Мои любы товарише в заморской краині,
Всім вам поклон посылаю лемковской родині.
Мои любы товаришы в заморскому краю,
Я гев лемко из Розділя всіх вас поздравляю.
Мои любы товаришы, богато вас знаю:
Почитайте слова мои зо старого краю!
Зо старого краю, з родноі землиці,
Где то ваши сестры братя з вашой околиці!
Я короткий вершок для вас днеска укладаю,
Хоц и жнива тепер в полю, то часу не маю.
Сами жнива у нас тепер, житечко дозріло,
И колосы свои тяжкы до земли склонило.
Дівчата с хлопцями
Співают ночами.
Дівчата співают, жнут жито на лані,
Другы за потоком пшеницю в Грабані,
А иншы за щобом жнут ярец в Качура,
Иншы на шолтыстві санопшу в Коцура.
Так молодіж співат, што спати не дає,
Уж гет по полночы місяц ся ховає.
Який голос хцете вшелиякы нуты,
Русскы, польскы и козацкы аж до Кригу чути...
В Боднарці на стяйнях сильный голос чути,
Так тягнут высоко, аж до Ясла нуты.
Прадідны голоси ище не зміняют,
В Вапеннім в Купелях панове слухают.
Літо сухе и горяче, ладны урожаи,
Озимина єст и лиха, сухо было в маі,
Но ярина и бандуркы красно зародили
Дост ся зато бідны люде голодом намліли...
И яфиры и малины и другы ягоды
Были того року доста, бо красны погоды.
И ягоды и малины были дост завчасу,
Тучы, грады в нас не были ще до того часу.

*      *      *

Политика в Польші панской совсім ся зміняє —
Народ польский с предвічного сну ся пробуждає.
Огромная сила людска, хлопи и робочы,
Творят силу огромную, отряды охочы,
Просто, сміло и без страху лемков запрошуют,
Разом творят Фронт Народный, всі ся записуют.
Тысячны толпы народа по містах співают
И на польскых панов-ксьондзов страшно вызывают.
Кленут панов и старостов попод их окнами,
Станут скоро всі нуждары до борьбы с панами.
Єдно здаєся недобре, же єст три партии:
Социалы, коммунисты, рольнича партия,
Але вшыткы люде разом партии єднают
И все собі дружно разом в біді помагают.
Кипит в нашой панской Польші, як вода в китлині,
Так панове докучили той бідной людині.
Як по містах так по селах штандары здвигуют,
И што ся им не подабат, то всьо критикуют.

Андрей Ванца,