СЕЛО ЛОСЬЕ И ЛОСЯНЕ
(Пише лосян И. П. ЄВУСЯК)

Коли я жил ище в старом краю, то я прислухувался, як стары лосяне оповідали собі коло церкви и на вечирках о нашом селі, што оно пережило. Оповідали за холеру, котра взяла много жертв. Говорили и о истории Лоси и околичных сел, но никто добри той истории не знал, бо никто николи не записал ей. Говорили, што в нашой околиці села Прислоп и Вафка — найстаршы села, но якы стары — никто не знал. Што до самой Лоси, то говорили, што и Лосье дост мусит быти старе, бо лосяне уж другу церков побудували и на другом пляцу, як была перша. И штука найти такого чоловіка, штобы он знал историю нашого села.

Была у нас єдна хижа, што была побудувана на пняках. Говорили, што певно она была побудувана ище товды, як было заложене село на вырубаниску. Тота роля звеся Куриливка.

Через наше село тече ріка Лосюнка, но не знати, ци ріка взяла назву от села, ци село от рікы.

Дальше говорили, што Лосье заложили и заселили спочатку розмаиты люде, як шведы, полякы и руснакы, но видно, што всім сподабалася найліпше русска бесіда, так што всі потом стали руснаками, хоц наше село сусідує и с польскым селом Ропом.

Друга вода, котра выходит от Блихнаркы, Высовы, Ганчовы, Устья Русского, Климковкы и тече через Лосю, то ріка Ропа. Она получила свою назву от села Ропы, а може село от рікы Ропы, я того не знам, но в нашом селі она не має ище ниякого имена, лем называют “ріка”.

Зо сусідами поляками лосяне жили в згоді, полякы з Ропы приходили до нас на свята и кермешы. И их костел мал так три бані, як и наша церков. Даколи, видно, тоты костелы в сусідных польскых селах были русскими церквами, бо ище в дакотрых мож найти сліды русскы, або и русску церковну книжку.

Из русскых сел нашы сусіде такы: Долины, Білянка, Ліщины, Кункова, Климковка и Вафка. Но всі тоты села маленькы. Єдна Климкивка дост велика. Нияке з них не доходит до 100 нумеров. Но наша Лося, то уж як маленьке місточко. За моих часов было 242 нумеров. Євреів было 20 фамилий, были меж ними не лем торговцы, но и ремесленникы — шевцы, кравцы и т. д. В Лоси мож было всьо купити, як и в Горлицах, то всі околичны селяне приходили купувати до Лоси, што им было треба.

У нас было 18 роль и шолтыство. Але многы газдовскы фамилии на ролях вымерли, осталися лем Долинскы, Фуртакы, Фекулы, Курилы, Телехы, Карлы, Хомы. Остало 7 родов, а 11 вымерло.

Нашы лосяне мало працували на грунтах, майже всі ходили по світу гандлярами. Торговали мазьом и оліями, по цілой Европі розвозили на специальных возах и робили добрый бизнес. Они знали цілу Романию, Венгрию, Чехию, Моравию, Пруссы, Польшу, европейску Россию. До Королевства Польского, што было в России, ходило з Лоси 120 возов, на Венгры 80 возов, по Галичині 10 возов, и т. д. В той торговлі лосяне зарабляли красны грошы, но не знали им порядку, бо або тоты грошы попропадали им дагде в банках, або их пропили, коли повертали на зиму. И часто, коли треба было на яр выбератися в дорогу, до России, ци где, то треба было итти до жида пожичити на дорогу и на товар. Но дакотры складали и дошли до соток тысяч корун. А то были великы грошы пред первом войном. Но як пришла война, то им тоты грошы забрало австрийске правительство на войну.

Читати знало лем штырох людей в селі, и то псалтырь. Илько Телех был дяком, то читати знал, але писати не знал. И не было кому листа написати, треба было жидови корунку заплатити, коли кто хотіл писмо своим родным написати. Тото потом так лосянов позлостило, што почали давати своих сынов до школ до міста. Первый пошол до школы в місті покойный Алексий Шлянта, потом Марко Гижа, котрый был учительом в Высові, потом покойный свящ. И. Фекула, Мойсей Дутка, Григорий Шлянта.

Покойного Алексия Шлянту знає вся наша карпаторусска емиграция, он почал закладати нашы запомоговы организации в Америкі, як Русский Народный Союз (тепер У. Н. Союз зо “Свободом"), Соєдинение, О. Р. Б. и “Православну Любов”. Он был лидером нашой емиграции для цілого твердого угля. Отец И. Фекула тоже помер ище не в старых роках, и Мойсей Дутка помер молодым, и Григорий Шлянта. Ход тоты нашы люде мали дакус школы, но они не могли зробити дашто прогрессивного для нашого народа, бо они училися на панов и хотіли быти панами, а ту панами не были.

Нашы лосяне, разом з лемковскыми патриотами духовниками, основали Русску Бурсу в Новом Санчі, и нараз из нашого села до той бурсы выслали шестох учеников до Санча до школы. До тых бурсаков належат: Андрей и Григорий Карелы, оба покончили университет и находятся тепер в Прагі. Петро Карел, священник в Сингек, Н. Дж. Теодор Гижа, свящ. в Монессен. Юрко Кондратик, был убитый во Франции в прошлу войну, Николай Галь, помер, др. А. Телех и його брат Владимир.

Так што лосяне хотіли выучити свои діти на дашто, но зашла война и розметала тых студентов по цілому світу.

Отец М. Фекула, о. В. Фекула, о. Н. Губяк, о. С. Палюх уж ту покончили школы и всі выучуют своих дітей.

Нашы сусідны краяне робят собі посмішкы з лосянов, што лосяне неробы, лем бы ся волочили по світу. Та прошу показати таку красну громаду студентов з другого села в краю и в Америкі. А сколько лосянов добрых бизнесменов-шторников. Зайдте на плейз, где жиют лосяне, то всяди найдете лосянов бизнесменов.

Перший лосян пришол до Америкы, до Олифанту в 1876 року, а был ним М. Ренчковский. Правда, он был лем наполовину лосян, бо он пристал до Лоси с Кунковы. Його сын ище жиє в Чарлерой и має добрый бизнес. Другым был Кароль Фекула, котрый пришол тоже на Олифант в 1877 року. За нима потом Алексий Шлянта и другы, но лосяне не так барз спішили в Америку, як другы, бо они мали торговлю в краю. Але потом пустилося все больше и больше нашых лосянов в Америку и тепер нас ту уж велика громада. В самой Пеннсильвании жиє 158 лосянскых фамилий, в Огайо — в Акрон и Кливланд 30 фамилий, в. Детройт мало, бо лем 6 фамилий, в Виртон, В. Вирджиния 18 фамилий, в Коннектикот около 10 фамилий, в Нью Йорку 16 фамилий, Нью Дежри 12, в Канаді на фармах 8. А всіх нас, лосянскых фамилий в Америкі 253 фамилии. Но найбольше лосянов жиє на прайсдел, Па., бо 55 фамилий.

И зато на Прайсдел отбылся перший Лосянский Кермеш 1 августа 1941. Бо треба знати, што лосяне в Америкі не мали предтым ище ниякого кермешу и не зышлися разом в громаді ни раз, аж первый раз на том кермешу. Ту поміщена фотография с того нашого Лосянского Кермешу, котрый стал добром памятком для лосянов. Но то лем початок, зато што тепер лосяне будут отправляти кермеш каждого року, як в старом краю.

Так што наша правдива лосянска история в Америкі зачинатся аж от того первого нашого Лосянского Кермешу на Прайсдел. А помогла нам в том наша народна организация Лемко-Союз и газета “Карпатска Русь”, через котру мы могли найтися и порозумітися.

Из первого Лосянского Кермешу была выслана телеграмма Президенту Рузвельту и Амбасадору Совітского Союза К. Уманскому.

Так лосяне, не забудте за Лосье и за свою народну организацию, ставайте членами Л. С. и Карпаторусского Американского Центра.