| Каменисты пути и потокы рвучы, Березовы дебри и лісы дремучы, Кычеры высокы, поляны зелены, Пропастны ростокы, зрубы пороснены. А школы маленькы, хыжы деревляны, Діточкы босенькы — люде застараны. Кус голузя на оборі — а пусто в коморі, Темно в хыжы — смутно смотрят иконы на стінах, Коло пеца бренчат мухы, гуси — куры в сінях. Кус дерева за стодолом — на купі чатина, Біда смотрит через выгляд — ОТО ЛЕМКОВИНА. |
| ———ооОоо——— |
| Я родился твоим сыном, Доля моя бідна, И люблю тя Лемковино, Моя мати ридна. И хоц земля наша бідна, Доля незавидна, Не забудут мои очы Тихых горскых ночей, Ани сердце не забуде, Покля жыти буде. Бо ци-м годен позабыти, Нашу горску красу, И смеречкы и поляны, Где ся овцы пасут, И черницы и яфыры, Ягоды, малины? . . . Верабоже не забуду Нигда Лемковины. Шумлят лісы, грают пісні, Гей за давны вікы, А яличкы ся кланяют, Смерекам столітным. Хмары плынут понад горы, Тихицько як гуси, Понад горы, понад лісы, Аж с Карпатской Руси. От Тячева, Ужгорода, През Гуменне — Пряшев, Плынут ку нам милы хмаркы. 3 вісточком от нашых. Идут дале ку Щавницы, През татрянскы турні, През Шляхтову, Білу Воду Гет аж ку Остурні. |
А ліс шумит, пісню співат, И слухают хмары, О волі, о прошлой славі, И о часах старых. Там в ростоці видно село Далеко пред нами — Малу хыжку, стару школу, И под бляхом корчму. Солнце сіло за Кычером, И вітер уж стихат, Ліс спокойный пред вечером. И легко отдыхат. Роса падат, місяц зышол, Тишина на селі — Лем здалека чути граня Цыганской капелі.
———О———
Я вас люблю, як и своих,Цыганы — Романы, Вас голодных И обдертых И споневераных. Не мате свойой отчизны, Нигде не признаны, Лем любите нашы горы, Бідуєте з нами. И бідны сте вы гудакы, Без землі, без роду — Як я люблю ваше граня И вашу свободу! |