В 1942 року карпаторусска емиграция и наша организация стратила одного передового свого члена — Ивана П. Євусяка, котрый помер 10 августа, 1942 року, в Аллегхени Дженерал Госпитал, в Питтсбургу.

И. П. Євусяк выходец из села Лосье, Горлицкого повіта, Лемковщина, приіхал в Америку молодым хлопцом и пережил на емиграции около 40 літ, переважно в околиці Питтсбурга, в Чарлерой, Па. Тоту Питтсбургску околицу он представлял на нашых народных съіздах и Конгрессах. Но он не належал до такых, што лем берут участь в народных съіздах, конгрессах, конвенциях, а вернувши дому, ждут спокойно слідуючой такой оказии. Покойный Євусяк працувал для организации в свойой околиці. То он там поширил найбольше газеты и календаря, то он заохотил нашых людей интересуватися народным ділом. И потому коли он приіздил на нашы съізды, он мал все обширне справоздание зо свойой роботы в Питтсбурской околиці. Наша организация завдячат много покойному Євусяку, и потому съізд Л. С. выбрал го членом Ц. К. Лемко-Союза.

Мы розумієме, яку велику утрату понюс Питтсбургский округ зо смертьом И. П. Євусяка, но майже таку саму утрату понесла и ціла наша организация, потому што у нас Євусяков на нашой емиграции дуже мало.

Иван Євусяк записался в историю карпаторусской емиграции в Америкі, яко передовый діятель. Йому, як и другым свідомым нашым емигрантам из Карпат был дуже дорогам родный край — Лемковщина и вся Карпатска Русь и он слідил за єй судьбом. Но немилосердна смерть не дала му дочекати того великого момента для нашого Родного Краю, коли, послі розгрома фашизма он буде освобожденный и раз на все объєдиненный з другыми русскыми землями в свойой родной русской державі. Най же му буде Американска земля легка!