500 літ тому назад люде ище вірили, што Земля, то найбольше тіло во всесвіті, што Солнце, Місяц и Звізды ходят вколо Землі, а Земля стоит нерухомо на єдном місті. Так казала вірити людям церков. Так здавалося людям и на око.

Всі мы видиме, што каждого дня рано солнце всходит на всході, плавно подниматся до полудня и заходит вечером на заході с тым, штобы завтра рано знов выплысти на восток и зробити свою дорогу по небі на запад. Та и Місяц, и Звізды, плывут собі по небі из востока на запад. Якже иначе вірити, як не так, што Земля стоит, а всі другы тіла небесны обходят Землю доокола?

И так вірили люде дуже долго, покаль не появился ученый — Николай Коперник, котрый доказал, што то нич инше, лем обман, бо не другы небесны тіла ходят около землі, а земля обертатся найперше каждых 24 годин сама вколо свойой, воображенной оси, а за час єдного року робит огромный путь во всесвіті, вколо солнца. Што мы того не замічаме, то совсім природно, бо земля обертатся из запада на восток за єдну добу, як тоже обходит вколо солнца за час року, ровно, плавно, тихо, без ударов, без потрясень. И солнце, и місяц, и звізды, тоже не стоят на одном місті, всьо плыве в огромном всесвітном пространстві по природному, математичному праву.

Коперник родился в 1473 року в місті Торуні, в Польщі. Послі смерти отца взял го на выхованя стрыко. Коперник ходил на университет в Кракові, потом в Италии выучил медицину и астрономию. В тоты часы вся наука в европейскых университетах отбывалася на латинском языкі.

То были часы, коли студенты интересувалися надзвычай астрономиом, то єст науком о небесных тілах и их физичном праві, их руху. Студентов не задоволяла церковна віра в нерухомость землі и туманны пояснения руху небесных тіл, солнца, місяца, планет, звізд. Бо то не было ясне, по той вірі немож было вытолкувати явлений природы, пор року. В старой греческой наукі вынайдено, што ище в 3-м віку в Греции астроном Аристарх учил, што Земля ходит вколо Солнца, и обертатся сама вколо свойой оси. Но и тот старинный греческий ученый думал, што другы небесны тіла стоят нерухомо.

Коперника дуже заинтересовала астрономия и он много думал над учением Аристарха, котрый на основі свойой теории, што земля ходит вколо солнца и обертатся сама вколо свойой оси, мог правильно объяснити поры року и ноч и день. Коперник переконался, што учение старинного греческого ученого правильне, а учение о нерухомости землі лем віра без ниякой основы. Треба было доказати людям научно, што то не правда, в што они вірят. И так Коперник посвятил своє житя на то, абы доказати научно тоту сегодня всім знану правду, што не солнце ходит вколо землі, а земля вколо солнца, и што земля обертатся вколо свойой оси.

В Кракові дотепер показуют туристам высоку башту, в якой сиділ Коперник и слідил за рухом небесных тіл. Там в той башті Коперник працувал понад ЗО літ, абы доказати людям велику правду. Тогды ище не был знаный телескоп, то єст научный приряд до убольшания небесных тіл для взору, и молодый ученый нераз просижувал цілыми ночами в свойой вежі и слідил за перемінами на небі при помочы простых инструментов.

Коперник знал, што солнце и звізды много раз большы от землі, и здаются маленькыми лем зато, бо находятся на огромном отдалению от землі. А єсли так, то ци не яснійше, што меньше тіло ходит вколо великого, а не велике тіло вколо малого тіла? Ци не розумнійше припустити, што земля обертатся раз на добу около свойой воображенной оси, и такым способом, на поверненой до солнца стороні земли маме день, а на другой стороні, отверненой от солнца маме ноч? А то значит, што солнце знаходится в центрі нашого світа, яко найбольше тіло, а всі меньшы тіла, до котрых належит и наша земля, стосуются до солнца?

Ясно, што и зміна пор року, весна, літо, осень и зима, приходит от того, што, коли земля обходит за час одного року солнце, то в свойом пути раз выставлена до солнца больше том частьом, другий раз другом, бо земна ось не змінят свого нахылу. “Лем тым єднаковым нахылом оси можно вытолкувати неровность дней и ночей и зміну пор року — рішил Коперник. — Коли бы земля не мала нахылу, то дни и ночы все были бы ровны.”

В 1543 року была напечатана книга на латинском языкі, в якой было поміщене учение Коперника. Но сам Коперник был тогды уж при смерти. Он лем мог подержати книжку в холодных руках и помер. Але учение Коперника зробило го бессмертным на вічны часы.

Коли книжка Коперника досталася в рукы монахов и они прочитали єй, зробили крик:

“Таж то гріх, таж то єресь, єретичне учение!”

— То опасне вольнодумство, то против самого Бога — твердили другы.

“Як мож идти против наукы церкви, котра учит, што земля стоит, не рухатся, и находится в центрі світа”...

Почалися переслідования правдивого учения Коперника. Книжку заборонили печатати, а кто отважился обстати за учение Коперника, того переслідували.

Первый погиб ученый итальянец Джордано Бруно. Його спалили на огні в Римі в 1600 року.

Бруно был одным з великых мыслителей. В молодости он жил в монастыри и там учился. Треба знати, што в тоты часы не было нецерковных школ, кто хотіл учитися, мусіл идти до монахов. Вся наука была под контрольом церкви. Бруно не мог стерпіти той скованой монахами наукы, он горіл жаждом широкого свободного знания. “Прагнение истины — єдине занятие героя”, — писал он потом.

Бруно скинул зо себе рясу монаха, утік з монастыря и почал ходити по містах и просвіщати молодеж в духі учения Коперника. До його рук попала книга Коперника. Он стал сторонником новой системы світа. Но он пошол дальше и дошол до того, што переконался, што весь наш сонечный світ, значит Солнце, Земля, Місяц и другы планеты, што кружат вколо нашого солнца — то лем порошинка в огромном просторі всесвіта, што такых солнц, из котрых кажде має свои планеты, свои землі, незраховане число, их столько, сколько мы видиме звізд на небі, тоты звізды, то солнца, лем дуже далеко. А сколько мы звізд не видиме, што они так далеко, што даже через телескоп людске око не досягне. Єдны из тых світов творятся, другы пропадают, гинут. Тым світам ніт числа. Всесвіт бесконечный. За тото правильне учение о всесвіті Вруна почали переслідувати. Його хитростном заманули в Рим, котрый был в тоты часы столицом папской державы. Ограничена пап ска держава была середина сегодняшной Италии. Не ограниченом папском держаком были всі католицкы краи в Европі, римский папа, через своих заступников, кардиналов, епископов и духовенство мал такий вплыв на пануючых, што ниякий пануючий його волі не сміл спротивитися. В тот Рим привели Вруна и заточили в тяжку папску тюрьму. Спочатку требували от него, абы отрюкся авого учения. 8 літ Бруно сиділ в тюрьмі, не отрюкся правды, он завзято и сміло защищал своє учение.

Коли папский суд засудил Вруна на смерть в огні, тот муж не показал страху и заявил судьям:

— Вы з большым страхом объявляте свой присуд, як я го слухам.

Он твердым кроком вышол на стос приготовленого дерева и сказал:

— Я умираю мучеником за правду.

Каты подавали му крест, але он отвернулся от них.

В одной книгі казнь Бруно описуєся так:

“Незадолго казнь... Звонят звоны... Шумит и волнуєся огромна толпа народа... Раптом всьо утихат. Показалася процессия. Впереди повіват кроваво-червеный флаг. За ним идут священникы в блискучых ризах. Он иде повольно, на його руках и ногах звонят кайданы. Який он блідый! Але який спокойный и незахвійный! Ни тіни ваганя на його обличі, освітленому глубоков думов. Великы смутны очы нерухомо смотрят вперед. От чого в них столько жалю, чого они жаліют? Ци житя, з якым росстаєся, ци про сліпоту тлуму? Але тяжкий путь сконченый. Настає хвиля мертвой тишины. Бруно повольно всходит на стос... Його привязуют ланцухом до столба. Ни скаргы, ни звуку... Вітер, што подул, зарушал його каштановыми волосами и повіял в лице ароматом весняных квітов: послідный привіт землі. Взор Бруно зверненый на небо. Як всьо то прекрасно: тоты квіты, тот блеск весняного дня, тота бездонна синява неба, весь тот світ. Бруно не видит катов, якы мечутся внизу и стараются запалити стос... Ище хвилька — занялося огнище, и столб поломени, што звился вгору, заслонил мыслителя от взоров толпы.”

Тепер великому Бруно стоит памятник на місті спаления, як великому мыслителю и мученику наукы.

Через осем літ по смерти Бруно было вынайдено в Голландии побольшаюче шкло, приближаюча труба. Она наближала отдалены предметы. О том дознался итальянский астроном Галилей и створил первый телескоп.

Телескоп был малый и слабый, але он роскрыл великы тайны всесвіта, якы до того часу никому не были відомы. В нерву звіздну ноч Галилей был зачудованый, коли увиділ в свой телескоп много тысяч звізд на небі, котрых он не мог видіти простым оком.

Перший телескоп Галилея увеличил лем в три разы, але он приготовил другий телескоп, котрый увеличил уж осем раз. Як он был зачудованый, коли замітил на великой кулі планеты Юпитер три темны точкы. Галилей з нетерпінием ждал ночы, штобы переконатися, ци одошол Юпитер от тых трьох точок. Так, одошол от тых точок. Выяснилося, што они трохи пересунулися на запад. Он жде четвертой ночы и переконуєся, што то сопутникы Юпитера, як наш Місяц — сопутник Землі. Потом нашолся ище сопутник, и Галилей вызначил час их обороту наоколо Юпитера. Тому астрономы не хотіли вірити и єден з них даже не хотіл смотріти в телескоп.

Галилея не смутило таке недовірие, и он продолжувал свои спостережения. Місяц в телескопі оказался кульом з горами и западинами, подобными на дно моря. Яскрава планета Венера, што появлятся вечерами на востоку перша от другых, в телескопі была подобна до невеликого серпа. Галилей почал призератися єй кажду ноч и установил, што при свойом обороті вколо Солнца Венеру видно из Землі, як и Місяц, то в формі серпа, то полколеса, то цілого колеса. Але простым оком того видіти не можна, хотя Коперник и предвиділ такы зміны. Они бывают от того, што Венера ближе Солнца, як Земля, и Солнце освічат єй то з єдной стороны, то з другой, як и Місяц.

“Яку правду мал Коперник!” — думал Галилей.

Он перенюс телескоп в Рим и продовжувал спостерегати. На Солнці он замітил плямы, якы пересувалися все в єдну сторону, што показувало, што и Солнце обертатся вколо свойой оси. Всі дивувалися новым открытиям.

Но на Галилея ждала доля Бруно. Почали му загрожувати каром. Ученый не хотіл молчати и написал книгу о своих открытиях, котры блестяще потвержували учение Коперника. Тогды його обвинили, яко єретика, заточили в тюрьму и послі мук под загрозом смертной кары примусили отречися учения Коперника. 70 рочный Старушок примушеный был пред толпом народа узнати за помылку то, в чом он был переконаный, яко научной истині. Повідали, што Галилей, послі отречения от правды, сказал:

— А все ж она (Земля) обертатся.

Отречение от правды урятувало житя Галилея, але його держали в тюрьмі ище рои послі того. Потом он прожил решту свого житя в свойом будинку, недалеко от Флоренции под строгым надзором власти. Незадолго он осліп и помер в 1642 року.

Так папа и духовенство жестоко росправлялися з учеными, котры осмілювалися говорити народу правду.