В Африкі в области екватора плыне могуча ріка Конго, друга найбольша ріка в світі послі Амазонкы богатством воды. Вся вода вливатся в Атлантичный океан. Постоянны вітры приносят из океана великы выпары, котры потом падают уливными тропикальными дощами на величезной области меж тропиками. Тропикальны зливы не похожи на нашы зливы. Там за три годины злива наліє воды на 10 см. Вода быстро сплыват лоточками и річками в великанску ріку Конго.

Так кружит вода цілый рок: она выходит, яка пара из океана, живит землю Африкы и отплыват ріком Конго назад в океан. Беспрерывна вогкость в жарком климаті творит буйну рослинность на величезной ровнині, на котрой вырос тропикальный ліс.

То чудо рослинности, хаотична мішанина пальм, фигового дерева, великанскых папортин, акаций, мимоз, лиян, орхидей, бананов, дикого винограда и много иншых рослин, котры сплітаются в непроходну гущавину. В таком лісі в день темно, солнца майже не видно. Дерева-великаны досягают 50 метров высокости и до трьох метров грубости.

Ліс росне якбы на три поверхы. Внизу в полтемряві застелюют землю мохы и такы травы, котры меньше потребуют світла. Над ними подносятся корчы и низкорослы дерева, обвиты лиянами. Лияны звиваются, як канаты з зелени и квітов, перекидаются з дерева на дерево и висят гирляндами в воздухі. На высоті 20—30 метров поднимаются зелены конари лісных великанов, што вкрывают своим листьом, як дахом, нижны поверхы. Часами лияны звиваются по их приземках доверха и спадают вниз.

Земля покрыта гниючыми колодами, купами лиян, што тліют, чепкыми ползучыми рослинами, трав ом и мохом. Вогкий жаркий воздух помагат быстрому гнитю. То запричинят шкодливы выпары, тяжкы для дыхания. Вітер не може проникнути там, штобы освіжити воздух.

В часі страшных тропикальных бурок, коли блискавицы беспрестанно блискают и бют громы, ліс приходит в рух от вітров. Чути тріск, свист и скрип, падание вырваных с коріньом великанов. Починатся злива и всьо перетворюєся в хаос. Шум дощовой воды заглушат людский голос. Але заледво пронесеся буря, ліс знов стоит тихый, величавый и безлюдный.

В густом непроходимом лісу тяжко пробратися для каждого звіра. Лем часом можно встрітити стадо слонов, яке ходит на водопий в ріку. Трафляются буйволы и кабаны, коло рік бегемоты и носорогы, а в ріках крокодилы. Птахы дают знати о собі беспрерывным шумом и криками, але видіти их майже неможливо. В гущавинах живут людоподобны малпы — горилы и шинпанзе. На землі ползают зміі и ящуркы.

Але найбольше в тропикальном лісі инсектов — мух, комаров всякого роду. Ту их царство серед вогкой гниючой рослинности. Коли приложити ухо до гнилого дерева, то чути бесперестанный шум в рередині и цвірк инсектов, што роятся.

Найбольше нестерпимы невеличкы пчолы, котры стараются вжалити в око непрошеного гостя, залізают вам в ноздри и уха, лізут в рот. Оса бренчит над ухом, величезный чмель снує перед носом, цілый рой мурянок сыплеся з конарок на голову. Друга стая грызе ногы, залізат на шию. Армии термитов и жуков в день трафляются на каждом місця, а в ночи беспрестанно цвірчат коникы и цикады, ночны мотылькы и мушкы массами летят на огонь. Множество комаров, што ссут и жалят, не дают заснути.

В том страшном лісі ниякых дорожок и стежок не было прокладено, коли вандровник Стенли з великым караваном арабов и негров постановил перейти через него по берегу рікы Конго. Десят місяцов люде шли майже безпрерывно в вогком задушливом воздухі з болотными выпарами. 3 дерев капала роса, як дощ, долго ранами прокрывала землю мгла, одежа николи не высыхала, быстро тліючи от гнитя.

В лісі не встрічали поживных плодов, не удавалося убити звіра або птахов. Люде голодували и хворіли.

На початку подорожы Стенли писал:

“Мы полземе, хапамеся за што попало, протискуємеся через вогку гущу. Люде уж не не идут живо — каждый лем ся влече. Розмокла глина ховзатся под ногами, ногы грязнут в болоті. Всі цілковито змучены, а лісові и конца не видно. Послі полудня розложилися табором, цілковито змучены борьбом з лісом гущавином, стомлены страшном спеком”.

Потом Стенли перешол с караваном через такий самый ліс по рікі Арувимі, што вплыват в Конго. Там всяди встрічали звалены дереза. Они в беспорядку завалили переходы, дакади лежали впоперек потоков, Люде падали с тых мостов, дерлися на рачках, поднималися по похилому дереву высоко в гору и перескакували с конари на конар. Цілы годины вытрачали на тоты нестерпимы переходы в роспеченой жарі и душном спертом воздухі.

3 гущавины ліса вылітали часами затруты стрілы невидных ворогов, містных жителей.

Але найтяжше было, коли стратили стежку и шли по компасу, прорубуючи гущ. Часами за годину не проходили больше, як пол киломертра.

Часть людей загинула от той тяжкой подорожы, з голоду и от затрутых стріл місцевых жителей, котры боялися непрошеных гостей.

В такых тяжкых условиях был зробленый тот переход тропикальным лісом Африкы.