ПЕТР ГЕОРГИЕВИЧ РАТИЦА

Петр Георгиевич Ратица, Предсідатель Американского Карпаторусского Конгресса и містопредсідатель Американского Славянкого Комитета, як представитель карпаторуссов, — родился 15-го юля, 1883 року в селі Гералт, шаришска столица, Пряшевска Русь. Його родителі хотіли з него священника, и 10 рочным хлопцом отдали го в Краснобродский монастыр (недалеко Межелаборца, в Земплинской столиці). Но в монастырі наш Петро забавил лем три рокы, и пошол до школы до Пряшева, где учился три рокы в препарандии. Покончити школы не мог, потому што його родителі были бідны и не могли му помочи учитися дальше. Так што молодый Петро мушеный был завчасу думати о свойом дальшом житю. А што в тоты часы в Америку были для каждого здорового чоловіка двери открыты, то и наш Петро выбрался в Америку 16 рочным юнаком и в январі 1900 року уж сиділ на шифі.

В Америкі треба дораз працувати, кто хоче жити, и Петро получил перву роботу в текстильной фабрикі в Трентон, Н. Дж. Там проработал рок, и чувствовался уж в силах до тяжшой и ліпше платной роботы, так што из Трентон переіхал в декабрі 1900 року в Монессен, Па., где получил роботу в “стилворку”, где тоже ткали материю, з грубого дроту плоты на фармы.

Коли Петро, поробивши в заводі, потом в шторі, заробил и ускладал пару центов, — почал думати о свойом предприятию, и заложил свой власный бизнес — открыл “драй-гудс бизнесс”, котрый провадил за 14 роков.

Петро Ратица ціле своє житя интересовался народными ділами, и потому нашы люде выберали його все урядником ци то церкви, ци братства. Был урядником братства греко-кат. Соединения ч. 188, и тото братство выслало го делегатом на конвенцию Соединения в 1914 року, в Скрантон, Па. Но тогдашний предсідатель Михаил Русин требовал от делегатов, штобы сложили присягу римскому престолу, бо лем тоты делегаты будут мати голос на конвенции, котры таку присягу сложат. Много делегатов запротестовали против того, меж ними и Петр Ратица, заявляючи, што они пришли на конвенцию представляти своє братство, а не римский престол.

Послі было организовано Православне Соєдинение, в котром Петр Ратица много потрудился, як урядник, а 1926 року был избранный головным предсідателем той организации, на яком посту остаєся по сей день.

Народ города Монессен оцінил труд Петра Ратицы так, што выбрал го членом городского совіта (канцилманом) на 4 рокы. Мы всі знаєме, што где росходилося о добро нашого народа, коли был созваный народный конгресс, то Петр Ратица все принимал участие. Приіхал он и на Славянский Конгресс до Детройт, и был избранный місто-предсідателем Славянского Комитета, яко представитель карпаторуссов. Наш Американский Карпаторусский Конгресс в Питтсбургі избрал Петра Ратицу своим Предсідателем.

Петр Ратица — чоловік щирого русского и славянского чувства, чоловік трудолюбивый так для свого народа, як и свойой численной фамилии.

Молодый Петро женился 23-го сентября 1905. на дівиці Анні Верхимяк, рожд. в Гиралтовцах, и выховал довєдна десятеро дітей, из котрых девятеро жиют, 7 сынов и 2 дочкы.

Петр Ратица, як и його жена, походят из Пряшевской Руси, из той части, котра за чехословацкого режима подлягала насильному ословачению, где словацкы шовинисты не хотіли признати русского елемента, у них каждый руснак был словаком греко-католицкого обряда. До тых “словаков”, по теории словацкых шовинистов, належат и такы нашы патриоты, як Петр Ратица и Николай Пачута.

Нашому дорогому Предсідателю Петру Ратиці и його честной фамилии желаєме могая літа!