День 12 юля, 1942 р., войде в нашу историю, историю полмиллионной карпаторусской емиграции, яко исторична дата. В тот день собрался в городі Питтсбургі первый объєдиненный Американский Карпаторусский Конгресс, в котром приняли участь представителі около двох соток карпаторусскых организаций — церквей, братств, гражданскых клубов, отділов культурно-просвітительных организаций — всего 214 зарегистрованых делегатов, емигрантов из всіх сторон Карпатской Руси и американскых уроженцов карпаторусского происхождения, съіхавшыхся из всіх сторон Соєдиненных Штатов и Канады.

Тот наш Конгресс был созваный двома объєдиненными нашыми политичными организациями — Карпаторусскым Союзом и Карпаторусскым Народным Комитетом — єдиными истнуючыми на емиграции политичными руководствами нашого карпаторусского народа — первый под предсідательством Николая Пачуты, другий под предсідательством Петра Гузлея — знаных народных карпаторусскых діятелей на емиграции и организаторов.

Тоты дві нашы єдины истнуючы народны политичны организации объєдинилися для роботы по объєдинению всей нашой емиграции для слідуючых цілей:

1. Помоч Америкі в ведению войны против фашистскых держав аж до полной побіды.

2. Борьба за полне освобождение Карпатской Руси, объєдинение єй в єй етнографичных границах и право на самоопреділение для карпаторусского народа.

3. Помоч нашым русскым братьям в России в их борьбі с фашистскыми наіздниками, через сбор фондов на медицинску помоч Русскому народу.

Мы находимеся в войні с фашизмом, с фашистскыми державами, в войні не на житя, а на смерть. Бо што означала бы побіда фашистскых держав над Объєдиненными Народами? Побіда фашистскых держав над Объєдиненными Народами означала бы для нас, для єдных смерть, а для другых страшну чорну неволю, котра горше смерти. И потому мы не можеме быти побіждены фашизмом, мы не можеме програти тоту войну, єсли мы хочеме остатися живы и свободны, єсли мы хочеме, абы осталися жити нашы діти, и осталися свободными.

И длятого мы мушены побідити фашизм, розгромити гитлеровску Германию, головного и найсильнійшого нашого врага, и самурайску Японию. Ниякого другого выхода для нас ніт, ниякого мира с фашистскыми державами быти не може. Ту поставленый вопрос ясно: — або над світом, над всіми народами запанує фашизм, або он буде стертый з лица земли свободолюбивыми народами.

У Объєдиненных Народов єст всі средства, всі ресурсы, индустрии, всі материальны силы для побіды над фашизмом. В том у нас перевага над фашистскыми державами. У нас перевага и в людской силі. Фашисты о том знали, коли начинали войну. Но они тоже знали, што у нас ніт объєдинения для войны против ним — объєдиненным бандитском фашистском моралью грабежа, захвата, террора, убийства. Каждый може розуміти, што шайка организованых и вооруженых бандитов може стерроризувати население цілого великого города, потому што бандиты выбераются на грабеж ночном годином, нападают несподівано, берут террором и убийством. Гитлеровска Германия, то и єст така бандитска держава на сей нашой землі с двома миллиардами населения. Она взяла собі до помочы фашистску Италию и самурайску Японию — и они разом напали на мирный світ — грабят, палят, убивают массово мирных людей и при помочы бандитского террора на всесвітну скалю — хотят поневолити цілый світ и запановати над всіми народами.

Як в одном великом городі полиция, часто с перекуплеными капитанами, не може порадити собі з добри организованом и вооруженом бандитском шайком, так не могла порадити собі Европа з гитлеровском Германиом, и так трудно порадити с тыми фашистскыми бандитами світовой полиции, организованым армиям. Но што робит население города, єсли полиция не може порадити бандитам? Население города объєдинятся против бандитской шайкы и помагат полиции, а разом смотрит за агентами бандитов среди самой полиции и в управлению города. Ци раз так случатся, што бандиты, ракетиры мают своих вспольников в полиции и управлению города? Задачом граждан города вынайти тых зрадников народа и вычистити от них місто и полицию, бо иначе борьба з организоваными бандитами буде трудна.

Подобна война с фашистскыми світовыми бандитами. Фашизм побіждал державу за державом в Европі, потому што народ в тых державах, и державы меж собом не были объєдинены для борьбы с фашизмом. До помочы фашизм мал зрадников народа в каждой державі, в правительствах и армии. Народ был проданый ними, были проданы цілы державы. Тоты зрадникы народа доносили о всіх слабых місцах державы и армии.

Мы то всьо уж знаме тепер, коли фашистскы бандитскы державы напали и на нашу Америку. Мы уж знаме, што мы не можеме выграти той войны против фашизма, коли мы не будеме объєдинены для борьбы с ним, коли мы не будеме позерати за фашистскыми агентами меж нами, коли мы не выпружиме всі нашы силы в воєнном выробництві, коли мы не будеме объєдинены коло свого правительства и головного команданта Президента Рузвельта, коли мы не будеме жертвовати своими выгодами мирных часов.

Американский Карпаторусский Конгресс был скликаный нашыми єдиными двома политичными организациями — Карпаторусскым Народным Комитетом и Карпаторусскым Союзом для той найважнійшой и первой ціли в той войні — объєдинения народа, в том случаю объєдинения карпаторусской емиграции для як найбольшой нашой помочы в ведению войны против фашистскых бандитскых держав. Около 200 нашых организаций, котры приняли участь в конгрессі через своих представителей, порозуміли то. Но другы соткы нашых карпаторусскых организаций — церквей, братств, клубов находятся под вплывом або совсім недбачых урядников, або зрадников народа и они або занедбали так важну и патриотичну народну американску справу, або, як приятелі фашизма — не допускают до объєдинения карпаторусской емиграции для помочы американскому правительству в борьбі с фашизмом, домовым и заграничным.

Задача Американского Карпаторусского Конгресса — всіх його участников открывати и боротися против приятелей фашизма среди нашой карпаторусской емиграции и объєдиняти остальны карпаторусскы организации коло нашого Американского Карпаторусского Конгресса для патриотичной американской роботы. Для помочы нашому правительству в ведению войны против фашизма мы должны отдати всі свои силы.

Цілыми віками нашы предкы мечтали о национальной свободі и объєдинению зо своими братами на Востокі. Цілыми віками они ждали свого освобождения, и цілыми віками они свято вірили, што тот момент их освобождения приде. Лем тота віра в освобождение и объєдинение зо своими братами на Востокі сохранила Карпатску Русь, єй национальность. Тота віра в грядущий момент освобождения сохранила наше национальне лице. Тота віра в освобождение стала том скалом, о котру розбивалися всі пробы и усилия поневолителей карпаторусского народа стерти сліды його родства з русскым народом.

И вот нашы братья в Карпатской Руси дождалися того момента национального освобождения. Тот момент приде послі розгрома німецкого и мадьярского фашизма, и всякого другого фашизма в Европі и в цілом світі. Послі побіды Объєдиненных Народов каждый народ получит свободу самоопреділения.

То стоит в программі Объєдиненных Народов, в Атлантик Чартері, який гарантує кождому народу самоопреділение. Но нам треба знати, што дакотры передовы люде, стары версальскы дипломаты и политикы, мимо того, што и сами они подписали Атлантик Чартер, признали повоєнну программу Объєдиненных Народов, — уж тепер, ище до побіды над фашизмом ведут политику против программы Атлантик Чартера, за поневоление другых народов, против самоопреділения народов. В той политикі помагают им всіми силами продажна пресса и плачены пропагандисты. Они хотят обманути наш народ. Они готовы примінити Атлантик Чартер до каждого другого народа, лем не до русского, украинского, білорусского, карпаторусского. У них тоты народы — “низша раса”, як у Гитлера. Они заперечуют права на свободу и объєдинение украинцам, білоруссам, карпаторуссам.

На другом місци поміщена ту мапка бывшой Польшы. Она показує, якы народы заселяли бывшу панску Польшу. Тота мапка перебрана из найбольшой и, як говорят, найсерьознійшой американской газеты — “Нью Йорк Таймса”. А была она поміщена в “Таймсі” як раз перед том войном. На той мапкі ясно видиме украинску и білорусску землі, заселены в огромном большинстві украинскым и білорусскым населением. Тота мапка из “Нью Йорк Таймса” ясно доказує, што тоты землі належат народно до совітскых республик, до Совітского Союза. Повторяме, што то не єст наша мапка, а великых приятелей бывшой Польшы, єй союзников, но она правильна. Така была бывша панска Польша, столько она захватила русскых территорий з русскым населением.

Но тоты самы люде не признают тому народу права рішати о свойой принадлежности и будучности. Они все повторяют, што то восточна половина Польшы, и што тота территория належится будучой Польші, они поддержуют тых польскых панов дипломатов, котры и надальше, и послі той войны хотят пановати над украинскым и білорусскым народом, мимо того, што сами, з другой стороны, доказуют свойом мапком, што Польша не має ниякого права на тоты землі, што она захватила их бесправно, насильно, против волі містного населения.

Тоты самы люде, тоты самы газеты поддержуют такых самых чешскых дипломатов в их прентензиях на Карпатску Русь. На другой, такой самой мапкі из “Нью Йорк Таймса” дорисована нами территория, заселена карпаторусскым народом в бывшой Чехословакии. Разом с карпаторусском территориом от Сана на запад, не объєдиненном с Совітскым Союзом в 1939 року, — тота территория и єст Карпатска Русь, яку мы розумієме по етнографичному и географичному праву. Старчит посмотріти на положение той нашой карпаторусской территории, штобы увидіти, што она по природному, географичному и народному праву належит не Чехословакии, а Совітскому Союзу. Што тот край належал в початках русской истории до русской державы, найперше Києвской, а потом Галицко-русской, то найліпше доказує само истнование на той территории нашого народа, його язык и восточна віра, а головно вічне стремление нашого народа до объєдинения с Востоком, зо своими кровными братами.

И як мы выше заявили, — момент освобождения Карпатской Руси, нашого Родного Краю, и объєдинения с Совітскым Союзом — пришол. То гарантує Карпатской Руси Атлантик Чартер и национальна программа великого Совітского Союза. Но нам треба знати, што наш народ хотят обманути стары версальскы политикы и дипломаты. И нам треба знати, што карпаторусска территория, не присоєдинена до Совітского Союза в 1939 р. разом с украинскыми и білорусскыми землями, находится в другом положении от Восточной Галичины и Сіверной Буковины, где народ уж голосовал за присоєдинение до Совітского Союза, и тот народ уж має своих представителей в совітском правительстві, в Верховном Совіті Совітского Союза. И потому послі войны Совітский Союз даже не буде говорити о той территории з никым, всякы претензии Польшы до той территории будут откинены.

Но Карпатска Русь не была присоєдинена к Совітскому Союзу, население Карпатской Руси не голосовало и не має своих представителей в Верховном Совіті. И потому тоты версальскы обманщикы стараются не допустити карпаторусский народ до голосу в справі свойой будучности, они ширят пропаганду, што карпаторусский народ хоче остатися надальше поділеный меж будучу Чехословакию и Польшу — на три части: Ужгородску, Пряшевску и Галицку. Совітский Союз не може выступити в обороні карпаторусского народа без явного выражения його власной волі.

И вот ту, мы, карпаторусска емиграция можеме придти с помочом нашым братьям в краю. Ту мы, организованы и объєдиненны, можеме затребувати для нашого народа належных му прав по Атлантик Чартеру и по национальной программі Совітского Союза. У нас свои национальны организации в Америкі и они не сміют допустити до того, абы нашы братья в Карпатской Руси были обманены версальскыми и мюнхенскыми обманщиками.

И для той ціли нашы карпаторусскы организации объєдиняются под руководством Американского Карпаторусского Конгресса.

Наш Конгресс 12 и 13 юля, 1942 р. положил фундамент такого объєдинения, объєдинивши уж на самом первом Конгрессі понад 200 карлаторусскых містных организаций. Но мы не должны остановитися на тых 200 организациях, а объєдиняти в Американском Карпаторусском Конгрессі дальшы нашы организации, штобы слідуюче собрание Конгресса объєдиняло дальшы соткы нашых церквей, братств, клубов, отділов культурно-просвітительных организаций для борьбы за полне освобождение Карпатской Руси и свободне самоопреділение карпаторусского народа.

Третья задача нашого объєдинения — помоч Русскому народу в його борьбі с фашистскыми наіздниками на Русску Землю, за свободу свою и нашу. Так, нашы родны братья в краю борются не лем за свою свободу, за свободу народов Совітского Союза, но и в той войні Объєдиненных народов против фашизма они несут десят раз больший воєнный тягар от нас ту, они приносят соткы раз больше жертв от нас. Фашистскы наіздникы опустошили огромны богаты землі, знищили богату индустрию, тысячы городов и сел спалили и зровнали зо земльом, миллионы людей позбавили даху над головом, миллионы замордували, осиротіли миллионы дітей. Но тот народ не зложил оружия, не поддался и николи не зложит оружия, покаль фашизм не буде знищенный, покаль одна німецка нога буде ходити по Русской землі.

Нашы братья записуют в истроию світа велику свою славу, котром они ділятся и с нами, бо и мы походиме с того славного народа. А єсли так, то мы мусиме показатися достойны того нашого роду. Мы не смієме остатися ровнодушны до той великанской борьбы, яку веде Русский народ против німецкых наіздников на Русску землю, отвічных врагов Русского народа и славянства.

Пред героизмом нашых братов склонил голову цілый світ, всі другы свободолюбивы народы, потому што им всім уж днес стало ясно, што єсли бы не тот героизм нашых братов, их героична Красна Армия, то кровожадный фашизм поневолил бы уж цілый світ. Як кто з нас, дорогы братья и сестры, може признаватися до русского роду, и не причинитися хоц лем маленьком жертвом на помоч своим родным русскым братьям? Такых людей не должно быти среди нас.

Передовы американцы организували медицинску помоч Русскому народу под именем “Рошен Вор Релиф”, и американцы жертвуют на помоч нашым родным братьям, жертвуют люде всякых национальностей, всякого роду и кляссы. Не жертвуют лем фашисты, тоты, што хотят побіды фашизма и поневоления фашизмом цілого світа. Мы, люде русского роду, повинны быти на первом місци.

Американский Карпаторусский Конгресс поставил собі за задачу объєдинити сбор жертв на медицинску помоч Русскому народу среди карпаторусской емиграции. Таке объєдинение сбора має и для нашого народа, для будучности нашого Родного Краю велике значение. Чужы посягателі на Карпатску Русь ширят пропаганду ту в Америкі, што нашы братья в краю не хотят объєдинения зо своими братьями, што они не любят, русскых, украинцов, білоруссов и всего Совітского Союза. Мадьярскы агенты ширят пропаганду, што нашы братья любят ліпше Мадьярию, як Россию, польскы паны говорят, што мы любиме ліпше Польшу, бенешовцы твердят, што наш народ ліпше любит Чехословакию, як Россию.

И тепер дана нам возможность самым американскым правительством показати свою любов и родны чувства к нашым братьям — при сборі жертв на медицинску помоч своим братьям. Американске правительство не лем дозволило такий сбор, але поддержує го, члены американского правительства по поручению нашого Президента выступают на предприятиях в пользу такой помочы.

Итак, всякы покутны дипломаты твердят американскому правительству, што наш карпаторусский народ относится враждебно до своих братов в России, они свідчатся всякыми своими платными агентами меж нами. А американске правительство смотрит на нас, як мы относимеся до помочы Русскому народу, до “Рошен Вор Релиф”, ци мы много собрали под своим именем на помоч своим братьям?

Уж до сего часу мы собрали под нашым именем и передали в “Рошен Вор Релиф” десяткы тысяч долларов. То уж заперечат мадьярской, чешской и польской пропаганді. Нияка инша емиграция, котрой Родный край находится поза границы Совітского Союза, не собрала таку сумму на помоч Русскому народу. Не собрали той суммы ни богаты чехы, ни полякы, ни мадьяре на медицинску помоч Красной Армии, яку собрали мы. Они можут сказати, што у них своих армии и им треба своим помагати. Мы признаєме им правду. Но каждый може видіти, што мы не уважаме тоты их армии за армии нашого народа, у нас ніт ни одной группы, котра бы признавала тоты армии за армии нашого народа в краю, натоміст всі мы признаєме, што армиом нашых братов в краю, армиом нашого народа в краю, то русска армия — Красна Армия, и мы той помагаме своим сбором на медицинску помоч.