14 сентября 1937 р. умер в Ланах, недалеко Прагы, первый президент Чехословацкой републикы и самый выдаючийся и найширше світу знаный за послідных пятьдесят літ сын чехословацкого народа — Томаш Гариг Масарик.

В свойой прощальной бесіді на похоронах теперішный президент Чехословакии Едвард Бенеш сказал, што Масарик выпровадил чехословацкой народ из провинциализма на путь шырокой світовой политикы. Штобы выйти на тот путь, чехословацкий народ мусіл провести велику роботу, найперше над собом самым, штобы перевоспытати себе и выробити собі правильну программу народной политикы, а так и по отношению к другым народам и державам, штобы представити им в правильном світлі свои стремления и роль в истории Европы. В той роботі руководительом и передовым борцом свого народа был Масарик.

Томаш Масарик родился от бідных родичей, дворскых слугов в маєтках членов Габсбургского рода в полудневой Моравии. Отец, из роду словак, служил кучером, а мати покойовом служанком. Так даже в личной жытьовой карьері Масарика нашла свое отражение исторична судьба чешского и словацкого народа. Из простого бідного слугы в маєтках Габсбургов Масарик стался президентом незавимой Чехословацкой републикы. Так и чехословацкий народ, поневоленый Габсбургами, розбил царство Габсбургов и створил свою власну державу.

Масарик єст знаный в світі як философ социолог, профессор, политик, борец за свободу свого народа и президент републикы. Он студиювал ціле жытя историю чешского народа и историю розвития европейской культуры, штобы порозуміти роль чешского народа в жытю Европы и дати йому правильну программу народной политикы.

Чешский народ, даже вмісті зо словаками, єст малый Народ, занимаючий невелику территорию в середині Европы. И Масарик застановлялся над тым, якой политикы має держатися такий малый народ, штобы не пропасти меже другыми народами, лем занята свое місце и мати значение и повагу в світі. Он говорил, што такий малый народ не може добитися свого місця в світі насильством, революциом, не може думати о пошырению своих границ войном. Такий народ должен глядати иншых путей. Он должен познавати и отстраняти свои недостаткы, абы проникнути в світ розвитиом своих сил, людскостьом и розумом — революциом головы и сердца. Людскость, основана на религии, любов к правді и жажда правдивого христианства составляют головный смысл чешской истории.

Но Масарик не находил правдивого християнства в официальных християнскых церквах. То сближало го зо славным русскым писательом Львом Толстым и с його науком о самосовершенствовании. Лем с учением Толстого о непротивлении злу Масарик не мог погодитися. Масарик твердил, што перед злом не можна уступати, а треба боротися с ним. То выразил он и в свойом знаном афоризмі: “Не красти и не боятися.” Тут в короткых словах он показал, як має выглядати правдиве християнство на практику в жытю, особливо в жытю чешского народа.

С том религийно-идеалистичном философиом он подходил и к рішенню политично-социальных проблем. Он был за социальну справедливость и братство меже людми и народами, за свободу национального розвития и демократию. Но марксизм он отвергал. С материалистичным світоглядом марксизма он, розумієся, не мог примиритися. Масарик писал много, штобы доказати заблуждения Маркса, а коли выбухла пролетарка революция в России, он поставился ворожо до совітского правительства. Уж як президент, он поборювал революцийный робочий рух в Чехословакии.

Вся философия Масарика єст на ділі практична философия жытя, пристосована до потреб малого народа, котрый хоче удержатися меже великыми и сильнійшыми народами. Он за християнску любов и братство, за равноправность и людскость, бо при таком порядку сильнійшы народы обязаны уважати права слабшых народов. Но он против правдивого христианского учения Толстого о “непротивлению злу насилием”, бо тогды малый народ не мог бы боротися перед денационализациом и поглощением зо стороны великых народов. Он реалист в народной политикі, бо розуміє, што сила народа должна быти оперта о реальны факты и возможности народа, а не о историчны фантазии и теории. Но он анти-марксист, бо в марксизмі видит брутальный реализм економичных фактов, котрый може быти опасным для малых народов.

Не пишеме того, штобы уменьшыти значение Масарика, но наоборот, штобы лучше подчеркнути його огромне значение в истории чехословацкого народа. Чешский народ называт Масарика своим отцом и освободительом. Масарик вполні заслужил собі тоты титулы.

Однако под конец свого жытя президент Масарик виділ, што його идеалистична философия столкнулася с брутальном философиом фашизма, котрый об’явил открыто, што сильный має право панувати над слабшым, и што ниякой иншой религии на світі ніт, лем религия силы. То напевно глубоко потрясло душу Масарика и омрачило послідны рокы його земного пути. При конці 1935 р. он добровольно зрезигнувал с уряду президента Чехословацкой републикы и удалился в подаруваный му благодарным чехословацкым народом замок в Ланах. За рок и 9 місяцев послі того он умер на 88-ом року жытя.