Коли я подрос, взялся за книжкы, то я из тых книжок дознался, што то выдумка. В книжках ничого такого о тых людях не писали, а писали, што пришли добри вооружены європейці и индиянов вынищыли, выстріляли, што мало из них остало, а их земны богатства привластили собі. Што до негров, то єм дознался, што білы люде, добри вооружены, приходили до Африкы, лапали чорных людей, ладували на дно кораблей повязаных, и привозили в Америку, где их продавали на ярмаку американскым богачам плантаторам, як робочу худобу. И тото правда, што до президента Линкольна такий властитель, пан, плантатор, мал право и убити свого раба, як свою худобу. И лем собі подумати, што то діялося 18 сто літ по Христі, и так обходилися з людми християне, тоты самы, што клали под голову библию, як шли спати.

Культурный человік, а и правдивый християнин, мусит прити на тото, што тото правда, што были дикы люде, але не тоты бідны индияне и негры, не тоты рабы, а дикы люде то были тоты, котры нищыли немилосердно индиян и вели торговлю рабами, дикы люде, то были тоты богаты плантаторы. Они спали на библии, котра писала, што каждый человік сотвореный на образ и подобие боже, каждый человік равный пред богом, но они лем спали на той божой наукі, а не исполняли єй.

С том их дикостьом покончыл Линкольн державным законом. Религия, библия, той дикости не дала рады закасувати.

Коли я приіхал в Америку, то я переконался што тоты люде, о котрых я чул яко о дикых, честнійшы от білых. Я встрічал и индиян и негров. Так єдны як другы люде скромны, честны, лем страшно прибиты, покривджены пажерныма більма людми, дикыма єдиницами, котры, хоц не так, як повідали тоты першы емигранты, же пют горнятом людску кров, але выкорыстуют, експлоатуют тых бідных и честных людей, а штобы могли ліпше их выкорыстувати, терроризуют и понижают их.

Каждый видит уж сегодня, што дикых людей не треба глядати в лісах, в дебрях. Мы находиме дикых людей сегодня, среди всякых народов. Бо дикым человіком мы называме гнеска такого человіка, што угнетат, выкорыстує, ошукує другого человіка, жыє и богатіє його трудом. И тот самый человік, штобы закрыти, заслонити пред бідным народом свою паскудну, дику роботу, и штобы бідных людей тримати в ненависти, в незгоді, шырит религийну, национальну, расову ненависть.

Такых дикых людей и их дику науку находиме сегодня среди каждого народа, среди такых высокоцивилизованых народов, як американский, английский. То тоты люде, котры линчуют негров в Америкі и шырят ненависть к емигрантам. Находиме среди русскых. То тоты “русскы”, котры шырят ненависть до євреєв, поляков, грузин и т. п. Среди євреєв, а то тоты шпекулянты євреи, котры шырят ненависть до “гоєв”, а обдерают и своих и гоєв. Но найнесчестлившы тоты народы, над котрыма тоты их дикы люде захватили власть под именем фашизма, як напримір німці, италияне, полякы. Таке дике, фашистске правительство старатся засліпити том расовом ненавистьом цілый народ, штобы лем мочы выкорыстувати, експлоатувати, пити кров цілой массы, цілого бідного народа. Так засліпленый, загипнотизуваный народ тым дикым национализмом, диком расовом ненавистьом, стає беспомочный, якбы во сні, не чує над собом страшной операции фашистов, котры выпускают из него його кров и жытьовы сокы. Такий народ буде умерати повольном смертьом. Бо нам треба знати, што всякий народ, котрый не иде в культурі, в людскости, вперед — мусит померти, а фашисты не ведут народы вперед, к людскости, а взад, в дикы, темны вікы, коли всякий человік был звіром другому человіку. Фашизм тягне народы назад в предхристиянскы часы.

Трафятся, што дакто из побожных карпатороссов закине нам, што мы задуже против нашого духовенства выступуєме. Но мы выступуєме не против духовенства, а против дикых людей, и мы тому не виноваты, што нашы “священникы” признаются сами, што они люде дикы. Може повісте, же то неправда, што они дикы люде? Повісте, што они учытелі христианской любви, што они, по христианской наукі учат наш народ, што они служат богу, што они стоят за науку, за “русскость”, за русску культуру?

Мы то вшытко назвеме ошуством, циганством, а повідаме, што они люде дикы, и дораз ниже приведеме на тото доказ. Мы повідаме, што вся тота их “християнска любов”, то фальш, для замазаня очей бідного народа. Мы не віриме, штобы такы духовникы, якых ту ниже подаме за примір, вірили в даякого бога. А коли против той наукы, котру проповідуют тоты, што подаме за примір, не протестуют другы нашы духовникы, то мы не можеме вірити в християнство и другых нашых духовников. И мы пришли до переконаня, што наше карпаторусске духовенство дика клясса людей.

Нам треба знати, што на цілом світі ніт такого дикого духовенства, як наше духовенство, бо ніт такого духовенства на світі, штобы таку дику науку, так без ниякого прикрытя, публично, а ищы печатно, проповідало. В нашы рукы попал такий страшный документ той их дикости, што ниякого ратунку для них ніт, ниякого усправедливления.

Мы тот документ поміщаме нароком в книжкі, в календарі, штобы остал на долгий час, яко примір людской дикости, тым страшнійший, што под омофором нашого духовенства.

Наше духовенство, штобы ратувати свои позиции, свою темноту, выпустило “газету”, хоц газетом тото назвати не можна, бо ищы на світі такой газеты не было, такой безграмотной и такой некультурной газеты. Тоту “газету” подпорує и роспространяє наше духовенство по при нашых християнскых церквах. О той газеті писали и рекомендовали єй всі нашы духовны, запомоговы газеты. Появилося и в самой той газеті много поздравлений от поодинокых нашых духовников. И вот, што мы находиме в одном, 8 н-рі той газеты:

“Йонкерскіи “лемкоммунисты” послѣ поцѣлуевъ съ неграми “на пикнику” первого сентября, такъ отъ негровъ засмердѣлись, что цѣлыми днями мыются и всеравно ничъ непомогае, и никто изъ русскихъ людей не хоче ихъ допустити блиско свого дома. Кромѣ того говорят, что нова генерація “лемкотовъ” уже небуде червена, а послѣ того пикника буде “таркаста”. . . Головный комиссаръ “лемкотовъ” въ Йонкерсъ такъ свой “шторъ” съ неграми засмородиъ, что геперъ люде сдалека обминають.”

Най тото остане, яко вічна памятка для нашого народа, якы страшны, дикы люде находилися у нас в XX віку, тым страшнійшы, што тоты люде были недавно нашыма “учителями” морали и християнства и руководителями нашого бідного народа. То духовна просвіта, християнство и мораль нашого духовенства, оно тото християнство и тоту мораль роспространят и ищы має претенсию до руководства карпаторусскым народом. То його тота “русска культура”.

Мы мусиме быти благодарны за такий документ нашых бывшых руководителей, бо он сполнит нашому народу велику службу. Та сколько то ищы єст такых честных людей среди нас, што ищы все вірят тым дикым людям, што они боронят русскости, што они за русску культуру, за християнство, за церков. Уж лем совсім сліпый, безграмотный, темный робочий може уважати тот документ “документом християнства русскости, культуры”, або таку газету газетом. Думаючий человік отвернеся от такой “наукы” и такой дикой “морали”.

Мы им благодарны, што они публично открыли тоту свою мораль, бо тепер уж буде каждому ясно, чом мы против них, а они против нас, што мы против их дикости и некультурности, против того, штобы они тримали массу нашого народа в той свойой дикости и некультурности.

И зато они так кидаются, бо от світла, от Лемко-Союза, приходит им конец. Но пред своим концом открываются в цілой свойой наготі и дикости.

Видно, што они ани того не знают, што один из найбольшых творцов русской культуры был найбольший русский поет А. С. Пушкин, а тот Пушкин был з негритянского рода. Предка того великого Пушкина, негра, Петр Великий привюз в Россию и оженил на русской графині. Но они за якису “русску культуру”, але без Пушкина, за таку свою дику культуру, як зме привели єй примір выше.

Мы, честны карпатороссы мерзимеся таком “культуром”, хоц она и “посвячена”.