Полтора року тому назад милитарна фашистска империалистична Япония напала на Китай. Японскы генералы обрахували, што за 3-4, а найбольше 6 місяцев китайский народ поддастся им и буде их просити пощады, як просит раб свого пана. Но японскы империалисты, японскы генералы не знали душы китайского народа, и они не могли сподіватися, што у него найдеся столько народной жизненной силы, што китайский народ пробудится из свого вікового сна и соєдинится против свого врага.

И чого японскы генералы не могли сподіватися, то сталося: Весь китайский народ, вся китайска нация соєдинилася первый раз в свойой истории, и Китай стал грозном силом, не лем для японскых, но для всіх империалистов, котры до сего часу тягли сокы из богатой китайской земли, и пот и кров из китайского народа. Китай поставил опор японскым милитаристам, котры из свойой стороны кинули всю свою милитарну силу на китайский народ и його початкову народну геройску армию.

Полтора рока уж шаліє в Восточной Азии, на землях Китая, страшна война, котра мусит покончитися побідом китайского народа, а упадком японского империализма милитаризма, бо таку силу показал дотепер пробудившийся и соєдиненый Китай в борьбі з врагом, агрессором, фашистскым наіздником.

А силу соєдиненый пробудившийся китайский народ май огромну. Китай велика и богата страна, одна з найбогатшых в світі в земны богатства, што до земных богатств стояча на ровні с С. Ш. А. и СССР., но перевысшат тоты передовы державы одным найбольшым богатством, а то числом населения. Китай числит 450 миллионов населения, а то близко єдну четверту часть населения всего світа. Территория Китая (4,300 квад. миль) о одну четверту больше территории С. Ш. А., а больше, як половина Совітского Союза. У китайцев, як не найстарша, то одна из найстаршых культур світа. У китайцев появилася перва газета.

Но и як то дошло до того, што тот великий народ так заспал, нашолся в великой біді и нужді, што на такий великий народ кинулися империалисты зо всіх стран світа, захватили його земны богатства, а його самого поневолили? Кто тому виноватый?

Никто инший тому не виноватый, лем тоты, котры сиділи на карку того великого народа там, в Китаю — китайска богата клясса, котра держала тоту стару китайску культуру лем про себе, а для народа придумувала темноту, штобы могла сидіти на його карку. Тота богата клясса, китайскы императоры, поміщикы, купцы, — не лем што не организували китайский народ для обороны отчизны, но связувалися против свого народа з заграничными империалистами, продавали им свой народ и земны богатства Китая за свои тымчасовы выгоды.

И коли Япония приготовляла напад на Китай, то японска пануюча клясса думала, што то тот старый Китай, котрый состоит из той продажной богатой кляссы и из темного, опиумом закуренного китайского народа, неспособного до ниякой обороны свого краю. Што тота богата клясса продастся, як продавалася через цілу новшу историю Китая, а темный, перестрашенный народ упаде на коліна перед японскыми самураями. О соєдиненном китайском народі японскы милитаристы ани не думали. Та и на западі никто не мог собі представити соєдиненного Китая, китайской нации. О Китаю учили, што китайский народ — то не народ, то лем людскы истоты, множество тых людскых истот, котры не связаны зо собом национальным сознанием, сознанием национального єдинства, сознанием одной отчизны. Писали о китайскых селянах и робочых, што они цілковито не знают, што значит слово отчизна, а тым самым, у китайца не може родитися чувство патриотизма. Так писали и учили о Китаю и Китайском народі заграничны писателі и “знатокы” Китая.

И на око так здавалося, бо Китай был поділеный меж китайскыми лордами генералами, котры вічно воювали меж собом, грабили свой народ и продавали го и його земны богатства заграничным капиталистам, от котрых брали оружие и опиум для мордуваня и трутя китайского народа.

И єсли Китай остался нерозділеный на мапі, то лем зато, бо світовы империалисты не могли погодитися, котрый яку велику часть Китая має заграбити для себе и означити на мапі, яко свою. Почалася незгода меж империалистами о торговы терены, о рынкы в Китаю, о консессии.

При конці 19-го віка Япония провадила войну с Китайом, розбила китайску армию, но другы империалисты не допустили до того, штобы Япония захватила великий фалат Китая. Всьо што єй позволили взяти, то полостров Корею и остров Формозу. В тот сам час почал въідатися в землі Китая, в Манчжурию — российский царский империализм, так што с початком 20-го віка (1904) пришло до войны русско-японской, до войны меж двома империалистами, в котрой Япония взяла от России Порт-Артур и почала выпыхати царску армию из Манчжурии. Уж тогды хотіла взяти Манчжурию для себе, но тому спротивился американский империализм. Английский империализм помагал в часі русско-японской войны Японии. Английскы империалисты были в союзі против русского царского империализма, но американский империализм, з боязни, штобы єдна сторона не розбила другу совсім, поспішил с посредництвом в часі русско-японской войны, и так был заключеный мир в Портсмуті в Америкі, в котром Япония дуже мало зыскала за свои великы жертвы, бо нашлася предодньом цілковитого банкротства. Такым способом Китай все ище остался на мапі, яко велика держава.

Но Япония, ставши индустриальном державом, все больше и больше въідалася в китайску землю, все больше и больше выперала европейску и американску торговлю з рынков огромного Китая. С самым Китайом японскы империалисты не рахувалися совсім, єсли боялися долгий час дакого, то лем силы заинтересованых в Китаю европейскых держав и С. Ш. Япония николи не припускала, што Китай найде в собі силу опертися японской силі.

И коли японскы империалисты увиділи, што европейскы державы по причині своих незгод не выступят в обороні Китая, што у тых держав не буде єдности, штобы выступити против агрессора, Япония захватила велику и богату китайску провинцию Манчжурию с 30 миллионами китайского населения. Правда, европейскы державы и С. Ш. протестували и не признавали того захвата, но японскы империалисты ничого собі с того не робили. И коли им захват Манчжурии перешол бескарно, почали планувати дальший захват китайскых земель.

Тымчасом, с приходом Гитлера до власти в Германии, почался розвалювати Версальский мир, почали тратити значение межнародны договоры, почалася межнародна анархия, почал валитися старый межнародный порядок, почали подносити голову агрессоры, котры захотіли нового переділу світа. Муссолини нападат на безборонну Етиопию, члена Лиги наций, но другы члены не выступают в єй обороні по статуту Лигы. Нич дивного, што послі Етиопии европейскы фашисты нападают на Испанию, а Япония на Китай, заключаючи меж собом т. з. “пакт против коммунизма”. Мы знаме и зо свойой домовой политикы, што який политик хоче ошукати народ, то выступат против коммунизма, а то лем для засліпления народа.

Як мы уж вспоминали, японскы империалисты не сподівалися такого опору китайского народа, бо никто их того не учил, што истнує даякий китайский народ. Но коли японскы армии вступили на китайску землю, они открыли, што такий народ истнує, што в Китаю жиє єден народ, готовый защищати свой край, свою отчизну, свою свободу, и што тот 400 миллионный народ дуже тяжко побідити японской воєнной машині, што она против него заслаба.

Вмісто три-штыри місяцы, война затяглася уже поверх полтора рока, а конец єй, вмісто приближатися, все дальше и дальше отдалятся для японскых империалистов. Селянство и робоча клясса в Китаю первый раз соєдинилися коло свого народного правительства, котре уж не робит разниц меж партиями. Национальна партия “гоминдан” иде разом с коммунистичном партиом и творят разом подставу национального фронта всего 450 миллионного китайского народа. Здрадникам китайской нации, ци они найдутся пред фронтом, ци за фронтом, ніт пощады, так што японскым милитаристам дуже трудно найти здрадников серед богатой кляссы, здрадникы боятся здраджати, бо не єден здрадник был убитый.

Правда, японскы армии пхаются вперед, хвалятся побідами, но тоты побіды лем тымчасовы. Таж мы знаме, што и англичане относили побіды над американскым народом, котрый боролся за свою свободу. Но пришол час, што народна армия почала бити англичан, и так долго их била, покаль их не выгнала из американской земли, бо она брала силу из свого народа, прагнущого независимости и свободы.

Мы знаме, што в 1812 року Наполеон тоже относил побіду за побідом над русском армиом, шол вперед, занял Москву, но пришол час, што русска армия почала бити Наполеона и цілковито знищила його, здавалося, непобідиму воєнну машину, а то длятого, што за том русском армиом стоял весь русский народ. Так стоит сегодня за своим правительством, своим лидером Чиянг-Кай-Ши, весь китайский народ. И в том його побіда над японскым империализмом и другыми империалистами.

Побіда китайского народа над Япониом буде мати для людства огромне значение. Коли сила империалистов буде зламана в Китаю, то она буде зламана в цілом світі.

Єсть люде, котры страшат нас жолтом расом. Но світу не треба боятися зо стороны освободившогося китайского народа. Китайский народ честный, скромный и спокойный. Он никому в свойой истории не грозил, на никого не нападал. Єсли єст опасность от жолтой расы, то єст она от японскых самурайов, котры выробили план завоювания цілого світа. И перва точка того их плана — захватити Китай, його земны богатства и 450 миллионов китайского народа, сфашизувати тоту массу, заогнити єй против білой расы, и потом кинутися на дальший захват світа. Єсли Китай оператся Японии, то он оператся тому плану японскых самурайов.

Китайскы красноармейцы, котры найзавзятійше борются против японскых агрессоров.

И коли китайский народ отнесе побіду над японскым империализмом, то он останеся вічным союзником освободившыхся от империалистов и капиталистов народов Совітского Союза. А Китай и Совітский Союз, то буде така сила, котра уж не буде боятися старого империалистичного світа, котра принесе свободу и братский союз всім народам світа.

Война, котра шаліє далеко в восточной Азии, далеко от нас и нашого родного краю, тота война провадится и за нас, за наш поневоленый народ. Китайский народ веде войну не лем за свою свободу, а за свободу всіх угнетеных поневоленых народов, за свободу самого японского народа. Недалеко тот час, што японский народ, японскы солдаты порозуміют, што они проливают кров не за свою свободу, а за власть своих угнетателей, японскых капиталистов, поміщиков и генералов. И они скоро прозрят, прозрит японский народ и скине зо свого карку кровожадных угнеталей.

Японцы посунулися в глуб китайской землі, захватили великы міста, як Пейпинг, Шангай, Нанкинг, Кантон, Ганков, захватили желізны дорогы. Но поза фронтом японскых наіздников оперуют соткы тысяч китайскых партизан, котрым помагат население, передовсім соєдинены против наіздников китайскы селяне. Они скрывают партизан и кормлят их. В Сіверном Китаю за японскым фронтом организувалося 7 миллионов китайскых жен, котры ведут розвідочну службу и приготовляют шаты для партизан. По большой части партизанами руководят китайскы студенты университета, меж котрыми єст много студенток. Дівчата полнят таку саму службу, як и хлопці, цілы партизанскы отряды зложены з дівчат, а руководят ними китайскы студенткы.

Вся китайска молодеж, студенты и студенткы, защищают свободу китайского народа з оружием в руках. Они руководят партизанами. Ту фотография одной партизанкы студенткы из китайской Народной Армис.

Японцы заняли желізны дорогы, но ниякы сильны гарнизоны и варты не можут обеспечити по тых дорогах регулярного руху. Партизаны нападают на японскы гарнизоны, нищат их, перерывают желізнодорожне полотно, высажают мосты. При том много оружия и другых запасов попадат в рукы партизан.

Китайцы, в борьбі з японскыми наіздниками, ведут свою войну по приміру войны русского народа против Наполеона в 1912 року. Русскы долго отступали в глуб России перед многонациональном наполеоновском армиом, а при отступлению всьо нищили, цілы села и міста, всі запасы поживы. Так поступают и китайцы. Китайскы селяне, перед наступлением японской армии, всі запасы поживы выносят в горы, в неприступны вертепы, и там их скрывают. В селах не оставляют для себе лем раз зісти. А коли получат инструкцию, штобы и сами отступали, тогды, што можут, заберают зо собом, а всьо решту, што бы могло японцам придатися, нищат палят.

Китайскы партизаны показуют чудєся храбрости и смілости. Найліпшы организаторы партизанскых отділов — коммунисты, котры для отражения Японии поддалися под руководство го ловнокомандующого всіми китайскыми силами Чианг-Кай-шека, мимо того, што долгы рокы вели против него завзяту войну. Головна квартира Красной армии, тепер 8-ой Народной армии, находится в сіверном Китаю, в провинции Шенси, в городі Сиян. Часами до них там продреся американский корреспондент, котрый потом оповідат своим газетам правдивы чуда о тых людях, о их храбрости, выдержливости. Ниже приводиме таке оповідание американского представителя “Ассосиейтед Пресс”: “Найинтереснійшы отділы китайскых борцов, то отділы селянскых хлопцов, котры возросли в славу 10 літ тому назад под прапорами Китайской Красной армии. Сегодня, тота армия выступат яко 8-ма Народна армия под головном командом Чиянг-Кай-шека и она продолжат добывати собі славу через завзяту борьбу против японскых наіздников.

Цілый місяц я жил и ходил в походах с тыми счастливыми и веселыми хлопцями, коли они отпыхали японскы дивизии назад ку желізным дорогам и базам провинции Шанси.

Средний вік тых солдатов 8-ой Народной армии лем 22 рокы, але тото не значит, што тоты молоды безусы солдаты не ветераны. Єден 19 рочный кавалерийский офицер повідал мі, што он вступил в Красну армию, коли мал 11 літ, и от того часу носит оружие.

Мимо своих успіхов и ентузиазму, хлопці 8-ой Народной армии носят марку бідноты. Их войсковы річы мало припоминают річы другых солдат, а навет выглядают комично. Дакотры носят зелены капелюхы, барнясты сорочкы и сины порткы, Другы парадуют японскыми униформами, зафарблеными на синьо, но от того часу прибравшыми зелену вылізнуту барву.

Их ногы обуты в плетены сандалы, котры солдаты собі сами робят. Привязуют их колоровым шнурком, котрым обвивают ногы высоко под коліна. Суровый материал на такы керпці стоит 4 американскы центы. Выплести их, треба пол дня.

Солдаты 8-ой Народной армии ідят лем два разы денно, звычайно лем зерновы потравы, без мяса, без ярин. Комиссариат 8-ой армии лем два и пол цента дозвалят на поживу денно. Другы китайскы армии дозваляют 5 центов на солдата денно на поживу, а японска армия 16 центов денно.

Но мимо скромности их диеты, хлопці 8-ой армии можут ривализувати што до физичной выдержкы с каждыми другыми солдатами другых армий. Пред восходом солнца они уж в поході, рідко сідают перед заходом солнца. Их житя, то єдностайный, николи не поконченый марш, бой и знов марш. 7 дней в тыждни, 30 дней в місяцу, они боюют. Маршуют 4 милі на годину, денно они робят 36 миль горскыми стежками и пресмыками.

Єдного тыждня мы маршували 240 миль, отпочивали лем в часі ідла и спаня. Шестого дня мы мали пресічи контролювану японцами Ченгтайску желізну дорогу в центральном Шанси.

Послі три годинного сну поздно пополудни, хлопці умылися в горском поточку, взяли на плечи свои 40 фунтовы торбы и почали цілоночный марш горами на полотно желізной дорогы. Мулы валяли камені долу гором, японцы открыли на гору артиллерийский огонь. Гранаты свистали понад нашы головы, но червены, якбы нич не было, машерували дальше.

Раз, коли перешли и перервали желізну дорогу, на другой стороні хлопці затрималися, штобы зісти по одному бисквиту — єдина пожива на 40 миль маршу — потом почали поход дальше. И аж до 7-ой рана мы не задержалися. Я ждал цілого дня отпочинку по таком маршу, але в полудне уж мы знов в поході и зробили зме 20 миль до вечера.

Єдного дня мы посідали до обіду, котрый складался с кукурудзяного хліба, вареных яєц и чаю. Я спросился мойой ескорты, чом тамты хлопці коло коней не получили свою порцию, чом они не ідят.

“Мы даєме им 2 центы денно на поживу — рюк капитан, — но они выслали часть свого уділу своим родным, так што они не можут собі позволити істи обід."

Но мимо скромности в поживі, ТОТЫ хлопці можут машерувати от всходу солнца до заходу. Из такых выдержливых и скромных, як тоты, рекрутуются китайскы партизаны.

Тоты вытрималы и ненарікаючы хлопці носят ширококрисы соломяны капелюхы и керпці свого выробу. Они были без сорочок, але они могли свои широкы порткы подтягнути аж на груди. Каждый китайский селянский хлопец не противится въідливым мухам и другым инсектам, котры для чужого представляют правдиву плагу, для японцев робят житя невыносиме, они ширят меж ними страшны заразливы хоробы, як тифус, маларию, холеру. Но китайцам они не шкодят, китайцы привыкнены до них.

Китайцы тоже больше вытрималы на переміны температуры. На верху горы в Шанси я виділ группу из 16 японцев плінных, котры тряслися в своих мундурах зо зимна, коли китайскы партизаны спали спокойно без сорочок и прикрытя.

Японцы мстят страшно китайскым селянам за шкоды от партизанов, палят их села, убивают жены и діти. В сіверных провинциях мож часто найти на місті сел біліючы кости китайскых селян. Я виділ купы попелу в Сіверном Китаю из 40 міст и 800 сел, котры были спалены японскыми наіздниками.

Я виділ многых старшых селян в пещерах. Молодшы всі забралися зо сел в армию, жены мобилизованы для помочы им, для ручного выробу одежы и обутя для партизан. В многых селах за японскым фронтом не зостало живой истоты, кромі здиченых псов и людскых шкелетов.

Наступление японскых милитаристов не зламало опору китайского народа. Оно зламало селянский индивидуализм и соєдинило, споило особы, фамилии и села в єден фронт с пол миллионом партизанов в полю, котры одіват и живит само китайске селянство.

Японцы заходят глубше в территории партизанов, но тым самым роснут успіхы партизан.”

До сего часу японска армия наступала в глуб Китаю, китайска армия уступала. Японскы милитаристы старалися за всяку ціну розбити китайску армию, но то им не удалося, китайска армия уступала все дальше и дальше в глуб огромного краю, от часу до часу ставлячи японцам опор и задаючи им великы страты. Японцы заняли великы міста и праві всі желізны дорогы, но за их фронтом партизаны контролюют всю территорию подальше от желізных дорог. Для стережения дорог японцам треба оставляти велику армию, но и так партизаны перерывают коммуникацию, довоз аммуниции и другых воєнных запасов. Китай побідит!