Што до газеты “Лемко", то тоже не теперішный редактор “Лемка” єй почал видавати, а почал єй выдавати о. Роман Прислопский из Жегестова, повіт Новый Санч, в 1909 року. Он назвал свою газету “Лемком”. И тота газета была тогды органом старого русского грек. кат. духовенства на Лемковині против украинского духовенства, котре почало приходити пред войном ни Лемковину, насылане украинскым епископом из Перемышля. Русске духовенство ширило того початкового “Лемка” по церквах, зберало предплату и прессфонд от парифиянов. Теперішний редактор, ище в школі, в сандецкой гимназии, писал до того “Лемка" от самого початку под именем Ваня Гунянкы. Розумієся, треба было писати так, штобы перешло духовну цензуру, бо “Лемко” был в руках духовенства. Но спочатком 1912 року “Лемко” перешол в рукы теперішного редактора, самого Ваня Гунянкы, бо в руках духовенства он не мал великого успіха, читателі были мушены. Старый дідо Мохнацкий з Мохначкы до оч все духовникам повідал: “Як бы не тота Гунянка, то тот ваш ‘Лемко’ бы нич не вартал”... Но и коли “Лемко” перешол в рукы Гунянкы, то он уж цілком не робил розлукы меж дудуховниками, ци русскыми ци украинскыми, лем рахувал их до єдной кляссы. С того, вышла ціла революция, бо тоты самы духовникы, котры недавно “Лемка” до церкви приносили и примушали предплачати, почали проклинати го и грозити, што кто буде читати “Лемка”, того не приймут до сповіди. Народу стало то чудно, каждый застановлялся над тым, што то єст, што недавно тот был грішный, котрый “Лемка" не читал, а тепер уж тот грішный, котрый “Лемка” читат, и люде почали хапати газету и читати з великым интересом, так што “Лемко” мал великий успіх меж нашым народом, не лем в краю, но и в Америкі. Газета почала ставати на свои ногы, на предплаті, на своих читателях, “Лемко” почал переходити в Восточну Галичину и Угорску Русь, почал быти найпопулярнійшом газетом своим змістом и рисунками студента Ваня Русенка.

Война перервала просвітительну роботу “Лемка” среди карпаторусского народа в краю. Но часть, найважнійшу часть роботы он зробил, а то тото, што он научил наш народ в польской части Карпатской Руси, на Лемковині, читати газету и світску книжку. До того часу трудно было найти одного такого селянина в селі, котрый бы читал світску литературу. Так было на цілой Карпатской Руси. И єсли в галицкой части тото недовірие до газеты и книжкы было скорше зламане, то тото треба завдячити лем газеті “Лемко”, котра подошла к народу с живым словом, родным языком и народном правдом. Послі войны, в часах розгорівшогося шовинизма в новых державах, в Польші и Чехословакии, меж котры карпаторусский народ был розділеный, така народна газета на родном языкі, котра бы писала нашому народу правду, не могла появлятися. Польскы паны прямо не дозволили издавати таку газету ани литературу. В Чехословакии, коли появилася така газета або книжка, конфискували єй. Так были конфискуй ваны в Чехословакии календари “Лемко”. Литература, котра была дозволена в Чехии и Словакии, не была дозволена в Карпатской Руси. Чешскы и словацкы шовинисты поставили собі за задачу вынародовити карпатороссов. Длятого они и тепер из Америкы застановили вступ нашой газеті “Лемко” в Чехословакию, бо они виділи, што то одинока газета и литература, в котрой наш народ росчитуюєся и глядат єй сам.

Коли показалося, што наша родна газета и литература не може выходити на свойой землі, “Лемко” перешол на емиграцию, в Америку и спочатком 1928 появился в Америкі, в Филаделфии. Так што спочатком 1938 року минуло 10 літ, отколи появилася газета “Лемко” на емиграции. Спочатку лем раз на місяц, то значит 12 нумеров на цілый рок. Но “Лемко” все больше и больше зберал коло себе читателей, приятелей, прецплатников, так што он тепер выходит поверх 100 нумеров рочно, а читателі требуют, штобы його ище частійше выдавати.

Коли был основаный первый отділ Лемко-Союза в Виннипегу, то он уж был основаный коло той газеты, котра печаталася в Филаделфии. “Лемко” стал органом того первого отділа и росширил вість о основанию такой организации по Америкі. Скоро почали рости новы отділы коло “Лемка” и газета помагала Лемко-Союзу, а Л. Союз газеті, так што уж спочатком 1930 року газета могла выйти каждый тыждень, и вышла в том року в Кливланді, Огайо, где в тот час был найсильнійший отділ Л. С. ч. 6, и члены того отділа много помогли газеті, а тым самым и организации. Там газета выходила до конца 1935 року, то значит 6 літ выходила яко тыждневник, а с початком 1936, по ухвалі Олифантского Съізда в 1935 року, “Лемко” был перенесеный в Нью Йорк и почал выходити два раз в неділю.

Може, кто спросится, длячого “Лемко” так подорожовал, из Филаделфии в Кливланд, из Кливланда в Нью Йорк, длячого зразу не установился в Нью Йорку? Бо спочатку выдавати газету было дуже тяжко, мало людей нашых розуміло значение организации и газеты, а ище меньше людей, хоц и розуміли значение, вірило в успіх такой культурно-просвітительной организации и свободной, опертой на непримушеной предплаті газеты. Тым больше, што нашы патриоты нераз пробували закладати такы незапомоговы газеты, но што почали, тай скоро покончили, бракло средств. Но и нич дивного, што тоты, котры розуміли, што стоит газета, не вірили в єй успіх. И длятого треба было глядати такых способов, штобы тот час зневіры перетримати и допровадити организацию и газету до того часу, коли тота организация и газета научат нашых людей вірити в свою организацию и свою народну газету. Треба было глядати, где таньше выйде, где можут найтися такы люде, котры готовы помочы. А коли организация и газета научила нашых людей вірити в свою организацию и газету, коли показалося, што наш народ уж так вырос культурно, што без такой культурно-просветительной организации и газеты жити не може, треба было глядати найвыгоднійшого міста для центра организации, где найгустійша карпаторусска емиграция, где мож найбольше зробити. Такым центром, каждый мусит признати, єст Нью Йорк. Длятого центр организнции и єй орган, газета “Лемко”, была перенесена в Нью Йорк. И, як видиме, мы не зробили ошибку. За час, отколи центр был перенесеный в Нью Йорк, наша организация надсподівано вскріпла. Найліпшым доказом єй прекрасна Народна Будова, о котрой пишеме на другом місті.

Шкодникы стараются ширити клеветы, што Лемко-Союз упадат, што члены меньшаются, што отділы замерают. Правда, часто выступают “члены” з Лемко-Союза, но за такыми “членами”, котры выступают, наша организация не плаче. Мы не запомогова организация, штобы зме плакали, як выступают молоды члены, а тішилися, як выступают стары. Нам всі члены єднакы што до их віку. Но не всі у нас єднакы, што до свого характера и способностей. Наша организация зберала всіх людей, кто лем хотіл быти членом. И єдны люде приступали в организацию с тым, штобы єй помочи розвиватися и выполнити культурно-просвітительну программу роботы среди нашого народа, помочи му двигнутися с темноты и поступити вперед з отсталости. И тоты члены, котры вступили в Лемко-Союз с тым наміром, або уж в организации порозуміли тоту программу, и як честны люде, взяли тоту ціль до свого сердца, они николи не выступали и до смерти не выступят з Лемко-Союза, они стали ядром организации. Але не всі люде такы. Были люде, што вступали в организацию для своих личных гоноров, або личной корысти. И они, коли не досягли тых гоноров, для котрых вступали в Лемко-Союз, выступили и стали його врагами. Дакотры ище не выступили, бо або думают,што коли останут в середині, то ліпше можут шкодити организации. Но ту они помыляются, бо коли бы за 10 літ мы остали все ище такы наивны и нерозвиты, што мы бояли бы ся такых шкодников, то наша организация за тоты 10 літ не зробила бы свойой роботы, а мы показали бы ся так заотсталыми, што зме неспособны больше идти вперед, розвиватися, розуміти людей, познавати их характеры. На біду нашым врагам и всякым шкодникам за тоты 10 літ показалося, што наш народ має велику интеллигенцию в собі, што мы, коли ся нам очы отворят, дуже скоро роспознаєме приятеля от неприятеля. И неприятелі тото видят, што мы их познаєме и отвертамеся от них.

И хоц членами наша организация так аж много не взросла, бо єдны приходят, другы отходят, сіются в организации, в котрой остає чиста пшеница, но зато тота чиста пшеница, чисте зерно взросло. Коли сте бесідували с такым неєдным нашым членом пару літ тому назад, а будете бесідувати днес, то увидите, што то не тот чоловік, што был даколи, то уж новый интеллигентный розумный чоловік, котрый може бесідувати с профессором университета о людском житю. Один из читателей газеты “Лемко” в Ватервлит дякує редакции за газету и повідат, што он з нашой газеты не лем научился читати, но он тепер в дебаті о житю побиват свого сына, котрый покончил калледж.

В том культурном прогрессі членов наша организация набрала за тоты 10 літ огромной силы, такой силы, што она уж не боится ниякых неприятелей и шкодников, бо всякий честный член отразит пару мудрыми словами такого неприятеля або шкодника и покаже на него другому.

В сознательности членов сила Лемко-Союза. За 10 літ организация выховала соткы передовых сознательных членов карпаторусского народа, и они стали фундаментом дальшой и ширшой будовы Лемко-Союза. Не може быти, штобы они не передали того нашому новому поколінню не емиграции. Не може быти, штобы они не передали того своим родным в краю, всему нашому карпаторусскому народу. Наука Лемко-Союза останеся вічном в нашом народі.