Сегодня видит уж цілый світ, што Гитлер помылился в своих обрахунках, што Совітский Союз непобідима держава, мимо слабшой индустрии, меньшого числа воєнных машин и меньшого числа населения. Помылилися и всі воєнны и економичны “експерты” старой школы во всіх своих предсказаниях по отношению к совітской державі и єй армии.

Днеска каждый мушеный признати, што совітска держава, єсли не в машинах и людях, то в чомси лем мусит мати перевагу над гитлеровском Германиом, єсли она має силу опертися два раз моцнійшой физичной, механичной силі. Тота перевага може быти лем в духовной и культурной силі, и ту, именно, и єст тота перевага у Совітского Союза над гитлеровском Германиом, и завдякы той духовной и культурной перевагі Совітский Союз непремінно побідит гитлеровску Германию.

И того именно не хотят признати западны “експерты”, той культурной перевагы Совітского Союза над гитлеровском Германиом, бо тогды мушены были бы признати высшость социалистичной цивилизации над свойом, бо для тых “експертов” все-таки фашистска “цивилизация” ближе совітской, німцы культурнійшы от русскых и другых “азиятов”. Такий западный “експерт” нияк не може признати ровность людей и народов, ровне право на житя и свободу для всіх людей и народов, у него мусят быти “низшы” и “высшы” расы, народы пануючы и колониальны, паны и слугы. Он не признат, што 40 миллионов англичан не має права панувати над 400 миллионами индусов, што мы не маме права панувати над сотками миллионов азиятскых народов, што негры в Америкі должны быти ровны з білыми и т. д. Мы, як и німецкы и другы фашисты, не хочеме такой ровности народов и людей признати. Даже такы маленькы чехы, полякы хотят панувати над карпаторусскым, украинскым, білорусскым народом, так учат их — их руководителі, што так належится. А то значит, што тоты руководителі нияк не можут погодитися с тым, што совітскы народы стоят культурно выше от них, и не позволят панувати над собом меньше культурным людям.

Отпор Совітского Союза гитлеровской Германии и несомнінну побіду над ньом, мож объяснити лем высшостьом культуры Совітского Союза над гитлеровском Германиом. Меньше с тым, што стары “експерты” культуры не хотят того признати, што русский народ створил высшу культуру и хотіли бы найти даяку иншу причину непобідимости совітской державы. Факт останеся фактом, што Совітский Союз спас світ от фашистской неволі, завдякы свойой высшой духовной и культурной силі над гитлеровском Германиом.