450 літ тому назад вся земля не была ище знана европейцам, хоц в Европі в тоты часы жыли найвысше цивилизованы народы, найвысше стояла наука. Не была в тот час ище знана западна половина земской кулі, а именно не был знаный ище цілый американский континент, на котром мы сегодня жыєме, и много другых земель и морей не были европейцам знаны. Подумати, што всього лем 450 літ тому назад, сегодня найбогатша земля в світі, Америка, не была в Европі знана.

За тоты минувшы 450 літ люде познали всю землю и переконалися наочно, што земля округла, бо тысячы людей подорожували уж наоколо світа, из Запада на Восток, або из Востока на Запад, и хоц все ишли, плавали, летіли перед себе, то все вернули на тото само місце, с котрого вышли. Днеска уж всі знаме, што в Японию можеме іхати або на Запад, через Тихий океан, або на Восток, через Атлантик, Россию, Сибирь.

Але коли можна обыйти землю легко из Запада на Восток, або из Востока на Запад, — то уж не так легко из Юга на Сівер и обратно, бо на самом сівері и югі находятся концы земской осі, т. з. полюсы, котры страшно трудны, так трудны для перехода, што хоц уж вся земля была обойдена, уж и меньше трудный Южный полюс был смілыми людми збаданый, то Сіверный полюс остался незбаданым, ждал аж на найсмільшых и найотважнійшых людей до 21 мая 1937 року, на совітскых летчиков и совітученых, на большевиков, котры там сіли засіли, взяли тоту недоступну дотепер кріпость нашой планеты, усілися на ледах и открывают цілому світу незбаданы дотопер природны тайны Сіверного полюса.

От XѴІ віка найрозвитшы людскы мозгы робили над тым, якбы то открыти тоты природны тайны Сіверного полюса, якбы достатися там. И много смілых ученых и их помочников пропало в ледах Сівера, а счастливым ледво удавалося вернути, не досягнувшы свойой ціли.

Лем 1909 року первый чоловік, американец Роберт Пири, ступил на ледяны поля Сіверного полюса, послі 23 літных упорных усилий, при помочы ескимосов и их собак, но не пробыл там ани 24 годин, так што для наукы, для открытия тайн того вершка земли, не мог нич зробити. Але то был первый и лем оден чоловік, котрый досягнул Сіверного полюса земным путем.

Отколи чоловік взнюсся до воздуха, почал думати, як достатися на Сіверный полюс воздушным путем. Але аж в 1926 року через полюс перелетіл на самолеті американец Берд, и того самого року на дирижаблі “Норвегия”, норвежец Амундсен. Но ни єден ни другий не осмілилися сісти на полюсі, лем посмотріли з воздуха и вернули. В 1928 року итальянский генерал Нобиле, на дирижаблі “Италия”, свойой конструкции, пустился на Сіверный полюс с учеными, мал політати над ним, но коли вертал, потерпіл страшну катастрофу, його воздушный корабль был розорваный страшном сіверном бурьом, многы участникы пропали, а часть из них, и самого Нобиле, удалося спасти совітскым героям летчикам. Амундсен пропал без сліда с аеропланом, на котром вылетіл спасати участников полета на Сіверный полюс на “Италии”.

Уж из выше приведеных приміров видиме, што земны полюсы, особенно Сіверный полюс найнедоступнійше місце нашой землі. Недоступне по причині великой зимы, яка там панує вічно, сніжных бурь, ледовых гор, котры плавают по морі, збиваются єдны з другыми и утворюют непреходиму ни для кораблей, ни саней ледово-водяну гущу.

Ище треба нам знати, што тота частка землі обернена так до солнца, што на полюсі и в його околиці ціле пол рока день, а друге пол рока ноч. Коли у нас літо, то там неперерваный день, а коли у нас зима, го на полюсі неперервана ноч.

Штобы то розуміти, то треба знати, што наша земля крутится коло свойой оси, обернеся коло ней за добу, 24 годин, а оба полюсы, Южный и Сіверный, то кончикы той оси. И як земля обертатся, то у нас, на том місци где мы жыєме, земля раз надставится до солнца, товды у нас день, — а другий раз отверне тоту сторону от солнца, а надставит другу, — товды у нас ноч, а на другой стороні кулі день.

Але коло самых концов оси земля, хоц на місци обертатся, то и день и ноч наставлена до солнца, солнце літом там “за гору не заходит”, лем якбы обходило колесом “понад гору”, понад горизонт, все кружится низко “над гором”, аж обыйде за 24 годин доокола “понад гору”, понад горизонт, с початку літного сезона понад самым горизонтом, потом в середині літа кус высше, но николи так не кружится высоко, штобы мало силу побідити страшну зиму на полюсі.

Якто приде, што половина року ноч? Знаме, што наша земля, кромі того 24 годинного обороту коло свойой оси, летит беспрерывно коло солнца, и тоту дорогу коло солнца зробит за час єдного року. И в том свойом леті коло солнца, она так надставятся до солнца том частьом свойом, где мы жыєме, што в єдну пору року тото солнце гріє нас ліпше и долше, а в другу пору року слабше и коротше. Своим рочным полетом коло солнца и своими змінами положения до него, она творит у нас поры року, теплійшы и зимнійшы, котры мы назвали: Весна, Літо, Осень и Зима.

Своими полюсами при том полеті земля приберат таке положение до солнца, што том свойом частьом на ціле пол рока отвертатся от солнца, так што там пол року панує ноч.

Южный полюс лекший, не така там страшна природа, и длятого он был скорше обслідуваный чоловіком. Сіверный тяжший, але зато и важнійший для нас, бо о ньом учены повідают, што на том полюсі варится наша погода, што он єст нашом кухньом погоды, што єсли бы там на том полюсі учены могли пребывати, то они по збаданю того полюса, його природы, могли бы нам точно предповідати погоду. Но але до 1937 року, до нашого часу, ниякы учены не могли там достатися, штобы тоты тайны природы на Сіверном полюсі збадати, и не было такых геройов людства на світі, штобы их там завели, завезли, занесли и устроили так, штобы учены могли там побыти, збадати. Такы світовы герои родилися, выховалися и выучылися аж в первой робочой социалистичной державі, в Совітском Союзі. Тыми світовыми героями, то найславнійшы днеска на світі совітскы летчикы и такы самы славны совітскы учены, с проф. О. Ю. Шмидтом.

Коли фашисты, Гитлер, Муссолини, японскы генералы вырабляли собі планы, якбы захватити чужы землі, в тот сам час большевики вырабляли планы, як завоювати от природы сіверны землі, их богатства, сіверны воды для водной коммуникации, и сам Сіверный полюс для наукы и открытия найкоротшой воздушной дорогы через Сіверный полюс, из Восточной Европы и Сибири в Сіверну Америку.

Из Европы в Азию, в Тихий океан, в Китай и Японию, вела дотепер лем єдна южна морска дорога коло горячой Африкы, котра с часом была скорочена перекопаньом Суеского канала, через Средиземне море. Правда, великы морякы мечтали о Сіверной пути, через Сіверне зимне море, но послі пару неудачных пробах, занехали думати о том морском пути из Европы в Азию.

Почали борьбу с природом за тот Сіверный морский путь большевики, штобы мати свой морский путь на Дальный Восток, во Владивосток, а головно, штобы овладіти огромными природными и земными богатствами Сівера, Сіверной Сибири, а штобы ними овладіти для пользы совітскых народов, для пользы и економичной силы свойой социалистичной державы, треба было найперше открыти дорогу к тым богатствам.

И войну с твердом природом Сівера и Сіверного моря большевики выграли, а свою побіду завершили завоюваньом Сіверного полюса и перелетом через него в Америку славных совітскых летчиков.

За час той великой борьбы новых совітскых людей за недоступный дотепер Сівер, выросли и загартувалися такы людскы герои летчикы, морякы и учены, знатокы Сівера, якых дотепер світ не знал. Такых ученых, як проф. О. Ю. Шмидт, другы державы не мают. Такых летчиков, як Водопьянов, Чкалов, Байдуков, Беляков, Громов, Молоков, Чухновский, Леваневский, Алексеев, Мазурук — и много другых геройов летчиков, ровных им, другы державы світа не мают. Такых моряков Сіверных морей, як морякы славных ледоколов и звычайных пароходов, як Красин, Литке, Сибиряков, Садко, Челюскин, не мают другы, хоц и славны морскы державы, бо не могли их воспытати, виховати, бо капиталистичны морскы державы не хотіли воювати с Сівером, кажда из них думат, якбы єдна другой выдерти колонии, рынкы и богатства, котры уж открыты.

Сов. Союз завоювал в коротком часі Сівер, перерізал Сіверный Морский Путь из Европы в Азию. В минувшом року уж 14 пароходов перешло тым морскым путем Сівера, около сіверных берегов богатой Сибири, из Европы в Азию, а пару літ тому назад ище никто в зап. Европі не мог припустити, штобы тота морска дорога из Европы в Азию была возможна для коммуникации.

При большевиках сіверны моря, суровы, ледяны, стали звычайном дорогом для совітскых кораблей, розвозят по огромному побережью Сибири потребны містному населению, роботникам, выдобываючым великы богатства в тых странах, — продукты и товары, а привозят выдобыты ними богатства Сівера для людского ужитку.

И коли уж большевики подступили парусот миль до полюса, почали мечтати о скоку на сам полюс. Не о таком скоку, штобы пару минут політати над полюсом, як політали другы, а о таком, штобы там остати и збадати природны тайны той послідной территории нашой планеты, того вершка нашой землі.

СТАНЦИЯ “СІВЕРНЫЙ ПОЛЮС”

Летчик Водопьянов, не лем летчик, но и писатель, пред своим полетом и посадком на ледах Сіверного полюса написал штуку, и. з. “Мечта Пилота”, в котрой представил образ полюса, свой и своих товаришов полет там и посадку на полюсі. Якраз, коли Водопьянов летіл и садился на полюсі, в Москві в театрі грали штуку “Мечта пилота”.

21 мая 1937 року, о 11 годині 31 минут, совітский аероплан, руководимый совітскым летчиком, Геройом Совітского Союза, Михаилом Водопьяновым, сіл 20 километров от пункта, котрый математично названый полюсом кулі земской, на ледову кригу, плаваючу на территории Сіверного полюса. Сейчас из аероплана высіла експедиция ученых, под руководством проф. О. Ю. Шмидта, меж ними И. Д. Папанин, великий знаток Сівера, начальник маючой открытися станции на Сіверном полюсі, — Е. К. Федоров, магнитолог-астроном, — Е. Т. Кренкель, знаток радио и П. И. Ширшов, гидробиолог (знаток водного жытя).

Тоты штыри учены устроилися на той пловучой по Ледовитом океані кригі и перебывают там до сегодня, бадают тайны Сіверного полюса, находят научну правду, передают єй світу по радио, а тота правда має огромне значение для людства.

За пару дней прилетіли на Сіверный полюс ище три совітскы аеропланы з дальшими прирядами, материалами и запасами для совітской станции ученых на полюсі.

Интересно, што цілый тот историчный подвиг совітской авиации перешол без найменьшого несчестливого случаю, так як бы то не было найнедоступнійше місце на нашой землі. Совітскы летчикы сідали на леды и поднималися з них на воздух, якбы то не были леды, а аеродромы.

Коли совітскы летчикы спасали чужестранных летчиков, осмілівшыхся пускатися на Сівер, чудесным способом спасли челюскинцов, брали твердо позицию за позициом на Ледовитом океані, летчик Леваневский перелеты сіверным путем с СССР в Америку, — Вилл Роджерс, погибший на том самом Сівері американский писатель-юморист и артист, предсказал пред свойом смертьом, юмористичном замітком, што большевикы скоро открыют на Сіверном полюсі “гезолин стейшен”. Його юмористична замітка уж престала быти юмористичным предсказом, а стала фактом. На Сіверном полюсі стала совітска научна станция, и гезолин тоже мают на той станции. Правда, тота станция не прикріплена до Сіверного полюса, она плават по морю, но тым она ціннійша для наукы, для збаданя отплывов и приплывов воды, для збаданя околиц Сіверного полюса, той “кухні погоды”.

Бо треба нам знати, што рух холодных масс воздуха над полюсом опреділят климат континентов, так што задача тых совітскых ученых головно в том, штобы збадати тот рух холодного воздуха над полюсом, бо дотепер он не был збаданый, и длятого предсказания погоды были лем на короткий час и дуже часто неточны.

А дальше мают збадати околицу Сіверного полюса, котра тоже не збадана дотепер. Там, где на мапі видиме білявы плямы, то значыт, што тото місце кулі земской ище не збадане, ище не знают, ци в том місци ніт даякого куска сухой землі, не знают глубину моря. Совітскы учены, котрых уносит по той околиці ледова крига, бадают тоту околицу, міряют глубину моря. Бадают тоже и магнетичну силу, котра находится на полюсі, и другы тайны природы.

Приміром, учены замітили, што в той Сіверной околиці в декотрых містах вода проколола леды, значыт, што там мусит переплывати теплійша вода.

Открытие гдекотрых природных тайн, руху воздуха, установление такой станции, радио, причинится до открытия беспечного воздушного пути, и то найкоротшого пути из Восточной Европы и Азии в Сіверну Америку.

Без овладіния полюсом, без радио, по котром передаєся стан погоды на Сівері, воздушный путь через полюс в Америку невозможный тепер. Возможно, што коли наука открыє всі тайны погоды, то буде точно извістно, в який час буде погода благоприятна для перелетов, но тепер можна лем на коротко предсказати, што можна лем по радио передати.

И тота станция на Сіверном полюсі помогла уж совітскым летчикам Чкалову, Байдукову и Белякову, яко первой партии, потом Громову, Юмашеву и Данилину, яко другой партии, пробити путь через Сіверный полюс, зо старого світа в новый, — помогла им довершити великого историчного подвигу, пред котрым поклонился совітской авиации цілый культурный, прогресиввный світ.

Не признали того подвигу совітской авиации, совітскых геройов летчиков, лем фашистскы выродкы людства, они старалися уменьшити тот геройский подвиг, а што словами не могли, то старалися замолчати. Фашистска німецка и итальянска пресса молчала о том подвигу совітскых летчиков.

Описувати подробно тоты два полеты совітскых летчиков из Москвы в С. Ш. ніт потребности, потому што всім нам свіжы в памяти отзывы світовой прессы и ентузиазм народов, оссобливо американского народа.

Неудача Леваневского не уменьшат превосходства совітской авиации. Она лем показує, што воздушный путь из России в Америку через Сіверный полюс, беспечный путь, потребує ліпшого збаданя погоды и тайн Сівера.

Для овладиния Сівером, Сіверным полюсом, перелета через Сіверный полюс из Европы в Америку — были потребны школены и дисциплинованы люде и найліпшы машины, найліпшы аеропланы.

Но дотепер мы были переконаны, што найліпше школеных людей и найліпшы машины мали найліпше индустриально розвиты державы, бо найліпша индустрия дає найліпше школеных и дисциплинованых людей и найліпшы машины. Мы были переконаны, што найліпше розвиты индустриально державы світа, то Америка, Англия и Германия. И правильно мы были переконаны. Америка, Англия и Германия найліпше индустриально розвиты, они показували нам дотепер найліпше школеных и дисциплинованых людей и найліпшы машины.

Стара Россия была уважана світом, як найбольше заотстала европейска держава, культурно и индустриально, и так и было. Найліпше доказала нам то світова война.

Фашистам страшна зима от Совітского Сіверного Полюса

Но и што то сталося, што за не цілых 20 літ послі революции в России, не американскы, английскы або германскы летчикы сідают на Сіверном полюсі, на том послідном незбаданом вершку землі, не их летчикы и аеропланы перелітуют из Европы в Америку через Сіверный полюс, не их учены устроюют свою научну станцию для збаданя тайн незбаданой территории полюса, а совітскы люде и машины довершают тых подвигов на Сівері.

Тото можна об’яснити лем высшостьом совітского державного устройства над державным устройством другых держав, коли тото совітске державне устройство могло за 20 літ выдати найліпшых людей и найліпшы машины и подготовити благоприятны условия для тых подвигов своих совітскых людей.

До того часу мало передовых людей в каниталистичном світі хотіло признати высшость державного устройства Совітского Союза, над своє державне устройство. Аргументували переконуючо для пересічного чоловіка: Люде в Сов. Союзі далеко горьше жыют, як в передовых индустриальных державах, планьше одіваются, планьше отживляются, планьше мешкают, дусятся в своих квартирах. Што тот народ не мог за двадцет літ набудувати выгодных помешкань для всіх, выробити дост модной одежи для всіх, выпродукувати дост всякых присмаков для всіх, пересічный роботник тото не розберат. Он так розберат, што раз там робоча держава, то має быти царство для всіх роботников, а в том царстві має быти для него всього дост. С того нерозуміния социалистичной будовы корыстают врагы роботников, их експлоататоры. Они показуют роботникам лем тото, што єст, што там роботнику бракує, а того, што он збудувал для свойой будучности, того не показуют.

Подвиты совітскых людей внутри свойой державы о много раз большы, як овладіние Сіверным полюсом. Само овладіние полюсом пришло дуже легко, для него были уж всі даны, были подготовлены люде и выроблены найліпшы машины.

Но будова гигантской индустрии без подготовленых старом системом людей, што за огромный подвиг того народа. Но и тот подвиг не так великий в поровнанию с подвигом совітского народа в земледілию, бо свойом индустриом, єй продукциом, совіты ище не перевысшили капиталистичну индустрию в такых передовых индустриальных державах, як Соед. Штаты, Аглия, Германия.

Добыти такий урожай, який добыл зо свойой землі совітский народ минувшого літа, то огромный подвиг того народа, он доказал, што совітска держава поставила своє земледілие на переді в цілом світі, коллективизовала и механизовала го в цілости. Яка держава може тым похвалитися, што она раз на все обеспечила своих грапродуктами для жытя. За 20 літ выпровадити на свои поля пол миллиона тракторов и 140 тысяч комбайнов мог лем Сов. Союз при свойом социалистичном устройства

Но трудно при той великанской народной роботі требувати от того народа, штобы он в тых 20 літах забеспечился и выгодными квартирами и модном одежом. Тото уж приде само собом в свойом часі, як из социалистичного устройства пришла индустриализация, з индустриализации механизация земледілия, його коллективизация и обылие земледільскых продуктов, як при том социалистичном устройстві родилися и выховалися новы герои людства, котры завладіли недоступными богатствами Сівера и самым Сіверным полюсом, так приде в свойом часі всьо, што лем потребне для выгодного жытя граждан социалистичной державы.

Капитан Вилкис, один из найбольшых знатоков Сівера, послі овладіния большевиками Сіверным полюсом, написал в Н. Й. Таймс статю о Сівері, Сіверном полюсі и достижениях совітокой авиации и наукы на Сівері. В той статі он заявляє, што тоты совітскы достижения доказуют, што совітска держава має высше державне устройство от другых держав, и што в выробі аеропланов она з их досконалости превосходит тоже другы державы.

И потому завладіние Сівером и Сіверным полюсом має тоже огромне политичне значение, бо из того каждый уж може видіти, што молодый социализм, в так коротком часі, довершил того, чого не мог довершити ни в минувшости ни в теперішности капитализм, а тым доказал молодый социализм свою высшость над старым капитализмом. И тот доказ далеко ліпше переконує пересічных людей, тых, котры не розуміют ище социализма, як приміром коллективизация и механизация земледілия в СССР, хотя то больше досягнение социализма от завоювания Сівера и Сіверного полюса. Но тота социалистична господарка и єй успіхы находится в границах Сов. Союза, а тоты достижения на Сівері и перелеты совітскых летчиков вышли уж поза границы совітской социалистичной державы, и потому тоты достижения новой совітской наукы и индустрии уж видны и понятны всему человічеству.

Видны дві культуры, стара капіиталистична и нова социалистична. Коли стара капиталистична переходит в фашизм, котрый выкорыстує досягнения наукы и новой техникы для уничтожения людства, його научных и будовляных досягнень, самой наукы и культуры, — то социализм выкорыстує тоты досягнения для розвития людской культуры, для дальшого розвития наукы, для открытия и выдобытя земных богатств, богатств Сівера, для збаданя тайн Сіверного полюса, для народной розбудовы, для розвития земледілия.

Коли японскы милитаристы фашисты напали на Манчжурию, итальянскы фашисты на Етиопию, потом итальянскы и германскы на Испанию, и мордуют невинны народы при помочы новых вынаходов наукы, новых машин, — совіты тых вынаходов наукы, тых новых машин употребляют для пользы всім народам, тоже через войну, але не против безборонных людей, против жен и дітей, а против сил природы, котры не допустили дотепер чоловіка на Сівер на Сіверный полюс, не допустили го до богатств Сівера, не пускали го Ледовитым морем из Европы в Азию.

Большевикы первы побідили сіверны силы природы и запановали над Сівером и Сіверным полюсом, взяли послідню для другых недоступну территорию нашой планеты.

Така разница меж старом капиталистичном и новом социалистичном культуром.