Часто в нашой организации, в отділах Лемко-Союза, заходят недорозуміния меж членами, котрый з них первый, котрый робит больше для организации, котрый з них “лидер”, або по нашому газда. Часом выбиватся єден с членов вперед своими способностями и роботом. Но члены, котры мало ище розуміют организацию, вмісто тішитися тому, што у них нашолся такий способный и працовитый член, завидят му и стараются перешкодити му в роботі, стараются уменьшити його роботу и понизити його самого. Повідают, што он хоче диктувати, быти диктатором в отділі, и нараз они стают оборонцями демократии. Часто так докучают тому члену, штобы он был змушеный усунутися от всякой роботы, и отділ має велику страту.

Члены Л. С. ч. 13. не знали такых споров и завистей, и длятого, хоц их єст мало в отділі, бо Стамфорд невелика лемковска колония, их отділ все был первый. Бо у них ніт того, котрый член ліпший. Всі члены у них добры, єднакы в организации. Правда, як всі люде по своим способностям не єднакы, так и члены Л. С. по своим способностям не єднакы. И найспособнійшым меж способными членами в Стамфорд был покойный Семан А. Телеп. 

Семан А. Телеп.

Ниякых споров над тым не было, всі члены Л. С. в Стамфорд признали го своим лидером, своим газдом, не зважаючи, ци он хотіл того, або не хотіл. Но по своим способностям и по любви к свойой организации, такой як и у другых членов того отділа, он стал газдом. И всі члены отділа свого газду слухали и помагали му. Тым толкуєся тот успіх отділа Л. С. с Стамфорд, хоц наша колония там невеличка.

Семан Телеп то был такий чоловік, што всьо виділ и всьо обрахувал. При газдовстві Семана не могло быти николи страты при даяком предприятию, а все был заробок. Як виділ, што мало заробку выходит, то доложил сам, а с тым николи не признавался. Повіл, што товар меньше стоял, або дашто таке, и все добри выходило.

Часом в отділах трафляются такы “добры газдове”, што повідают:

“Што мы маме высылати там им до Нью Йорку для Гунянкы! Таж и нам ту треба!” И члены, котры не розуміют организации, тішатся такому “газді”. Им цілком ясно, што он добрый урядник, коли он так дбат о свою кассу. Но покойный Телеп все был затым, штобы половину с каждого предприятия выслати в центральну кассу, все повідал: “Што-ж мы будеме вартати без организации, без газеты?” Но зато будували в Стамфорд и свою отділову кассу, мали уж до двох тысяч. Но як пришло до будовы Центра, цілу тоту отділову кассу вложили до той будовы. А пруч того пару тысяч зложили сами члены отділа жертвами и пожичками. Найбольше зо всіх сам газда наперал: Гварил: “Што-ж наша организация вартат, як она не має свого будинку? Тото тепер для нас найважнійше, штобы побудувати свою центральну будову.”

Лем подумайте, яку огромну роботу мы бы зробили, коли бы всі отділы, члены отділов Л. С., были такы, як в Стамфорд, и каждый отділ мал єдного такого газду, якым был покойный Семан Телеи.

А покойный наш член Семан Телеп не был даякий аристократ, даякий ученый, але наш простый лемко хлоп емигрант з Вирхні, з невеличкого лемковского приселка горлицкого повіта, скромный, незарозумілый на свои способности, але зато любящий свой бідный народ так, што был готов отдати для него всі свои силы и свои способности.

Семан Телеп родился 27 апріля 1889 року, в Вирхні, повіт Горлицы. Приіхал в Америку ЗО літ тому назад. Жил в Юнкерс, Бриджпорт и Стамфорд. Покойный взялся до бизнесу в початках свого пребывания в Америкі и мал успіх, в Бриджпорт свого часу был уж знаный цілому місту. Покойный, на сполку з другым, выбудувал театр, но пришла депрессия и стратил на той будові. Но скоро поднялся знов. Откыл бизнес в Стамфорд, котрый провадил с успіхом до самой смерти.

Умер 29 юля 1938 на грудну болізнь, ище молодым, бо 49 рочным чоловіком. Оставил по собі вдову Катерину из фамилии Корин, и дві дорослы донькы, Марию и Ольгу. Всі три добри обеспечены.

В покойном члені нашой организации утратил Лемко-Союз не лем передового члена, стамфордский отділ свого газду, зо смертном Семана Телепа утратил цілый наш карпаторусский народ одного з найліпшых своих сынов, якых у нашого народа ище мало. Но они уж родятся и у нас. Родятся в старом краю в большом числі, як умирают, што найліпшом заруком ліпшой будучности нашого народа.

Нам, оставшымся в живых ту на емиграции, покойный Семан Телеп оставил добрый примір, як мы можеме помочи нашому бідному народу, як можеме помочи робочой кляссі свойом щиром и честном роботом для народной организации.

Дякуєме Тобі, Семане, за твою щиру и честну роботу для свого поневоленого народа — дякуєме Тобі за твой добрый примір для нас. Най Американска земля буде тобі пером, а у нас останеся по Тобі ВІЧНАЯ ПАМЯТЬ!