Гитлер веде войну не против даякых поодинокых держав, поодинокых народов, поодинокых державных порядков, поодинокых партий и классов. Єсли Гитлер голосит войну против даякой поодинокой державы, народа, партии, державного устройства, класса — то лем брехня, котром он послугуєся, як средством для досягнения головной свойой ціли — поневоления всего людства. Он голосит, приміром, што Италия, Румыния, Мадьярия, Финляндия, даже Словакия союзники Германии, як ровны з ровными. Розумієся, што то брехня. Тоты державы нашлися в гитлеровской неволі, а их народы проливают кров за тоту головну гитлеровску ціль — поневоление всего людства разом з итальянским, румынским, мадьярским, финляндскым и другими народами.

Гитлер розуміє, што поневоление всего людства лем при помочы самой милитарной машины не возможне, што для того потребны другы средства, головно потребна борьба людей меж собом — борьба другых держав меж собом, борьба народов меж собом, борьба национальна, классова, зрада правительств поодинокых народов, пята колонна, гитлеровски агенты в каждой державі.

Историчны встрічы: 1. Американский Президент Рузвельт и Бритийский премьер Черчилль на воєнном кораблі на Атлантики 2. Совітский премьер Сталин и личный представитель през. Рузвельта Гарри Гопкинс в Москві.

Уж сам кризис капитализма стал помочным гитлеризму найперше для його укріпления, а потом для легкого завоювания и поневоления капиталистичных крайов Европы. Кучка людей в каждой капиталистичной державі дуже взбогатілася, тогды як массы народа страшно обідніли, миллионы голодных безроботных блукало улицами великых европейскых городов за роботом и куском хліба. Пануючий богатый класс в Гитлері виділ єдиного спасителя, и Гитлеру было дуже легко найти приятелей и помочников в каждой капиталистичной державі. О здрадников свойой державы и народа было дуже легко. Богаты люде не думали о обороні свойой державы, а о спасении своих богатств.

О даяком объєдинении, оборонном союзі против німецкого фашизма не могло быти бесіды, бо власть в тых европейскых державах была в руках містных фашистов, або их приятелей, людей, котры виділи в фашизмі, в так званой “сильной национальной власти”, спасение пред своим обідненым народом. А Гитлера они уважали вождем и пророком фашизма. Богаты люде давали му грошы на будову його воєнной машины против коммунизма, помагали му и Муссолиньому в уничтожении испанской демократии, испанского, законного, по демократичной системі выбраного народом правительства.

И єсли Гитлер отважился на таку войну против всего людства, то он рахувал не лем на саму свою воєнну машину, но и на помоч всіх такых своих приятелей, агентов, пятой колонны, всіх врагов народа. Испанска война доказала му, што он має поддостатком своих приятелей в Англии, во Франции, и всіх другых европейскых капиталистичных державах, на котрых може рахувати в часі войны против всего людства за панование над цілым світом.

А головно помогло му то, што массы народа не знали чого он хоче, який тот “новый порядок” он хоче завести. Руководителі державі не поучили народ о гитлеризмі, мимо того што сами они розуміли, чого Гитлер хоче. Гитлер и його нацистска партия не скрывали свою “науку” и свою программу. Они писали о том открыто, чого они хотят, якого порядку они хотят. Гитлер написал книжку “Мейн Кампф”, в котрой выпровадил нову “віру” для німецкого народа и программу для завоювания и поневоления світа. Но буржуазны писателі, политикы и дипломаты говорили нам, што тота гитлеровска “наука" и программа так шалена, што и увагы на ню не треба звертати, што при помочы той дикой наукы Гитлер хоче лем объєдините німецкий народ для борьбы против коммунизма, а головно против Совітского Союза, где находится осередок коммунизма. А коммунизм, твердили они, далеко опаснійший для світа, як фашизм, бо фашизм за “порядок”, а коммунизм за “хаос”.

И потому они не лем не старалися поучити народ о страшной опасности зо стороны гитлеризма, объяснити массам, чого хоче гитлеризм, який тот його “новый порядок”, котрый он хоче накинути силом всему світу, но они старанно уникали такого объяснения, штобы не пробудити народны массы для борьбы против гитлеризма. Они боялися пробужденного и освідомленного народа, што он затребує и от них ліпшой социальной справедливости.

Народ так не розберался в том, што дієся коло него, што несе зо собом Гитлер, што послі розгрома панской Польшы нашы емигранты получали радостны писма от своих родных с краю о том, што тепер уж буде добри, бо пришли німцы и они заведут німецкий порядок, “так што тепер у нас открыватся нова Америка”. Так розуміли тот гитлеровский порядок много нашых родных в краю. Тепер они уж познали тот “новый порядок”, коли гинут на невольничых роботах, в тюрьмах, в концентрацийных лагерах, померают массово от голоду и епидемий. Тепер уж они видят, што принюс им німецкий “новый порядок” — што принюс он страшну неволю и смерть так для руснаков як и поляков. Тепер они уж видят, што гитлеризм, то враг не лем євреів, поляков, руснаков, славян, но враг всіх народов, всего людства. Но они увиділи то аж тогды, коли отдали німцам оружие, и коли німцы забрали им всьо, чым люде жили.

Штобы мы, ище свободны люде, не зробили такой страшной помылкы, як зробили нашы братя в Европі, мы мусиме не лем сами знати правду о гитлеризмі, но мы мусиме проповідати тоту правду дальше, най знают всі, што несе зо собом гитлеризм, а коли всі будеме знати, який тот гитлеровский “новый порядок” має быти, тогды всі объєдинимеся против него и зотреме го з лица землі.

Гитлеризм несе зо собом далеко страшнійшу панщизну, як тота, о якой оповідали нам нашы діды.

Таки задавится

При той старой панщизні панщизняный хлоп у пана представлял вартость, яко робоча сила. Тепер, при техникі и машинах робочий чоловік при панщизняном, капиталистичном порядку не представлят ниякой вартости. Робочой людской силы збыват и потому мы переживаме страшне безроботя. Правительства капиталистичных держав не знают, што робити с тым избытком робочой силы, з миллионами безроботных. Трудно вынищувати, убивати людей, яко непотребных. В дакотрых державах давали тым безроботным запомогу, в другых правительство старалося затруднити их при всякых выдуманых роботах, в третьих, где правительство не дбало о тоту безроботну массу, безроботны люде и их діти вымерали з вычерпания, з голоду.

Гитлеровскы выродкы, назвавшыся німецкыми национал-социалистами, нашли с того кризиса капитализма выход в німецкой панщизні над цілым світом. Учат они німецкий народ, што німецка расса найвысша на світі, што німцы найкрасшы, наймудрійшы, найспособнійшы, што німцы становят якбы шляхту над всіми иншыми народами світа, и потому они должны пановати над цілым світом, над всіми иншыми народами, як даколи шляхта пановала в поодинокых державах.

И лем німцы можут быти капиталистами и поміщиками при том “новом порядку” на світі. Фабрикы можут лем німцы мати, німецкы капиталисты. Земля може лем німцам належати, ниякым другым. Оружие можут лем німцы носити, ниякы другы. Машины можут лем німцы мати, ниякы другы. И такым способом німцы станут пануючом кациом над цілым світом, 80 миллионов німцов над 2,000,000,000 всякых рас и народов. То значит, што около 4 німцы мают пановати над 96 другыми людми. Тоты 4 німцы будут вооружены, а тоты 96 будут безборонны, як в панщизняных часах, што шляхта была вооружена, а панщизняны хлопы безборонны.

Но німецкой шляхті и капиталистам не треба столько невольников, рабов, панщизняных хлопов, потому што при техникі, машинах не треба столько людской робочой силы. Ту фашистскы людоіды розвязали тот кризис по людоідскы. Повідают, што людску надвышку треба попросту вымордувати, выголодити, вынищити, а оставити лем столько, сколько німецкой шляхті и капиталистам буде потребно для чорной роботы. По людоідскому гитлеровскому плану славян из 250 миллионов должно быти вынищено 150 миллионов, німцам старчит 100 миллионов славянскых рабов для найтяжшой чорной роботы. Зато німцы мают множитися як найбольше, штобы до 100 літ они дошли до числа славян — до 250 миллионов.

Штобы люде не бунтувалися против такого порядку, то треба вернути их в темны часы. Всім другым народам, кромі шляхетского німецкого, треба закрыти школы, знищити их народну культуру, литературу, спалити всі книжкы, знищити печатне слово взагалі, позбавити писма. Лем німцы можут учитися, но лем той гитлеровской людоідской наукы.

Славный полыкач мечов

И религию у всіх народов треба знищити, потому што коло церквей могла бы сохранится даяка часть национальной культуры, даяка организация. Потому має быти введена поганска німецка религия и церков, где будут проповідувати гитлеровскы агенты тоту німецку религию для поневоленых и затемненых людей. Будут проповідувати, розумієся, што німецкий бог найсильнійший, всемогущий и страшно покаре мечом каждого раба, котрый осмілится збунтуватися против выбраного тым богом німецкого народа. Гитлер стане великым пророком того німецкого бога и спасителем світа пред коммунизмом и демократиом.

Спроситеся, ци люде повірят в таку религию: затемненый чоловік всьому повірит. Каждый знає, што нашы предкы в темных часах вірили во всякых больванов, яко своих богов. Затемненый народ повірит и в то, што Гитлеру дал таку силу бог, а раз тот німецкий бог такий сильный, што потрафил знищити християнского Бога, то треба того німецкого почитати.

В што народ може повірити, хоц и школованый, то найліпший примір німецкий народ, котрый повірил в таку сумашедшу науку выродка Гитлера. Сильны, пануючы, правительство може всяко выховати народ, во всякой вірі, доброй або злой. Сам Гитлер повідат, што чым большу неправду повісти народу, то он ліпше тому вірит. И што до німецкого народа, то слова Гитлера сполняются цілковито до сего часу.

То єст в короткости людоідска наука и ціль німецкого фашизма.

Ци то выполниме?

Єсли бы всі державы были такы, як приміром Франция, переполнены гитлеровскыми агентами, з розбитым, нерозуміючым цілей гитлеризма народом, то Гитлеру легко удалося бы завоювати и опанувати цілый світ. Мы виділи, як му легко пришло поневолити западну Европу. Для опанования світа Гитлеру потребно лем, абы всяди його агенты фашисты захватили власть. В єдной при помочы гитлеровской воєнной машины, в другой при помочы пропаганды и пятой колонны, в третой при помочы страху пред коммунизмом, в четвертой при помочы народных зрадников. А захвативши контролю, оружие, индустрию в державі — стає паном Гитлер, його німецка фашистска бандитска клика.

Нам, приміром, в Америкі говорят гитлеровскы агенты, што Гитлер против Америкы не воює, ани он Америку не в силі завоювати, бо Америку отділяют от европейско-азиятского континента два великы океаны. Притом Америка, особливо США дуже сильна индустриально держава и она в силі оборонити себе против цілого старого світа, опанованого Гитлером.

Кто розуміє, чого хоче гитлеризм и як он иде до свойой ціли, тот розуміє тоже, што борьба европейскых народов против гитлеризма, то єст наша борьба. Бо тот розуміє, што гитлеризм не може удержатися при свойом порядку в Европі, в даякой части світа и он мушеный стремити до завования и поневоления цілого світа. Гитлеризм не може позволити на то, абы в даякой частині світа осталося світло народной свободы, демократии, свободный народ, потому што из той частины світа лучы такого світла пробивалися бы в гитлеровску темноту и поневолены народы не переставали бы боротися за свою свободу. Абы гитлеровский людоідский порядок мог удержатися, гитлеризм мушеный знищити всяку народну культуру, школу, книжку, газеты, церков, народны организации, кромі фашистскых німецкых. Он мусит знищити не лем народны, робочы организации, он мусит знищити и капиталистичны организации, кромі німецкых — и капиталистов, кромі німецкых. И он то зробил уж в поневоленых ним краях, то само он мусит зробити на цілом світі, кинути народы світа в непросвітну темноту, бо лем така темнота прийме німецку панщину. Темному, неграмотному народу мож накинути всяку власть, всяку религию и повернути го так, як хоче вооруженый пануючий и його машина.

Гитлер не потребує высылати войско для завоювания Америки, Коли йому удалося бы поневолити Европу и Азию, з Америком он справится через своих німецкых агентов и зрадников американского народа, они захватят для Гитлера власть в Америкі, и то дуже легко, бо масса народа не розуміє, чого гитлеризм хоче и якыми штуками он обезоружат, опановує и поневолят народы. Гитлеровскы агенты и зрадникы Америкы до днес ходят свободно помеж народ и под покрывком американского патриотизма робят гитлеровску роботу и подготовляют грунт для гитлеризма. И єсли бы Гитлеру удалося завоювати и поневолити Совітский Союз и Англию, то американскы гитлеровцы придут до власти ту без войны, як пришли в дакотрых европейскых державах без войны з гитлеровском Германиом — в Румынии, Мадьярии, Финляндии, Болгарии. Гитлеровцы в Америкі черпут свою силу з гитлеровской Германии. Єсли гитлеровска Германия побіждат, их сила росне, коли гитлеровска Германия буде упадати, они упадут. Єсли, приміром, гитлеровска Германия буде розгромлена на русском фронті, то в Америкі мы не будеме чути о Линдбергі, Гвилері, Гувері, Кадаги и “Америка фирст комити”. Як гитлеризм в Германии и поневолных краях жиє своими воєнными побідами, так жиют тыми побідами його агенты, гитлеровцы в ище непоневоленых краях. Розгром німецкой гитлеровской воєнной машины союзниками буде означати конец гитлеризма и фашизма на цілом світі.

Сегодня вся сила гитлеровской воєнной машины была кинена на восточный фронт, против Совітского Союза. И потому так важна воєнна помоч Совітскому Союзу, котрый несе на своих плечах, засланят своими грудьми, несе огромны жертвы за свободу всего людства, и за свободу нашу, ту в Америкі тоже. Совітский Союз, то тота головка сила против гитлеризма, што єсли гитлеровской воєнной машині удалося бы завоювати совітскы землі и поневолити совітскы народы, то гитлеризм стал бы паном світа.

Ци може гитлеровска воєнна машина побідити Совітский Союз и поневолити совітскы народы?

Но, не може. Чом не може, постарамеся объяснити дальше.