— Принюс єм дашто на помоч для испанского народа. Лем никому не бесідуйте ани не голосте в газеті, бо моя жена ище того не може порозуміти, яка то борьба иде в Испании . . .

И вынял тот лемко роботник пят долларов и просил записати для испанскых роботников и передати там, где слідує.

Знаме мы и такы жены, котры скрыто пред своими несвідомыми ище мужами укорочают свои выдаткы для кухні и жертвуют на помоч испанскым роботникам, их женам и дітям. А до испанской войны многы з них мало розуміли робочу справу, мало розуміли, што то таке фашизм. Напад фашистов на испанский народ, страшне мордерство безборонных старцов, жен и дітей открыло великой массі роботников и селян, массі бідного народа по цілому світу, очы на страшного свого врага, фашизм. Испания заставила народны массы світа зненавидіти фашизм.

Нашы братя в Карпатах мало слышали о Испании, а тым меньше знали, што таке фашизм, тым больше, што карпаторусскы фашисты, переважно мадьяронске духовенство хвалило им німецкы фашистскы порядкы и достаткы в Германии. В Ужгородском мадьяронском поповском “Русском Вістнику” мы чытали раз о такых чудах в фашистской Германии, што німецкы учены всьо вырабляют з дерева: И одежу и цукер и хліб и масло, лем тото біда, што дерева, лісов мают мало, та зато им бракує гдекотрых продуктов. Але мы, карпатороссы, маме дост лісов, то можеме всього мати дост, як бы зме так знали з дерева всьо вырабляти, як знают німцы. С того так выходило, што мы всьо маме, што нам треба для жытя в свойом дереві, лем бракує нам німецкых фашистов, штобы тото наше дерево перемінили нам в хліб, масло, цукер, гунькы.

И чом бідный, затемненый, голодный, безземельный карпаторусский селянин не мал бы вірити в тоты новы фашистскы чуда, коли о тых фашистскых чудах проповідуют му тоты самы, котры проповідуют му о накормлению пят тысяч народа пятьома хлібами, переміні воды в вино, и т. п., и он тому свято вірит, та чом не мал бы вірити, што такы самы чудотворцы німецкы и тальянскы фашисты? Многы, дуже многы вірили в тоты фашистскы чуда.

Но пекольна робота фашизма в Испании, на котру смотрит цілый світ, слышат о ней и тоты затемнены чудами бідны карпаторусскы селяне, открыла очы и им, и они зненавиділи фашизм, зненавиділи так, што многы нашы лемкы перекралися за границу, штобы боротися против него з оружием в руках.

Испания стане Святом Земльом для бідного народа, бо нияка друга земля на світі не пересякнена так кровью бідного народа, як Испания, кровью робочых и селян, их жен и дітей. Испания стала великом книгом для бідных масс світа, таком книгом, котру чытают грамотны и неграмотны на всіх языках світа. И всі розуміют и язык и содержание той книгы, котра им дає велику науку борьбы за власть народа, за справедливость, за ліпший світ, науку єдинения для той борьбы. Нияка книга, хоцбы написана найбольшым писательом, не могла бы дати народам такой великой наукы, як дала им тота жыва книга людской борьбы геройского испанского народа за своє и наше жытя против незнаного дотепер во світі потворы-фашизма, котрый хоче уничтожити тото людске жытя, штобы спасти панов.

И не дивно, што всьо честне прогрессивне людство, всі роботникы и селяне, честна интеллигенция, писателі, учытелі — всі культурны люде смотрят на Испанию, як на святу землю, на котрой рішатся, уж рішена судьба людства. Говориме, што судьба людства уж рішена в Испании, потому што хоцбы фашистам и удалося захватити всю Испанску землю, то их судьба уж рішена, они мусят пропадати з лица земли за свою страшну збродню против людства, они уж осуждены на смерть світом, они не можут долго жыти, бо цілый світ двигнеся против них. Фашизм выкопал собі свою могилу в Испании, там он буде погребаный глубоко.

А Испания останеся в истории нового людства святом земльом, тысячы-тысячы літ новы люде будут изучати историю Испании, историю той страшной борьбы, яка там отбывалася ище в малокультурном XX віку, коли то чоловік, робочий чоловік не цінился, коли тых честных, найціннійшых, бо робочых людей, их жен и дітей мордували миллионами дикы пажерны фашисты. Будут чытати и о тых фальшивых демократах, котры спокойно смотріли на тото страшне мордерство бідного народа и не продали му оружия для свойой обороны. Будут чытати о лордовской Англии, котра хитро помагала фашистам вмісто испанскому народу.

Так, будучы поколіния будут дуже уважно, з великым интересом изучати историю борьбы, котра тепер происходит на нашых очах, за нашого жытя, в Испании. И коли мы смотриме на тоту борьбу своими очами, то мы тым больше должны о ней знати, як можеме найбольше. Але найперше мы мусиме знати, якнайбольше з нас, кто може, о той землі, о єй положению, єй историю, историю того геройского испанского народа, штобы мы ліпше порозуміли тоту борьбу и єй причины.

Розумієся, што мы, неучены люде роботникы, не можеме об’яти всього так, як можут учены люде, и длятого мы ту будеме старатися подати лем тото, што мы можеме об’яти и порозуміти о Испании и той борьбі, котра там происходит, и котра для нас має огромне значение.

Евпопа кончится на Западі Пиренейскым полуостровом. (Остров, то кусок сухой землі, облятой зо всіх сторон водом — полуостров, то кусок сухой землі, облятой с трох сторон водом). Тот Пиренейский полуостров облятый с трох сторон Атлантическим океаном, котрый переходит на полудню узкым проливом меж Африком и Европом и творит Средземне Море. На сіверо-востоку Пиренейский полуостров прикріпленый до материка Европы и граничыт с Франциом, от котрой го ділят горы Пиренеи.

На том Пиренейском полуострові находятся дві державы: больша держава Испания, и меньша Португалия. (Посмотте на мапу). Португалия, около 7 миллионов населения, фашистска державка, стоит на услугах Гитлера и Муссолинього.

Через узкий пролив меж Европом и Африком, як раз меж испанском земльом и испанском африканском колониом т. з. Испанскым Марокком проходит важна морска дорога, котра веде в Средземне море, а дальше через Средземне море и через Суесский канал в Червене море и в Индийский Океан, в Индию, потом Тихий океан. Для Англии то коротша дорога в Индию и другы колонии в Азии, и в Австралию. Єсли бы Англии замкнули тот пролив, то єй численный торговый и воєнный флот мусіл бы оплывати Африку и робити далеко дальшу дорогу. Длятого, штобы боронити того пролива, Англия укріпилася на кончику испанской землі над тым проливом, выбудувала собі там, коли Испания была слаба, Гибралтарску кріпость для стережения свойой коротшой дорогы в Индию. Длятого то Англия тепер не хоче, штобы Испания была сильна держава, она хоче, штобы она в той гражданской войні совсім вычерпалася, штобы не выгнала Англию зо свойой землі, не збурила єй єй кріпость. Англия боится, што таком сильном державом може быти Испанска республика, освобождена от своих старых зопсутых, продажных панов.

До Испании належыт кусок Марокка, як раз тот кусок, кончик котрого тоже контролює тоту дорогу. В том Испанском Марокку почался бунт испанскых генералов против народного правительства. На Средземном морі належат до Испании Белеарскы островы, из котрых найбольший (Майорку) захватили фашисты при помочы итальянцов, и там итальянцы усадовилися.

Территория Испании ровнатся около 200 тысяч квадратных милям (500 тысяч кв. километров), населения около 25 миллионов. Территория мало меньша от Франции, коли населения праві о половину меньше. Испанска земля богата, так в урожайну землю, як и в земны минеральны богатства, но страшно занедбана испанскыми пануючыми классами, династиом, духовенством и панами, котры за край не дбали, лем старалися, якбы здерти больше з бідного народа на своє роскошне жытя. И длятого в Испании управляли заледво половину урожайной землі, решта панской землі стояла пустком, паслися по ней панскы заяцы, а никто не мог єй управляти. А и тоту землю, котру управляли, то управляли старом предхристовом методом, ище волы выдоптували зерно зо соломы, як в старом Египті. Паны мали столько рук голодных селян, што земледільскых машин не купували, бо бідны сельскы роботникы працували за мизерный кусок хліба, за жминку зерна.

Та и минеральны богатства испанска пануюча клясса не выдобывала, хоц они дуже великы, як желізо, уголь, мідь, а копальні жывого серебра (ртути) в Испании найбольшы в світі. Велику часть земных богатств Испании захватили заграничны капиталисты, особливо английскы и французскы.

Даколи территория сегодняшной Испании была поділена на королевства и княжества, так што от того часу остался поділ на области, краи, котрых єст 13, вычыслены и поділены на поданой спочатку мапі. Административно Испания поділена на 50 провинций.

Население Испании (около 25 миллионов) не єднолите, не всі испанцы. Сівер и сіверо-запад заселеный переважно национальными меньшинствами: галициянами, басками, каталонцами. Галиция, то продолжение Португалии, население говорит подобным языком до португальского. Єст их всіх околи 2,200,000. Дальше побережом моря жыют баскы, племя надзвычай храбре. Знаме из газет, як они храбро боронили свой край перед фашистами и запричинили им великы страты. А єст их мало больше, як нас, лемков, всього около 800 тысяч душ. Они потомкы старых иберийцов, котры даколи заселяли цілый тот полуостров. Найбольше национальне меньшинство Испании, то каталонцы, их всіх около 2,400,000, в их краю Каталонии находится тоже найбольший город на том полуострові, а то Барселона, с 1,200,000 жытелями.

Другым найбольшым городом в Испании єст єй столица Мадрид, около миллиона населения. Другых великых міст в Испании мало, всего около 10 такых, котры мают 100 тысяч и больше населения, а то зато, бо пануючы кляссы Испании не старалися розвити модерну индустрию в краю, а міста можут рости лем при рості индустрии.

Уж само географичне положение Испании, на стыку Европы и Африкы, на дорозі из Европы в Азию Средземным морем, на найважнійшой торговой дорогі, мусіло єй поднести в истории на перве місце. И она была на первом місци в истории в другой половині средных віков, Испания почала новожытну историю великыми заморскыми открытиями новых земель, особливо Америкы. В тых роках Испания была передовом и найсильнійшом державом світа, в котрой не заходило солнце. Народы того полуострова открыли світ. Испанскы морякы были найзавзятшы и найсмільшы, плавали незнаными морями, переплыли первый раз Атлантик из Европы в Америку и открыли єй.

Та и культура была в Испании колиси найвысша. А принесли в Испанию высоку культуру на тоты часы арабы, предкы тых самых мавров, котрых сегодня ужывают испанскы генералы против испанского бідного народа. Бо треба нам знати, што арабы створили высоку культуру на тоты часы, а колыском той арабской культуры была Мезопотамия, з містом Багдад. Арабы, приміром, придумали знакы на означение чисел, котрых сегодня употреблят цілый культурный світ. (1, 2, 3, 4 и т. д. то арабскы знакы. I, II, III старо-римскы, грекы означали числа буквами, от котрых приняли и славяне в церковных книжках означати числа буквами).

Коли арабы дошли до конца побережа сіверной Африкы, то потом через тот узкий пролив Гибралтара перешли в Европу, на Пиринейский полуостров. Первы их отряды появилися в южной Испании в 711 року по Христі. И в коротком часі завоювали праві цілу Испанию, кромі сіверо-западной части, кромі тых народных меньшинств, як баскы, каталонцы. И осемсот літ Испания была центром новой высшой от европейской в тоты часы, арабской культуры. Европа в тоты часы не знала высшых школ, даяка слаба грамота была в руках духовенства. Арабы в тоты часы мали высоко-ученых профессоров, инжинеров, математиков. Первы университеты в Европі открыли арабы в Испании. Севиля, Кордова, Гранада, міста, о котрых сегодня чытаме в газетах, были центрами наукы, промышленности, специально текстильной, научного земледілия. Арабы знали штучно орошати землю и такым способом южна Испания дошла до богатых урожайов.

Арабы основали в Испании университеты, котры были одинокыми центрами высшой наукы в Европі. На тых университетах учылися математикы, агрономии, о розвитию землі-природы, медицины. В другых странах Европы наука преслідувалася католицком церквом, ученых карали смертьом, палили на кострах. Арабы были магометане, их религия не выступала против наукы.

Нич дивного, што розвитие наукы и культуры взбудило в испанском народі интерес к світу, котрого народы ище в тоты часы не знали, знали всього лем тоту суху землю, котра трималася разом, лем тоты три части землі: Европу, Азию и Африку, и то не всьо, бо в середину Африкы дотерти не могли. Америкы и Австралии не знали. При концу XV віка (1492) Христофор Колумбус открыл Америку, с початком XVI віка испанский адмирал Магеллан оплыл первый раз нашу землю наоколо.

Но в тоты часы арабы были уж выгнаны испанцами из Испании. Послідня арабска кріпость, Гренада, пала як раз того самого року, коли Колумбус открыл Америку.

Тоты часы для Испании были часами найвысшого росквіту и державной силы. От XVI віку Испания властвовала над цілом Середньом и Южном Америком. В тых часах европейска Испания числила населения около 30 миллионов душ. Но Испания находилася в руках панов и церкви, котры страшно роспустилися коштом испанского народа и колониальных богатств, с котрых рабували колониальны народы, и тоты пануючы кляссы свойом роспустном господарком привели тоту огромну державу до страшного упадку. В XVIII віку сама Испания має уж лем 8 миллионов населения, тратит свою державну силу, сходит на другорядну, потом на третьорядну державу, а єй місце на морі, в колониях и во світі переберат Англия. Єдны колонии освобождаются от ней сами и организуют свои державы, як южно-американскы, другы колонии заберают от Испании другы державы. В XIX віку Испания прогрыват ганебно войну с С. Ш., котры єй заберают остаткы колоний в Америкі и Азии (Филиппины).

Такий страшный упадок Испании запричинила династия, шляхта и католицка церков. Династия и шляхта, як зме уж вспомнули, страшно роспустилася, о край, державу, народ, совсім не дбала. Духовенство, особливо высшы достойникы католицкой церкви тоже роспустилися, но не на столько, штобы забыли о народі. Народ они не забыли, бо знали, што просвіщенный народ може положыти конец их оргиям, и потому католицка церков смотріла, штобы не допустити в народ ниякой просвіты, грамоты, штобы тот народ был все застрашеный в темноті. Они знали, што темный застрашеный народ буде вымерати з нужды и голоду, а бунтувати против панов не буде.

И длятого в Испании родилася знана свята инквизиция, найчорнійше пятно католицкой церкви. Тота свята инквизиция глядала, судила на мукы и смерть “врагов” католицкой церкви. А врагом католицкой церкви об’явила каждого ученого чоловіка, каждого, котрый хотіл учытися, каждого, кто осмілился повісти правду. С такых людей католицкы ксьондзы инквизиторы тягли жилы, ламали им кости, поддавали нелюдскым мукам, пекли живцом на огню, аж покаль не замучили на смерть.

Испания мала таке саме державне устройство, як и другы державы в початковы часы. Як приміром было у нас на Руси, што початковы властителі князі ділили землю помеж своих сынов и такым способом наробили массу маленькых державок, котры билися меж собом. То само было в Испании. Но як другы краи в часах посторонной опасности соєдинялися для свойой обороны, так и испанцы соединилися для борьбы против арабов и послі свого освобождения осталися в єдинстві, яко єдна монархия, королевство. Король Испании в часах найбольщой силы державной Испании именувался даже римскым императором.

Монархична конституция, котра была введена в Австрии в 1848 року, в Испании была введена аж в 1878 року, то значыт были введены выборы в парламент (кортесы), котрый складался з двох палат, конгресса послов и сената. И тота конституция дочекала аж до 1923 року, коли уж паны и генералы ниякым способом не могли собі порадити з народным рухом при яком таком парламенті, и длятого 1923 року зробили генералы фашистский бунт, захватили власть, роспустили парламент и установили воєнну фашистску диктатуру. Диктатором стал генерал Примо де Ривера.

Сім літ генерал Примо де Ривера тримал испанский народ в желізных рукавицах, но сила народа, воля до свободы, змела генерала Риверу в 1930 року. И хоц послі Риверы наступило правительство под руководством другого генерала, но оно уж долго удержатися не могло. При конці 1930 року охватил Испанию генеральный страйк, почала бунтуватися армия против фашистской диктатуры, так што генеральске правительство мусіло уступити в февралю 1931. Новым правительством были назначены на 12 апріля громадскы выборы по містах и селах, котры кончилися таком поражком монархично-фашистского порядку, што испанский король мусіл утікати за границу, а Испания 14 апріля 1931 року стала республиком.

Што до социального и господарского державного порядку, то Испания рижнится от другых европейскых держав тым, што там ище в XIX и XX віках, коли в другых европейскых державах капитализм взял верх над феодализмом, испанскы пануючы кляссы спасали феодальный порядок, котрый преобладал до остатку над капитализмом.

Што то єст феодализм, а што капитализм? Феодализм, то єст порядок панский, шляхетский, а капитализм порядок буржуазный. При феодализмі пануют в державі властникы великых земельных обшаров, при капитализмі банкеры, фабриканты. Феодализм, то средновічный социальный порядок, капитализм новожытный.

Який порядок ліпший? Днеска каждый свідомый роботник, каждый честный ученый мусит повісти, што оба недобры, што оба отжыли уж своє. Но каждый мусит повісти, што капитализм высший социальный порядок, потому што под капитализмом люде выбудували индустрию, великы промышленны центры, великы міста з выгодными домами для мешканя, и фабрикы, в котрых вырабляют массово предметы для людского ужытку, при капитализмі люде научылися будувати и вырабляти массово.

При панской, шляхетской системі, або феодализмі, того не было. Паны захватили земскы обшары и казали на себе хлопам робити на тых земных обшарах, а сами роскошували. И то хлопи мусіли обрабляти панску землю по старому, без земледільскых машин, бо аж индустрия могла дати машины.

Испания аж до остатку, аж до революции 1931 была во власти тых панов и бискупов, котры присвоили собі земельны богатства Испании и запрягли народ на той землі на себе робити старыма предпотоповыма орудиями, голодных, обдертых, вычерпаных зо сил, скоро умераючых селян. И коли бы Испания остала при таком порядку, то испанский народ бы совсім вымер. Бо селянство было темне, неграмотне, застрашене католицкым духовенством посмертными муками, так што о даяком освобождению от панов ани не думало.

Выбавил от того замертого положения испанский народ заграничный капитализм, котрый пришол в Испанию и почал копати земны богатства краю, ставити фабрикы, а до копалень и фабрик треба му было робочых рук, то мусіл брати их зо сел, и так капитализм почал сам будувати робочу кляссу в Испании. А роботникы по містах, то уж не селяне по селах, роботникы уж почали организуватися и учытися, а потом брали от них науку и земледільскы роботникы, так што велика часть испанского народа порозуміла, што йому дієся страшна кривда на його землі, в його отчині, котру совсім несправедливо захватили от него паразиты, шляхта и духовенство, и велику часть, больше як половину испанской урожайной землі не дадут управляти, лем тримают пустком.

Но тота часть народа, котра тото порозуміла, то значыт свідома часть пролетариата промышленного и земледільского, не была в силі зробити революции пролетарской, треба му было идти на союз з буржуазиом, котра хотіла достати от панов феодалов буржуазну свободу. Но и так пришло до буржуазной революции в 1931 року и до об’явления республикы.

Буржуазия обіцала за тоту помоч робочым ліпшы условия роботы и ліпшу плату, селянам обіцала, што розділит панску землю меж безземельных и мало-земельных. Але як єдных так другых ошукала, и зато в 1936 року пред февральскыми выборами в парламент всі народны партии утворили народный фронт против реакции, котрый то фронт выбрал своє народне правительство.

Яка была разница меж тым первым буржуазно-републиканскым правительством и тым другым, народным републиканскым правительством, то найліпше увидиме на таком примірі:

Тото буржуазно-републиканске правительство, котре тоже обіцало дати селянам панску землю, за три рокы, от 1933 до 1936 розділило той землі меж селян 164,265 гектаров. А нове народне правительство, выбране в 1936 року, лем за єден рок дало бідным селянам 3,141,880 гектаров панской землі, то значыт больше, як 20 раз столько, што тамто.

И тепер нам с того буде ясно, чом паны и их генералы привели в Испанию мавров из Африкы, Германии и Италии против того законно выбранного испанскым народом правительства, а то значыт против испанского народа.

До той гражданской войны тота Испания была так поділена:

Єден процент испанского населения, значыт около 250 тысяч панов и бискупов посідало больше як половину (51.5 проц.) всей землі, и то розумієся найліпшой. (И тоты 250 тысяч панов и бискупов, само собом розумієся, стоят за генералом Франко, котрый им обіцує старый порядок, як выграт). Но коли 250 тысяч панов и бискупов посідат больше як половину землі в Испании, и на ней не працуют, то два миллионы селян не мают ани клаптика землі. А 4 миллионы и 250 тысяч, (взято разом с тыма, што не мают нич), значыт сімнадцет раз столько людей, што тых вспомненых панов и бискупов, посідают лем 13 проц. всей землі, лем єдну четверту того, што паны, и то, розумієся, подлійшой землі.

Но и ци може найтися такий честный чоловік, такий свідомый роботник-селянин, котрый бы признал, што то єст справедливо? Но, лем нечестный буржуй, або собачий панский слуга, або затемненый духовником роботник або селянин може тішытися побідами фашистов над бідным испанскым народом, котрый бореся за правду и справедливость.

За нияку там религию, за нияку побожность, против ниякого коммунизма Франко не воює, лем за тот старый панский порядок, штобы испанска земля належала дальше до панов и бискупов, а не до тых, што на ней працуют.

Послі Гвадалахары.

Но а чом Муссолини и Гитлер посылают там своих фашистскых темняков? Зато, бо они знают, што коли в Испании народ отбере свою землю панам, то то само зробит и німецкий и итальянский. А коли отберут в Испании народу землю и свободу, то и німецкий и итальянский народ буде сидіти тихо наполненый страхом.

И длятого то тота гражданска война, так само, як она має значение для Гитлера и Муссолинього, як має огромне значение для всіх панов на світі, бо там в Испании рішатся тото, ци они и в другых странах будут посідати 1 процент населения по больше як половину землі, а робити на ней не будут, ци тота земля буде належати до тых, што на ней працуют, — так само тота гражданска война має огромне значение для всього бідного людства в другых державах, на цілом світі, бо там рішатся успіх дальшой борьбы бідного народа за землю, за правду, народну свободу и социальну справедливость.

Паны, капиталисты и их збуйовскы слугы, Гитлер и Муссолини, тото дуже добри розуміют, о што там иде бой в Испании, и длятого они напинают всі свои силы, фашисты высылают войско, буржуазны т. з. демократичны дипломаты помагают испанскым ребелянтам своими дипломатичными штучками, ошукуют свои народы, штобы лем забеспечыти побіду за фашистами. Испанскому народу остала надія на помоч лем на организованых свідомых роботников и селян в другых державах и на велику перву робочо-селянску державу, Сов. Союз.

Президент Испанской Народной Республикы, Асанья.

Заграничны сторонникы Франка, испанскых генералов, аристократов, бискупов и фабрикантов, коли испанскы генералы взбунтувалися и выступили 18 юля 1936 року против законно выбраного народного правительства, — предсказували, што Франко возме Мадрид, столицу Испании, за пару неділь, а зо здобытьом Мадрида Испанскому народному правительству и Испанской Народной Республикі — конец! И они операли тоты свои предсказания на добром фундаменті. Таж испанскы генералы взяли зо собом праві всю испанску регулярну армию (80 проц. простых солдатов), цілый офицерский корпус, кромі єдиниц, стал против свого народа, а Муссолини и Гитлер выслали испанскым генералам ище пред бунтом модерны воєнны машины и оружие, бо они разом с Франком подготовили тот фашистско-генеральско-панско-бискупский бунт против Испанской Республики.

Прмьер Испании — Негрин.

Но днеска мы видиме, што не неділі, а рокы минули от от початку того бунта. Муссолини и Гитлер не десяткы воєнных машин выслали, а тысячы. Не пару десятков летчиков, а 150 тысяч регулярных фашистскых итальянскых войск. Испанскым фашистам уж не лем Гитлер и Муссолини помагают регулярными армиями, а и демократичны буржуазны державы, Англия и Франция, блокадом Народной Испании через ошуканчу не-интервенцию. Не лем Гитлер и Муссолини здоптали межнародне право и межнародны договоры, але и французска буржуазия. Через фашистску Португалию иде для ребелянтов американске и английске оружие от заграничных капиталистов. Положение для ребелянтов таке, што мимо того, што они ребелянты против законного правительства, то для них открыты всі границы для заграничных войск и оружия. А положение испанского народа и його законного правительства таке, што всі границы сусідных держав для привозу оружия, для помочы для него, закрыты и кріпко стережены. Народна Испания заблокувана не лем фашистами, але и фальшивыми демократами.

Лем дві правдиво демократичны державы, а то Сов. Союз и Мексико, хотіли бы помочы Народной Испании, не з даякого материального интересу, бо они нич в Испании не глядают, лем з народной идеи, з народной солидарности. Но та што-ж, коли тоты державы за водами, горами и лісами, отдалены так от Народной Испании, што при том фальшу сусідных демократов, при морском пиратском разбою Муссолинього, помоч тых держав ограничена.

И єсли Народна Испания в тых обставинах полтора року боронится пред таком коалициом, як Франко, Гитлер и Муссолини, то она утворила у себе за тоты полтора року огромну, непобідиму силу, чого несподівалися ни Франко, Гитлер и Муссолини, ни фальшивы буржуазны демократы, даже мы, роботникы, не могли того сподіватися.

Спочатку той гражданской войны в Испании один знаменитый английский робочий писатель предповідал, што народне правительство в Испании побідит ребелянтов напевно, осколько Муссолини и Гитлер не вышлют там свою армию. Против Италии, Германии и своих ребелянтов Народна Испания выграти не може, на таку побіду надіятися, абсурд.

Но мы днеска видиме, што Народна Испания провадит войну больше як рок, не лем против своих ребелянтов, але против Италии и Германии. И єсли выдержыт ище єден рок, то фашизму в Европі конец. Найперше приде му конец в Италии, потом в Германии, бо ни итальянский, ни германский народ не можут больше як рок терпіти фашистской газдовкы в тых краях, котра до рока приведе до банкротства фашистскы державы. Они уж банкроты, но прикрывают своє банкротство штучно. Больше як рок ище прикрывати уж не можут, лем або мусят выкликати світову войну, штобы в войні пропасти зо “славом”, або их народы их скинут.

В чом сила испанского народного правительства, а в чом слабость фашизма?

Народне испанске правительство оператся на народі, на роботниках и селянах, але тых роботниках и селянах, котры уж розуміют робочу правду, розуміют, што они борются за народну свободу, за социальну справедливость, за свою народну Испанию, в котрой бы не были надальше рабами панов, а были сами газдами. Коли на территории Испанской Республикы сут ище такы роботникы и селяне, котры того не розуміют, бо старый панский режим оставил больше як половину населения неграмотного, — то народне правительство учыт тых роботников не лем грамоты, але и народной правды, а тота народна правда тепер, в часі гражданской войны, робочыми и селянами дуже скоро розбератся, розумієся, приходит тота наука дуже легко. И то не лем на народной территории, але и на фашистской территории тота робоча наука приходит сама. И лем дякувати тому скорому розумінию правды народне правительство могло так скоро организувати пол-миллионну перворядну армию. Тота народна армия складатся с свідомых роботников и селян, котры розуміют, за што они борются, то люде, котры готовы умерти за свою правду.

Не то фашисты, так испанскы, як и заграничны. Фашисты не можут опертися на свідомых робочых и селян, бо тоты их врагы. Они мусят оператися на темняков. А темняков што раз меньше. Чым дольше война, то свідомых больше, а темняков меньше. То уж таке право природы, што люде идут вперед, а не назад — до світла пхаются, а не в темноту.

Припустме даже, што Гитлер з Муссолиним зберут дальшы соткы тысяч своих темняков и вышлют в Испанию против геройской, свідомой республиканской народной армии. Припустме, што им удастся при помочы тых темняков заняти цілу территорию Испании. Но але до того часу так в цілом світі уменьшатся темняков, а убольшатся свідомых людей, што фашисты не удержатся во світі, а тым самым и в Испании, и у себе дома, в Германии и Италии.

Але мы не віриме, штобы им удалося покорити пред своим упадком испанский народ, бо тот народ страшно завзятый и храбрый. Для приміра, який в той Испании жыє завзятый и храбрый народ з давен давна, подаме два историчны факты:

Соткы літ пред Христом феникияне, сусіды єврейского народа в Малой Азии, народ надзвычай жывый и промысловый, збудовали колонию в сіверной Африкі над Средиземным морем, якраз через море напротив Италии. Тота колония, зо своим найславнійшым товды торговым містом Картагином взросла в велику силу и богатство. Напротив, по другой стороні росла сила Рима, и римскы патриоты не могли терпіти той Картагины, єй конкуренции на Средземном морі, мимо того, што картагинці не грозили Риму милитарном силом, бо то был народ больше промысловый, торговый, а не милитарный. Так што римляне вічно беспокоили Картагину. Около 200 літ до Христа в Картагині родился великий вождь и патриот, по имени Ганнибал, котрый хотіл помстити римлянам за вічны напады на його отчину. А што в самой Картагині не было столько вояков ани храброго людского материала, то Ганнибал пошол до Испании и там собрал армию для помсты над Римлянами, из предков днешных испанцов. И хоц тота його армия не мала часу так выпрактиковатися, як римскы легионы, он рушыл з ньом против Рима, розбил римскы легионы, где му стояли на дорозі, перешол с том збідуваном голодном армиом первый раз в истории через Альпы, розбил римлян в Италии и дошол аж под стіны Рима. Спасло римлян лем тото, што люде перейшовшы таку дорогу в голоді и холоді, коли пришли на римскы богаты долины, где было дост хліба, овочов и солнца, забыли, што они пришли покончыти з Римом, и в достатках стратили свою завзятость и храбрость.

Такых воєнных чудес в тоты часы против найсильнійшого Рима Ганнибал не мог бы доказати на чолі ниякого другого народа, лем тых предков теперішных испанцов.

Другий примір маме з наполеоновекых воєн. Наполеону покорилася вся Европа, кромі России, Англии и Испании. Россия была велика и далека. Англия была окружена морем и мала сильну флоту, а аеропланов не было. Но Испания была сейчас в сусідстві Франции, а Наполеон не мог покорити испанский народ. Бо в тоты часы наполеоновскы не аристократия боронила Испанию, а сам народ, испанскы селяне боронили свою отчизну от наіздника, як боронят єй тепер от фашистскых наіздников. И Наполеон их не мог побідити и покорити.

Длятого мы так віриме, што тот народ не дастся побідити и покорити фашистскым дикунам, а побідит их и выжене зо свойой землі, а тым освободит от дикого фашизма не лем свою землю, а и саму Германию и Италию, и ціле людство.

Всьо культурне, прогрессивне людство повинно помочы испанскому народу в його борьбі против фашизма, но передовсім повинны помочы роботникы и селяне, бо там иде борьба о то, ци роботникы и селяне такы самы люде, як и другы кляссы, ци они мают остатися нисшом кляссом, за яку єй уважают упривилегиованы кляссы. Борьба в Испании не точытся лем за интересы испанского народа, але за такы самы интересы всіх народов світа, и за интересы нашого карпаторусского народа, и за нашу свободу.

Мы уж можеме днеска похвалитися, што и мы порозуміли тоту борьбу в Испании, бо уж и члены нашого народа борются на полях Испании за свободу нашого народа. Мы, члены Лемко-Союза, єдиной нашой карпаторусской народной прогрессивной организации можеме быти горды на то, што тота наша организация выховала такых свідомых людей в нашом народі, котры добровольно понесли свою кров в Испанию в жертву за свободу нашого народа.

Помогли члены нашой организации и материально испанскому народу, жертвам дикого фашизма. Через нашу централю перешло выше пятсот долларов на помоч испанскому народу, а нашы отділы сами, містным американскым комитетам передали соткы долларов для помочы испанскому народу.

Нашы домородны фашисты ведут пропаганду против помочы Испании такым способом, што бесідуют темнякам:

— Видите, Л. С. помагат Испании, а не свому народу!

Но вмісто нам шкодити таком пропагандом, они помагают нам в пробуждению народа и в порозумінтю и тыми, котры дотепер не могли порозуміти, што помоч испанскому народу, то найліпша помоч нашому поневоленому карпаторусскому народу.