Кед собі заспівам трома голосами,
Єден пиде верхом, а два долинами. . .
Кед собі заспівам красні премилені,
Аж ся мі розвиют под бучком корені.
Як я си заспівам по-под яворикы,
Почує мя милый аж до Америкы.
Як он мя почує, то он си так рече:
Чиє-ж то дівчатко по горах щебече?
Щебече, щебече по-под яворикы:
Вернийся мой милый, верний з Америкы.
Дівка я сой дівка, дівка я сой праві,
Як тота росичка на зеленой траві.
Бо тота росичка, ніж сонечко зыйде,
А я собі дівка, ніж миленький прийде.
Не мам я голосу, не мам я ладного,
Бо-м ся не навчила, немала-м от кого.
Бо моя мамуся нигда не співали,
Лем все ся сварили, же нас дуже мали.
Мамусь наша люба, не старайте вы ся,
Як мы звырастаме, звыдаваме мы ся.
Идут мі співанкы, як з якого писма,
Кобы я так была до роботы фрышна.
Як ты будеш добрый, то я буду ліпша,
А як ты будеш злый, то я буду гирша.
Кобы-с ты был добрый, я бы ліпша была,
Кобы-с ты розмавлял, я бы зготовила.
Любуй же мя любуй, лем мя не выдавай,
Як приду на танец, близко мя не ставай.
Пива мі не купуй пити го не буду,
До танцу мя не бер, бо с тобом не пиду.
Возми ты сой иншу, а я сой посиджу,
Я тебе Яничку и так рада виджу.
Буде война буде, зо світа зогнана,
Не пущу милого, пиду на ню сама.
Ты такий мой милый, як трава зелена,
Лем тя приздобила китайка червена.
Повідаш миленький, же я не червена,
Росне в лісі травка, не кажда зелена.
Ты такий паробок, а я така дівка,
Ты не маш перечка, а я не мам вінка.
Ты не маш перечка, бо-м ти не купила,
Я не мам віночка, бо-м сой не увила.
Зато не огваряй мя, парадный сыну,
Хоц ты мя не возмеш, я зато не згыну.
Калина малина над водом ся хвіє,
Все богатска дівка с худобной ся сміє.
Где-ж то гудит, где-ж то гудит?
Где-ж то скрипка грає,
Тат то вдова свою дівку
За мужа выдає.
Бідны дівкы ся выдают
З голыма руками,
А богатскы дівкы сидят
С волами, с конями. . .
Беру лен, беру лен,
Загонец през тыждень,
Выбрала-м до краю,
Возми мя шугаю.
Конопка конопка, зелена конопка,
Нема в нашом селі ладного паробка.
Лем тот єден Ваньо,
И то лем в неділю —
Вшыє му Ганичка
Леняну кошелю.
Чом-же ты, дівчатко, таке невеселе?
Бо и млин на муку без воды не меле.
Дармо, дівко, дармо, запрягло-с ся в ярмо,
Уж го не выпряжеш, аж до гробу ляжеш.
Дунаю, Дунаю, тиха в тобі вода,
Не повіч дівчатко, же я был при тобі,
Лем ты так повідай, же я лучку косил,
Дам я ти перечко, што я го рад носил.
Коничку сивавый, вынес мя с Моравы,
Як мя не вынесеш, стрілю ти до главы.
Стрілю ти до главы, стрілю ти до бочка,
Як мя не понесеш там, где родиночка.
Возми мя на танец, мой милый Яничку,
Так ся ти оберну, як на тареличку.
Не выберай, Янчик, в неділю на танці,
Але сой выберай в роботі на сонці.
В неділю на танці — кулява подскочит,
В роботі на сонці лем ногы волочит.