И так: Российскы патриоты судят, што им буде найліпше при німецкой и японской русскости. Тым, што на западі буде ліпше при німецкой русскости, а тым, што на востокі, при японской русскости. Галицкы, волинскы, білорусскы и лемковскы русскы патриоты судят, што им буде найліпше при польской русскости, под девизом: “Русь, Польска и Літва — то єдна модлітва” . . . Нашы карпаторусскы патриоты розділилися ищы на пару партий, што до русскости: Єдны стоят ищы твердо за стару свою, мадярску русскость, другы уж приняли массово чешску русскость, а тепер возродилася ищы старша русскость, русскость габсбургска.

“Ам. Русс. Вѣстник”, от 18 юля, 1935, в день св. Кирилла и Мефодия, выражат превелику радость по поводу возвращения Габсбургов на свой прадідный апостольский престол в Австрии и предсказує, як то дальше має быти, як тоты Габсбургы привернут назад монархию Габсбургов и яке почетне місто займе в той монархии и наша Подкарпатска Русь. А именно, до той Габсбургской монархии буде присоєдинене найперше кралевство св. Стефана, Мадярия, кралевство чешско-моравске, кралевство сербо-хорватске, кралевство словацке патера Глинкы и, розуєся, Подкарпатская Русь, яко Велике Княжество Корятовича и Духновича. Кто з нас може повісти, што паны превелебны от “Соединения” не стоят за правдиву, свою габсбургску, русскость, за стару, угорску русскость, коли то Мария Терезия на габсбургском престолі сиділа и грамотами нашых панов превелебных дарила.

Розумієся, што нашы паны превелебны знают, што разом с том правдивом, старом угорском русскостьом под Габсбургами, вернут обильны коблины и роковины, што габсбургы защытят захвіяны права и привилегии епископов и панов превелебных. И вшытко буде по старому. А добри было даколи! Не вшыткы мы знаме, як то добри было за старых часов, при той старой русскости, при котрой лем хлоп говорил ищы по русскы, а паны превелебны лем по німецкы, потом, при мадярской русскости, лем по мадярскы.

Коли сте пришли в Унгвар, або Епериєш и зашли сте до катедры епископской, або стали сте коло епископской палаты, то аж радость было посмотріти на нашых панов превелебных, такы были вшыткы гладенькы, округленькы, тяженькы, а шаты лем ся им так блищали.

И так треба было. Наш руснак не любил худого пана превелебного. Дуже часто приходила делегация до епископа просити о пана превелебного. Найважнійше, што делегация хотіла от пана превелебного, то жебы мал статуру, жебы была особа, жебы мал вагу, жебы был гладкий, тяжший и грубший, як в сусідном селі. Таж всі хлопы были худачкове, худых все видят, зато хоц в неділю хотіли посмотріти на особу.

И Габсбургы старалися выгодити русскому народу. Старалися, жебы мал духовников, як ся належыт, гладкых и грубых. И духовникы знали, якы мают быти, жебы догодити русскому народу.

И сниются панам превелебным от “Соєдинения” Габсбургы. Вернут они, безроботны тепер худачыска, на габсбургский престол, засядут и перше, што зробят, то вернут стары добры часы. Прикажут они наполни пивницы епископскых палат добрыма винами и старыма медами, пришлют школеных кухаров, назначат епископам миллионный плат и всім крылошанам оклады. Паны превелебны чуют, што покаль ищы “Соєдинение", то ищы хоц в Америкі мож яко тако по старому жыти, але “Соєдинение" не вічне, наш “честный", “добрый” русин почынат штоси думати и бунтуватися. Ищы єден ратунок, як Габсбургы засядут на престолі Корятовича, а втоды они всі будут Духновичами, Геровский Добрянскым, а Фенцик даякым подкарпатскым патриархом.

А нашы панове превелебны певны, што Габсбургы вернут, бо Муссолини так хоче. Они твердо вірят, што так мусит быти, як Муссолини хоче. Ци народы хотят, их совсім тото не интересує. Народы, по старому закону, ниякого голосу не мают. Мае голос папа и Муссолини и як папа и Муссолини захотят Габсбургов на австрийском престолі, то они будут на престолі. А што до нашого карпаторусского хлопа, то он “смиренно” поклонится всякому божому помазаннику и вложыт с покором свою шыю в поповске-габсбургске ярмо.

И заквітне наново стара габсбургска русскость в Карпатах, обыльна для епископов и попов. В таку русскость вірят попы от “Соєдинения."

Дакто з нас повіст, же попы в чуда не вірят. Наш Яцош пише, што попы не вірят в чуда. То не правда. Паны превелебны твердо вірят в тото, што пишут. Они кріпко вірят в Габсбургов и их счестливу звізду, вірят в вічность габсбургского престола. Они вірят в чуда. Вірят в воскресение мертвых. Вірят, што всі тоты добры руснакы, котры несли “смиренно” наложене на них габсбургско-поповске ярмо, воскреснут из гроба, и то ищы тепер, за их жытя. Воскреснут и возмут “смиренно” тото ярмо. А тоты, што гнес жыют, вымрут до єдиого и больше множытиея не будут, бо то уж большевицке насіня. Тоты стары, што воскреснит, будут жыти вічно, яко "смиренны” праведникы и будут вічно отрабяти роковину и приносити обыльну коблину.

Таке чудо статися мусит, бо инакше не можут вернути стары габсбургскы часы. А раз они вірят в тоты габсбургскы часы, в стару габсбургску русскость, они мусят вірити в чудо воскресения старого покоління и чудесного усмертнения нового. А тоты стары, помершы руснакы будут приходити зас до епископов и выберати собі гладшых, грубшых и тяжшых духовников.

И тота “русскость” буде процвітати во вічны вікы.