ЯКУ-МАМА

Кто не жил в восточном Перу, тот не знає, якым добрым товаришом, сторожом и няньком для маленькых дітей може быти страшный для европейца удав (дуситель Боа, огромный уж, гад, змій). У нас гады вызывают страх и омерзіние. Даже на нешкодливых ужей дакотры люде не можут смотріти без страху. Однако ужи легко привыкают к чоловіку и освоюются, они приносят даже пользу в господарстві, нищат мышей.

В Южной Америкі, в долині рікы Амазонкы, водятся зміі, страшнійшы от нашых ужей. То огромны удавы, дусителі. Тіло их досягат часами десять метров долготы. Дусителі страшны для найсильнійшых звірей. Дуситель кидатся несподівано на свою жертву, обвиват єй своим сильным мускулистым тілом, дусит єй и полыкат цілу. Потом надолго западат в сон и тровит свою добычу.

Индийцы Южной Америкы приучуют молодых дусительов, освоюют их и там часто притрафлятся, што тота страшна потвора робится совсім ласкавом с чоловіком и выполнят ролю домашного найвірнійшого сторожового пса, стереже дітей от опасности, котрой не мало в джунглях, населенных разными дикыми пажерными звірами.

Испанский писатель Кальдерона, котрый хорошо изучил быт и обычаи Перу, в одном из своих перувианскых рассказов пише:

“Искатель каучука отправляючись в джунглі, оставил дома сімлітнього сына Выходячи с хижины он долго кликал домашнього дусителя, но тот дримал в воді, перетровлюючи убитого вчера звіра, и не пришол на кликы господаря. Не было што робити инше, лем треба было оставити сына самого. Чоловік, штобы потішити сына, оставил му праженых мурянок — любиме лакомство жителей Перу, котрого смак подобный до английскых освіжительных кваскуватых цукерков, — припер двери зо двора огромном тарчом черепахы и поскакал в джунглі.

Хлопцу скоро наскучило сидіти самому, и он почал голосно кричати:

— Яку-мама! Яку-мама!

Дословно то значит — “мати рікы”. Так индияне называют дусительов.

Из рікы вынюрнула огромна ростворена пасть, ліниво зіваючи. Пятиметрове зеленувате тіло, ползучи, рушило ку берегу. Хлопец заплескал в долони от радости, што огромный звір явился на його зов, як домашний пес. Та ци дуситель — то не сторожевый пес и не слуга маленькых дикарей!

Дуситель пхнул двери и вошол до-хиж.

Хлопец скочил ку нему. Он любил засувати пястукы в пасть звірю и стрілами щекотати чешую. Потвора терпеливо зносила всьо от маленького тирана.

Дуситель схватил хлопчика на звитый хвост и подкинул до повалы. Хлопец завискал от радости.

В тот час в дверях дался чути шелест. Дуситель оставил дитину и замер, як сухе дерево. В дверях стоял ягуар (в роді тигра), готовый до скоку на хлопця. Дуситель, як спугана мама, заслонил своим тілом хлопця и борьба почалася. Уж кинулся на звіря и обвил го своим тілом. . . Потом — лужа чорной крови. . .

Хлопец виділ всьо. Зо страхом он слідил за борьбом. . .

Вернувшийся отец отразу понял, што ту было. Спочатку он кинулся к дитині и, успокоивши, начал ласкати мертву голову друга-дусителя, шепчучи:

— Яку-мама! Яку-мама!”