Помимо того, што С. Штаты граничат с Каналом, великым посельническым простором, о Канаді в нашых горах никто николи не говорил, никто за Канаду росказати не мог, ци єст то можлива для нашой емиграции страна, ци ніт. В том крыєся тота правда, што наш народ любил занадто свою родну землю в Карпатах, а в Америку емигрувал лем с тым, штобы вернути назад на свою землю и зато наш народ скорше привык до незнаной му роботы в фабрикі або темной майні, як до чужой заморской землі, котру нияк не уважал за свою будущу страну, на котрой мож было бы розвести свою родину и статися гражданином той страны. Длятого наш народ интересувался лем индустриом в С. Шт., при котрой мог заробити и вернути в свои родны Карпаты, а о такой страні як Канада, земледільской страні никого не просился и не интересовался ньом.

Ище перед тым, коли Америка закрыла емиграцийны двери в свою страну, закрыты были двери во всі другы европейскы страны. Население на нашой землі почало густіти, а с тым стал отчуватися брак земли и хліба. Лемкы увиділи наближаючуся на них угрозу голода и нужды, и приняли бы всяку можность емиграции, лем штобы спастися перед том угрозом. Як раз в тот час, а то около 1925 року, канадскы желізнодорожны и пароходны компании СПР и СНР, нашлися в лихых обставинах, при банкротстві, и зато заявили канадскому правительству, в котром мали рішающий голос и великий вплыв, штобы або открыти емиграцию в Канаду на шыроку скалю, штобы тоты компании робили даякий “бизнес”, або инакше придеся им банкротувати з великом стратом для державы. На таке предложение правительством Канады была открыта емиграция. Выше упомянуты компании не лем постаралися о открытя емиграции в Канаду, але ровночастно должны были найти емигрантов для поселения в Канаді, и они начали вербовку европейского населения в Канаду. В агитаторской ціли были выданы специальны брошуры на всіх европейскых языках, подобно як при сошествию св. Духа, в котрых были описи богатства и добробыту той страны, с полныма иллюстрациями земельных и подземных богатств, а ровнож и установы демократичных прав, котрыма пользуются всі граждане в вірі, обычаях и политичных переконаниях. Кромі того были описаны всі возможности, якы каждый трудящийся може осягнути, ци то яко простый робочий в фабрикі, лісі, майнах и особенно на фармах, ци то яко робочий, ци поселенец. Враз с том всьом литературом в Европу были высланы соткы агентов, котры ворвавшыся в Европу найперше глядали найбіднійшых краєв, бо там было найліпше поле для их емиграцийной миссии. Такым способом агенты подошли аж на Лемковину с обох сторон Карпат, где серед нашого населения встрітили велику охоту к емиграции. И коли порозвішали по всіх публичных містах нашых сел, по фігурах, арештах, корчмах, буйны плакаты, розмалюванні в яркых кольорах с видами Канады, в тот час аж лемкы дозналися, што то за край Канада, який он богатый, в котрый мож сміло емигрувати. Такым способом первый транспорт из Лемковины непосредственно в Канаду был высланый літом 1926р.

На первом транспорті не кончылося. Бідна наша страна, до свойой бідноты и убожества была ище спалена войном и зрыта кулями и фортецами, потребувала отреперовкы. Гдекотры, котры до тых часов отреперовали у себе дашто, то лем на кошт пожычкы, котру звернути не было откаль. Многы мусіли выбератися на емиграцию, штобы якым нибудь способом отбудуватися, звернути долгы и зажыти в будучности лекшым жытьом. Попри тых выізджали в Канаду ищы и многы тоты, котрым не было міста уж на своих землях при родинах, и котры мали ище даяку спадщину по родичах, отдавали на подорож до Канады. Около 20,000 приблизительно за короткий час, бо лем чотыри рокы, выемигровало из Карпат в Канаду. Не сут то точны цифры, бо составлены лем из нашой карпаторусской массы, котра днес совокуплена по большых индустрияльных центрах и осядена большыма группами на фармах.

Мало ко из нашого лемковского племени выізджал на канадский чорнозем, бо у кого было настолько средств, штобы мог осістися яко колонист на землю, тот емигрувати не хотіл нигде. Он обчыслил собі так, што при своем “богатстві” он може и дома выжыти без біды, и не треба ся му турати по емиграции. Переважно наша лемковска емиграция склалася с тых елементов, котры ишли заробити и повернути в свои стороны. Котры не мали к чому и до кого повертати, емигрували с тым, штобы якыма бы то силами не было, устроитися на емиграции. Меже тыма было много нашых братов, котры ради того, штобы найти для родины будучность, оставляли єй, іхали длятого, штобы на емиграции заробити и стягнути свою родину ку собі.

Вся наша емиграция прибываюча в Канаду, была доставляна старанно на далекий Запад Канады, на фармерскы и лісовы роботы. Агенты тых же самых желізнодорожных компаний строго пильнували, штобы наша европейска емиграция не сходилася с робочыма в индустрияльных центрах в той обаві, штобы не побольшыти радикальне движение, котре творили канадскы робочы, понеже организованый робочий рух уж почал в 1823 року оформлюватися в Канаді и в 1923 отпразднувал свою столітну годовщину. С того 1823 року почали организоватися по Канаді профессиональны робочы организации и разом с ростом и нагромадженьом канадского капиталу, росло и кріпло робоче движение. Доливати европейску емиграцию в тот рух было непожаданым для канадского богатого классу, длятого самы условия от них вымагали того, штобы тоту европейску массу, для котрой правдивого занятя не мали, не злучати с тым движением, яке проводилося робочыма Канады. Емиграцию постановили тримати далеко от прочого робочого движения.

Наша емиграция селянска, не была заинтересована в общой организации. Каждый с той емиграции особисто думал над собом, штобы здобыти для себе и свойой родины средства жытя и собі скорше помочы. Бо и с тым наша емиграция выізжала в Канаду. Но так не сталося, як многым бы хотілося, або як многы собі выображали. Сейчас при первых заробках наша емиграция зараз переконалася, што всі тоты бесіды агентов о заробках в Канаді были обманством. Даже многых емигрантов місяцями держали по бюрах, не маючы где их примістити, бо брак было для них занятя. Но наш народ збідженый, годился со всім и докладал всіх сил, штобы лем помочы собі, выратуватися. Но то было трудно. В конці настала криза, котра, якбы желізном мітлом змела нашу емиграцию из фармерскых робот в индустрияльны центры. Наша емиграция змінила свою форму не из фермеров на профессиональных робочых, а из селянскых робочых на городскых безроботных. В том положению нашой емиграции пришлося попробувати всего того, што знане як біда и нужда. Попробували релифу, рабскых лагеров, фрейт-кар, а в своих домаганях за жытя познайомилися с полицейскыми клобами. Многы походували в голодовых маршах, где нераз полиция проганяла их по всіх углах, штобы такым способом вымордувати тых европейскых гостей, котрым обіцували на их родной землі заробкы, демократию и свободу в Канаді.

Значна часть нашой емиграции, маючы своих родных в С. Шт., постепенно через стараня родных переселилася в С. Шт., где злялася з нашом великом емиграциом. Решта емиграции остаєся надале выкинена недольом на край пропасти, в котрой жде лем свойой кончыны, понеже нашлася приперта на краю безвыходной гыбели. Многым не мож вернутися к своєй родині, бо не мают за што и чого, ни стягнути своих родин к собі, понеже не мают о чом, а єсли гдекотры мают о чом, то не можут, бо сут ограничены канадскыма законами, котры не дают можности выполнити многым родинам их обовязок взглядом свойой родины. Молодеж, (бо много дітей неполнолітных іхало на тоту емиграцию) остає тыж без средств до жытя и ратунок, котрый для себе нашла, то лем рабскы лагеры в Канаді, специально подготовлены для того, штобы там укоротити и замкнути жытя непотребным силам при розбудові капиталу. Канадске правительство контролюване одиницями, через великых пару капиталистов, злученых, в наймодернійший империялистичный способ, трестами, картелями, концернами и монополией и под их волю и контролю подпадат жытя всей страны, а в том нашой лемковской емиграции. Така власть не дбат о жытя трудящыхся масс, и длятого не выполнит николи волю народных масс. Емиграцию в таку страну при капитализмі не мож инакше назвати, як каторжным изгнанием.

Не чудо, што наша емиграция познала основы капиталистичной демократии и при свойой встрічі з малым чыслом лемковской передвоєнной емиграции, котра поселилася в Канаді посредством емиграции из С. Шт., обсудила над своим положением ту и в старом краю. В результаті той встрічы завязана остала на канадском континенті лемковска робоча организация Лемко-Союз, котра до днес розвиватся и существує. Початкова идея помочы старому краю и соєдинение лемков галицкой и угорской стороны в одну народну группу, а особенно в С. Шт., среди нашой найбольшой емиграции. Программа Лемко-Союза, через общу дискуссию лемковского народа в газеті “Лемко”, а ровнож через скликуваны С’ізды, была розроблена и вскріплена боєвым организаторскым подъемом в борьбі за права социяльны и народны нашой емиграции и старого края.

Лемковска емиграция в Канаді должна в цілости и единодушии сознати своє положение и соєдинитися в борьбі за достижение тых цілей, ради котрых мы емигрували. Мы должны совокупитися за устранение тых законов, котры не дают нам можности жыти и загнали нас на безроботне вымертя и рабскы лагеры. В Канаді, помимо того, што она то демократична страна, были примінюваны против всіх робочых, а тым больше против емигрантов такы права, як приміром знесена уж 98 секция карна своду законов, на основі котрой не давано робочым можности организации. Што в той демократии не было правдивой демократии, то послужыт тот факт, што в Канаді свого часу против робочых был заведеный закон ище с 1702 року, котрый ужывано в Англии за царствуваня королевы Анны, то значыт с тых часов, коли ище не признавано робочым ниякых прав на голос за свою свободу. Через такы и им подобны права мы на емиграции терпиме и не маме способу боротися за нашы насущны интереса, як хліб, свободне слово, наука и будучность.

Лемковска емиграция жде с дня на день поправы, котрой нияк не видно, и при такой господарці и роспреділі труда и хліба не може быти ниякым чудом. Мы дожываме віку, замкнены судьбом. Закрыты перед нами двери до жытя, закрыты перед нашом родином. Одным словом, наша емиграция поставлена на суд своєй долі. Єсли нашой емиграции враз с трудящым классом Канады не удастся побудувати Народный Фронт в границах Канады, мы выгынеме в тисках канадского капиталу. Єдна найблисша надія, котра може нам помочы выдостатися и поправити хоц частично наше положение, то Народный Фронт. Власть Народного Фронта передаст законы для переробкы трудящымся, на пользу всего народа страны, тым самым и збідженой емиграции. Народный Фронт лем може на разі помочы нам в цілости, и старому краю через тоту помоч нам. Народный Фронт даст нам досягнути нашых потреб, поможе устроитися нам, ци при роботі в містах, ци поселит нас на землю, як то было много раз пробовано нашом емиграциом, котра хотіла устроитися, но не была в силі. Народный Фронт ищы нам може помочы и привернути меже нами народну связь с нашыма родинами, котры через емиграцию мы утратили. Такий Народный Фронт можливый и его можут створити трудящыся Канады, як створили во Франции и Испании.

Желізным обовязком нашой емиграции єсть стояти за будову Народного Фронта в Канаді. Инакшого ратунку ніт для нас, так долго, покаль закон не буде зміненый правительством Народного Фронта на добро народне, а тым и нашой емиграции, и закон никто не змінит, лем може змінити правительство Народного Фронта. Конец нашому рабству и нужді найдеме лем при власти установленой нами. Для того наша емиграция най стане в першы ряды за тоту власть Народного Фронта.