СПРАВЕДЛИВОСТЬ
ДЛЯ КАРПАТСКОЙ РУСИ

Люде, што покликуются на Атлантик Чартер, даже представителі разных европейскых правительств, котры подписали тот Чартер, яко гарантию будучой свободы народов послі побіды над фашистскыми державами, гарантию справедливости, — не признают того Атлантик Чартера, ни його гарантии лем для русского, білорусского, украинского, карпаторусского — словом нашого народа, но и ище для “другых азиятскых” народов.

Приміром, по Атлантик Чартеру границы будучых европейскых держав должны быти установлены по желанию населения даной территории. Ясно, што украинцы, білоруссы, карпаторуссы хотят быти зо своими братами, наш народ боролся за то цілыми віками, штобы объєдинится зо своими братами в свойой державі. Полякы мушены были переводити пацификации над украинскыми и білорусскыми селянами, пред самом войном перевели таку пацификаци над лемковскым селом — Устье Русске, горлицкого повіта. Потому што польскы паны послі минувшой войны захватили, корыстаючи из гражданской войны в России, великы обшары білорусскых и украинскых земель против волі населения. Чехословакия по Версальскому договору захватила Карпатску Русь. Штобы вы знали, сколько захватила Польша чужой земли на Востокі, то присмоттеся добри на тоту мапку.

A MINORITIES MAP OF POLAND

Poland's population is estimated between 33,000,000 and 35,000,000. Of this number about 10,000,000 comprise minorities, of which the Ukrainian is by far the largest. The boxes on the map show from what countries Poland was formed.

Тоту мапку рисували не мы. Она была поміщена перед самом войном, коли Гитлер грозил Польші — в “Нью Иорк Таймсі”, найбольшой американской газеті. Отже мы ясно видиме на той мапкі, нарисованой приятелями Польшы, што ціла восточна єй половина не належит польскому, а украинскому и білорусскому народу. И в 1939 року, коли Польша розвалилася, в 18 днях под ударами Гитлера, Совітский Союз выпередил гитлеровскы орды и взял своих кровных братов под свою защиту: украинцы были объєдинены с Украинском республиком, білоруссы с Білорусском. Совітскы державны границы были проведены по етнографичным, национальным границам.

За границами Совітского Союза осталася лем галицка половина Лемковщины, на той мапкі тот клин, высуненый на запад. Тот клин не мог быти присоєдиненный, потому што дорогы из Лемковщины на Восток ведут через польску территорию. Но зато тоты дорогы из галицкой Лемковщины на полудне ведут в Пряшевщину, а через Пряшевщину в Подкарпатску Русь и на Восток, по чисто карпаторусской территории. И потому мы все говорили и говориме, што галицка Лемковщина географично складова часть Карпатской Руси, а не Восточной Галичины.

Так ту на той мапкі каждый видит, што Совітский Союз ниякой “половины Польшы” не взял, лем освободил свой народ, котрый загальным голосованием присоєдинился ку своим братьям по народности. Но американскы газеты не перестают писати; што Совітский Союз взял половину Польшы, и поддержувати претензии польскых панов на тоты земли. И тота сама газета, котра помістила тоту мапку, повтарят беспрестанно, што Совітский Союз взял половину Польшы. Так тоты люде розуміют справедливость и программу Атлантик Чартера.

A MINORITIES MAP OF POLAND

Poland's population is estimated between 33,000,000 and 35,000,000. Of this number about 10,000,000 comprise minorities, of which the Ukrainian is by far the largest. The boxes on the map show from what countries Poland was formed.

До той самой етнографичной мапкы мы дорисовали территорию Карпатской Руси, штобы видно было каждому, што Карпатска Русь належит географично и етнографично к Востоку, а не Западу, як хотят представити чехословацкы политиканы. И нам, емигрантам из той территории треба боротися за справедливость для нашых братов в краю, за таку их свободу, абы они могли без ниякого чужого насильства объєдинитися зо своими родными братами на Востокі, ку котрым они належат по природному праву.

Карпатска Русь, як Украина и Білоруссия, то не чехословацкий, польский, английский, американский, або вопрос даякого другого народа и його правительства, а вопрос карпаторусского и його кровных братов вопрос.

Западны державны границы Совітского Союза будут установлены по национальным границам совітскых народов. Кто заперечат карпаторусскому народу объєдинение зо своими кровными братами в свойой державі, тот враг русского народа, або агент чужых империалистов. Кто з одной стороны хвалится Атлантик Чартером, а з другой стороны не признає го для Карпатской Руси, — он не належит до нового світа, о котром говорит тот Атлантик Чартер.

Наш обовязок — не дати обманути нашых братов в краю разным старым версальскым и мюнхенскым обманщикам, и для того карпаторусскому народу на емиграции треба объєдинитися в Американском Карпаторусском Конгрессі, котрый працує за полну свободу Карпатской Руси и єй добровольне объєдинение зо своими родными братьями на Востокі.

Для нас лем таке може быти справедливе рішение о будучности нашых братов, коли они, получивши полну свободу — свободно выявлят свою волю.

На той мапкі предствалена территория Карпатской Руси, за котрой свободу бореся Американский Карпаторусский Конгресс. Тота территория роздерта тепер на три части:

I. за чешского режима т. з. “ПОДКАРПАТСКА РУСЬ” находится под властьом мадьярского фашизма.

II. ПРЯШЕВСКА РУСЬ находится под властьом словацкого фашизма.

III. ГАЛИЦКА ЛЕМКОВЩИНА находится в польском губернаторстві, под властью німецкого фашизма.

На сіверовосток от Карпатской Руси лежит Восточна Галичина, котра была уже присоєдинена официально до Совітского Союза в 1939 року.